މިއުނިކް (އޭޕްރީލް 15) - ޗެމްޕިއަންސް ލީގުގެ ކުއާޓާ ފައިނަލުގައި ވިޔަރެއާލް އަތުން ކެޓުމުން ބަޔާން މިއުނިކްގެ ކޯޗު ހޫލިއަން ނާގަލްސްމަން އަށް އިންސްޓަގްރާމްގެ އެކި އެކައުންޓްތައް މެދުވެރިކޮށް 450 މަރުގެ އިންޒާރުގެ މެސެޖް އައިސްފައިވާ ކަމަށް ބުނެފި އެވެ.
ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި ވިޔަރެއާލުން ވަނީ އަމިއްލަ ދަނޑުގައި 1-0 އިން ބަޔާން ބަލިކޮށްފަ އެވެ. އަދި މި ހަފްތާގައި، ބަޔާން ދަނޑުގައި އެ ޓީމުން ލީޑުނެގި ނަމަވެސް ވިޔަރެއާލުން ވަނީ މެޗުގެ ފަހު ވަގުުތު 1-1 އިން އެއްވަރުކޮށްފަ އެވެ. އެގްރިގޭޓުން ބަލާއިރު، ވިޔަރެއާލަށް ކުރި ލިބުނީ 2-1 އިންނެވެ. ވިޔަރެއާލް އަތުން ބަޔާން ކެޓުމުން ޖަރުމަނު މީޑިއާ އިން ވަނީ ނާގަލްސްމަން އަށް ވަރަށް ބޮޑަށް ފާޑުކިޔައިފަ އެވެ.
ނާގަލްސްމަން، 34، ބުނީ ބަޔާން ފަދަ ބޮޑު ޓީމަކާ ހަވާލުވެ ހުންނައިރު، ފާޑުކިޔުން އަމާޒުވާނެކަން އެނގޭ ކަމަށެވެ.
"ހުރިހާ ދިމާލަކުން އަންނަ ފާޑުކިޔުންތަކާ ކުރިމަތިލެވިދާނެ. އެއީ މި ވަޒީފާ (ކޯޗެއްގެ ވަޒީފާ)ގެ ބައެއް. އެކަަމަކު، އިންސްޓަގްރާމް މެދުވެރިކޮށް އައި 450 މަރުގެ އިންޒާރުގެ މެސެޖް. އެ ކަހަލަ ކަންކަމަކީ ކުރިމަތިލާން އެހާ ފަސޭހަކަމެއް ނޫން،" ނާގަލްސްމަން ބުންޏެވެ. "މެޗެއް ނިމުމުން ޓީވީ ނިންވާލުމަށް ފަހު މީހުންގެ ކިބައިގައި ރަނގަޅު އަހުލާގެއް ނުހުރޭ. ކޮންމެ މީހަކަށް ހީވަނީ އެ މީހާ އަށޭ އެންމެ ރަނގަޅަށް އެނގެނީ. އެއީ މީގެ އެންމެ ބޮޑު ގޯހަކީ،"
ލިބިފައިވާ މަރުގެ އިންޒާރުގެ މެސެޖްތަކާ މެދު އަމަލުކުރަނީ ކިހިނެއްތޯ، ގާނޫނީ ގޮތުން ފިޔަވަޅު އަޅަން ނުވިސްނަންތޯ ނޫސްވެރިއަކު ކުރި ސުވާލަށް ނާގަލްސްމަން ބުނީ މީގެ ކުރިއަށްދާނެ ގޮތެއް ކްލަބްގެ ސީނިއާ މެނޭޖްމަންޓާ އެކު މަޝްވަރާ ކުރަމުން އަންނަ ކަމަށެވެ.
"ބައެއް ފަހަރު އިންޒާރުތައް އެބަ އާދޭ އަހަރެމެން (ބަޔާން އިން) ތިން ޑިފެންޑަރުން ލައިގެން ކުޅޭތީ ވެސް. މީގެ ބަލިވާ ކޮންމެ ފަހަރަކު މަރުގެ އިންޒާރުތައް އައުމަކީ ރަނގަޅު ގޮތެއް ނޫން،" ކުރިން އާރްބީ ލައިޕްޒިގާއި ހޮފެންހައިމަށް ކޯޗުކޮށްދިން ޒުވާން ކޯޗު ނާގަލްސްމަން ބުންޏެވެ.
އިންޒާރުތަކާ އެކު ވެސް ނާގަލްސްމަން ވަނީ އޭނާގެ ސެކިއުރިޓީ ވަރުގަދަކުރަން ބޭނުންނުވާ ކަމަށް ބުނެފަ އެވެ. އެކަމަކު، ރިޕޯޓްތައް ބުނާގޮތުން ބަޔާނުން ވަނީ ނާގަލްސްމަން އަށް ލިބިފައިވާ އިންޒާރުގެ މެސެޖްތައް މިއުނިކް ސަރަހައްދުގެ ފުލުހުންގެ ސަމާލުކަމަށް ގެނެސްފަ އެވެ.
ނާގަލްސްމަންގެ އިތުރުން ބަޔާންގެ ސްޕޯޓިން ޑިރެކްޓަރު ހަސަން ސަލިހަމްދްޒިޗާއި އޭނާގެ އާއިލާ އަށް ވެސް ވަނީ އިންޒާރުގެ މެސެޖްތަކެއް ސަޕޯޓަރުންގެ ފަރާތުން ލިބިފަ އެވެ.
ވިޔަރެއާލުން ބަޔާން ކަޓުވާލިއިރު، އެ މެޗަށް ވިޔަރެއާލުން އިތުުރު ހިތްވަރު ހޯދީ ބަޔާންގެ ކޯޗު ނާގަލްސްމަން ވިޔަރެއާލަށް ނިސްބަތްކޮށް އިހުތިރާމްކުޑަކޮށް ވާހަކަ ދެއްކުމުން ކަމަށް އެ ޓީމުގެ ވައިސް ކެޕްޓަން ޑަނީ ޕަރޭހޯ ވަނީ ބުނެފަ އެވެ.
ޗެމްޕިއަންސް ލީގުގެ ކުއާޓާ ފައިނަލުގައި ވިޔެރެއާލާ ކުޅެން ޖެހުމުން ނާގަލްސްމަން ވަނީ އެއް ލެގުން މެޗުގެ ކޮންޓްރޯލް ނަގަން ބަޔާނުން ބޭނުންވާ ކަމަށް ބުނެފަ އެވެ. ޕަރޭހޯ ބުނީ އެއީ ވިޔަރެއާލްގެ އިތުރުން ފުޓްބޯޅަ އަށް ވެސް ނާގަލްސްމަން ކުރި ބޭއިހުތިރާމެއް ކަމަށެވެ.
ފުރަތަމަ ލެގުގައި ވިޔަރެއާލް އަތުން ބަލިވި މެޗަށް ފަހު ނާގަލްސްމަން ވަނީ އެ މެޗުން ބަޔާން ބަލިވުން ހައްގު ކަމަށް ބުނެފަ އެވެ. ބަޔާން ދަނޑުގައި ކުޅުނު މެޗުގެ ކުރިން ނާގަލްސްމަން ބުނީ މެޗުގެ ކުރިން މާ ގިނަ ވާހަކައެއް ނުދައްކައި، ދަނޑު މަތީގައި ނަތީޖާ ނެރެން ބޭނުންވާ ކަމަށެވެ. އަމިއްލަ ދަނޑުގައި ކުޅުނު ދެ ވަނަ ލެގުގެ މެޗު އެއްވަރުވެ، މުބާރާތުން ކެޓުމުން ނާގަލްސްމަން ބުނީ ބޭނުންވި ގޮތަށް އެއްވެސް ކަމެއް ނުދިޔަ ކަމަށާއި މި ނަތީޖާތަކުގެ ޒިންމާ ނަގާ ކަމަށެވެ.
