ލަންޑަން (އޭޕްރީލް 13) - ބެެލްޖިއަމްގެ މަޝްހޫރު އަންހެން ޓެނިސް ތަރި، ކިމް ކްލައިސްޓާސް ތިން ވަަނަ ފަހަރަށް ޕްރޮފެޝަނަލް ޓެނިހުން ރިޓަޔާކޮށްފި އެވެ.
ދުނިޔޭގެ ރޭންކިން އެއް ވަނައިގައި ކުރިން އޮތް ކްލައިސްޓާސް އެންމެ ފުރަތަމަ ރިޓަޔާކުރީ 2007 ވަނަ އަހަރު އެވެ. އެ ފަހަރު އޭނާ ރިޓަޔާކުރީ އަލަތު ދަރިފުޅު ލިބުމުން އާއިލާ އަށް ވަގުތު ނުދެވޭ ކަމަށް ބުނެ އެވެ. އެކަމަކު، އޭގެ ދެ އަހަރު ފަހުން އަލުން ކުޅުމުގެ ތެރެއަށް އައިސް ވަނީ ގްރޭންޑް ސްލޭމް ތިން މުބާރާތް ކާމިޔާބުކޮށްފަ އެވެ. ދެ ވަނަ ފަހަރަށް އޭނާ ރިޓަޔާކުރިއިރު، ވަނީ ހަ ގްރޭންޑް ސްލޭމް މުބާރާތް ކާމިޔާބުކޮށްފަ އެވެ. އޭގެ ފަހުން ކްލައިސްޓާސް އަށް އިތުރު ދެ ދަރިން ލިބުނެވެ. އެހެންވެ، ޓެނިސް ކުޅުން އިތުރަށް މަޑުޖައްސާލަން ޖެހުނެވެ.
އަލުން 2019 ވަނަ އަހަރު، ކްލައިސްޓާސްގެ އުމުރުން 36 ޕްރޮފެޝަނަލް ޓެނިހަށް ނުކުމެ، އޭނާ އަށް އެންމެ މަތީ ފަންތީގައި ކުޅެވުނީ އެންމެ ފަސް މެޗެވެ. ރަނގަޅަށް ފިޓްނަސް ނުހިފެހެއްޓުމަކީ ކްލައިސްޓާސް އަށް ދިމާވި އެންމެ ބޮޑު މައްސަލަ އެވެ.
މިހާރު އުމުރުން 38 އަހަރުގެ ކްލައިސްޓާސް، ވަނީ ޖުމްލަ އެކު 41 ޑަބްލިއުޓީއޭ ތަށި ހޯދައި، ދުނިޔޭގެ އެއް ވަނައިގައި 20 ހަފްތާ ހޭދަކޮށްފަ އެވެ.
ތިން ދަރިންގެ މަންމައެއްގެ ރޯލު ވެސް ފުރިހަމަ އަށް އަދާކުރަމުން އަންނަ ކްލައިސްޓާސް މި ފަހަރު ރިޓަޔާކުރަން ނިންމީ މިދިޔަ ދެ އަހަރުގެ ތަޖުރިބާ އަށް ބަލައިފަ އެވެ. ބެލްޖިއަމްގެ ނޫހަކަށް ކްލައިސްޓާސް ބުނީ އާއިލާ އަށް އެއްކޮށް ހުސްވެވެން އޮތީ އެތުލީޓެއްގެ ދިރިއުޅުން ދޫކޮށްލައިފައި ކަމަށެވެ.
ޕްރޮފެޝަނަލް ޓެނިހުގައި ކްލައިސްޓާސްގެ އެންމެ ފަހު މެޗަކީ މިދިޔަ އޮކްޓޫބަރު މަހު އިންޑިއަން ވެލްސްގެ ފުރަތަމަ ބުުރުގައި ކެޓެރީނާ ސިނިއާކޯވާ އަތުން ބަލިވި މެޗެވެ.
