މިލާން (އޭޕްރީލް 16) - އިޓާލިއަން ލީގުގައި ރޭ ސްޕެޒިއާ އަތުން 3-1 އިން މޮޅުވެ، އިންޓަ މިލާނުން ވަގުތު ކޮޅަކަށް ލީގުގެ ކުރިއަށް ޖެހިލި ނަމަވެސް އޭސީ މިލާނުން 2-0 އިން ޖެނޯއާ ބަލިކޮށް ލީގުގެ އެއް ވަނަ މަގާމު ދަމަހައްޓައިފި އެވެ.
އެންމެ ފަހުގެ ޗެމްޕިއަން، އިންޓަ އިން ރޭ ފުރަތަމަ ކުޅުނު މެޗުގައި ހޯދި މޮޅާ އެކު 32 މެޗުން 69 ޕޮއިންޓް ހަމަކޮށް ލީގުގެ ކުރިއަށް އެރި އެވެ. އެކަމަކު، އޭގެ ދެ ގަޑިއިރެއްހާއިރު ފަހުން، މިލާނުން ވަނީ އަލުން އެއް ވަނަ އަށް ޖެހިލައިފަ އެވެ. އެއީ 33 މެޗުން 71 ޕޮއިންޓް ހަމަކޮށްގެންނެވެ. ތިން ވަނައިގައި އޮތް ނަޕޯލީގެ އޮތީ 32 މެޗުން 66 ޕޮއިންޓެވެ. ހަތަރެއްގައި އޮތް ޔުވެންޓަސް އަށް ވަނީ 32 މެޗުން 62 ޕޮއިންޓް ލިބިފަ އެވެ.
އިންޓަ އިން ލީޑުނެގީ މެޗުގެ 31 ވަނަ މިނިޓްގައި ވޮލީއަކުން މާސެލޯ ބްރޮޒޮވިޗް ޖެހި މޮޅު ގޯލުންނެވެ. އޭރިއާރޮނގުކައިރިން ބްރޮޒޮވިޗް ޖެހި ބޯޅަ އަމާޒުވީ ގޯލުގެ މަތީ ކަަނަށެވެ.
ސްޕެޒިއާ އިން ގޯލެއް ޖަހައި، ނަތީޖާ ހަމަހަމަކުރެވޭތޯ ގިނަ މަސައްކަތްތަކެއް ކުރި ނަމަވެސް މެޗުގެ ދެ ވަނަ ގޯލު ޖެހީ ވެސް އިންޓަ އިންނެވެ. މެޗުގެ 73 ވަނަ މިނިޓްގައި އިވާން ޕެރިސިޗް ނެގި ހުރަހަކުން އިންޓަގެ ދެ ވަނަ ލަނޑު ޖެހީ ލަޓާރޯ މާޓިނޭޒް އެވެ. މާޓީނޭޒް ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ.
ސްޕެޒިއާ ކޮޅަށް ގޯލު ޖެހުމަށް ފަހު ބްރޮޒޮވިޗް އުފާފާޅުކުރަނީ.
މެޗުގެ 88 ވަނަ މިނިޓްގައި ސްޕެޒިއާގެ ކެޕްޓަން ޖިއުލީ މަޖިއޯރޭ ވަނީ އޭރިއާބޭރުން ގޯލުގެ މަތީ ކަނަށް ބޯޅަ ފޮނުވާލައިގެން ގޯލެއް ޖަހައި އެ ޓީމަށް އުންމީދެއް ހޯދައިދީފަ އެވެ. އެކަމަކު، މެޗުގެ އިތުރު ވަގުތުގައި ލަޓާރޯ މާޓީނޭޒް ތަނަވަސްކޮށްދިން ހުސް ފުރުސަތަކުން އޭރިއާތެެރެއިން ތިރިތިރިން ގޯލުގެ ކަނަށް ބޯޅަ ފޮނުވާލައި، އަލެކްސިސް ސަންޗޭޒް، އިންޓަ އަށް މެޗުގެ ތިން ޕޮއިންޓް ކަށަވަރުކޮށްދިނެވެ.
މިލާން އެންމެ ފަހުން ކުޅުނު ދެ މެޗުގައި ވެސް އެއްވަރުވެފައި އޮތުމުން ރޭ މޮޅުވެގެން އަލުން ފޯމަކަށް އެޅުން އެ ޓީމަށް އޮތީ މެޗަށް ނުކުތްއިރު ވެސް މުހިންމުވެފަ އެވެ. އެންމެ ފަހުން ދެ މެޗުގައި ގޯލެއް ނުޖެހުނު ކަމުގައި ވިޔަސް މިލާނުން ވަނީ ރޭގެ މެޗު ފަށައިގެން 11 ވަނަ މިނިޓްގައި ގޯލު ޖަހައިފަ އެވެ. މިއީ ޕިއޭރޭ ކަލޫލޫ ހުސްކޮށްލާފައި ނެގި ހުރަހަކުން އޭރިއާތެެރެއިން ޕޯޗުގީސް ވިންގް، ރަފައެލް ލެއާއޯ ޖެހި ގޯލެކެވެ.
މެޗުގައި ޖެނޯއާ އިން ވެސް ގޯލެއް ޖެހޭތޯ ގިނަ ފުރުސަތުތަކެއް ތަނަވަސްކުރި އެވެ. އެކަމަކު، އެކަން ކާމިޔާބެއްނުވި އެވެ. މިލާންގެ ގޯލުގައި ހުރި ފްރާންސް ކީޕަރު މައިކް މައިންގްނޯން ވަނީ މޮޅު ކުޅުމެއް ދައްކައިފަ އެވެ.
މިލާނުން ދެ ވަނަ ގޯލެއް ޖެހީ މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައި ހުއްޓަ އެވެ. މެޗުގެ 87 ވަނަ މިނިޓްގައި ގޯލު ޖެހީ ބަދަލަކަށް ކުޅެން ނުކުތް ޖޫނިއާ މެސިއަސް އެވެ. އަންޓޭ ރެބިޗް ނެގި ހުރަހަކުން މެސިއަސް ފުރަތަމަ ޖެހި ބޯޅަ ޖެނޯއާ ގޯލްކީޕަރު ސަލްވަޓޯ ސިރިގޫ މަތަކުރި އެވެ. އެކަމަކު، ސިރިގޫ އަތުގައި ޖެހިފައި އައި ރީބައުންސް ބޯޅަ ގޯލުގެ މަތީ ދާގަނޑަށް ފޮނުވާލައި، މެސިއަސް ވަނީ މިލާނަށް ތިން ޕޮއިންޓް ޔަގީންކޮށްދީފަ އެވެ.
