މިއުނިކް (އޭޕްރީލް 13) - ޔުއެފާ ޗެމްޕިއަންސް ލީގުގެ ކުއާޓާ ފައިނަލުން ޖަރުމަނުގެ ޗެމްޕިއަން ބަޔާން މިއުނިކް ކަޓުވާލުމަށް ފަހު ވިޔަރެއާލް މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.
މިއީ ވިޔަރެއާލްގެ ތާރީހުގައި އެ ޓީމުން ޗެމްޕިއަންސް ލީގުގެ ސެމީ ފައިނަލުގައި ކުޅޭ ދެ ވަނަ ފަހަރެވެ. ފުރަތަމަ ފަހަރު ކުޅުނީ 2005 ވަނަ އަހަރު އެވެ. އެ ފަަހަރު ސެމީ ފައިނަލުގައި ވަނީ އާސެނަލް އަތުން ބަލިވެފަ އެވެ.
މި ފަހަރުގެ ކުއާޓާ ފައިނަލުގެ ފުރަތަމަ ލެގުގައި މިދިޔަ ހަފްތާގައި ވިޔަރެއާލް ވަނީ 1-0 އިން ބަޔާން ބަލިކޮށްފަ އެވެ. އަދި މިރޭ ބަޔާން ދަނޑުގައި އެ ޓީމުން ލީޑުނެގި ނަމަވެސް ވިޔަރެއާލުން ވަނީ މެޗުގެ ފަހު ވަގުުތު 1-1 އިން އެއްވަރުކޮށްފަ އެވެ. އެގްރިގޭޓުން ބަލާއިރު، ވިޔަރެއާލަށް ކުރި ލިބުނީ 2-1 އިންނެވެ.
ފުރަތަމަ ލެގުގައި އަމިއްލަ ދަނޑުގައި މޮޅުވެފައި އޮތުމުން ވިޔަރެއާލުން މިރޭ ބަޔާން ދަނޑަށް ނުކުތީ ވަރަށް ބޮޑަށް ޑިފެންސަށް ފޯކަސްކޮށްގެންނެވެ. ބަޔާންގެ ކުރިއަށް ކުޅޭ ކުޅުންތެރިންނަށް ފުރަތަމަ ހާފުގައި ވިޔަރެއާލްގެ ދެ ޑިފެންޑަރުން ކަމަށްވާ ޕައު ޓޮރޭޒް އާއި ރައުލް އަލްބިއޯލް ކައިރިން މާ ގިނަ ހުސް ފުރުސަތެއް ތަނަވަސްނުކުރެވުނެވެ.
ކައުންޓަ އެޓޭކުގައި ވިޔަރެއާލްގެ ކުރިއަށް ކުޅޭ އާނައުޓް ޑަންޖޫމާ އާއި ޖެރާޑް މޮރޭނޯ ވެސް ގޯލެއް ޖެހޭތޯ މަސައްކަތްކުރި އެވެ. އެކަމަކު، ފޮނުވާލި ބޯޅަތައް ގޯލަކަށް ހަދާލެވޭ ގޮތެއްނުވި އެވެ.
ދެ ވަަނަ ހާފްގެ ކުޅުން ފަށައިގެން ހަތް މިނިޓް ތެރޭ ބަޔާނުން ވަނީ ގޯލު ޖަހައިފަ އެވެ. މި ލަނޑު ޖެހީ ތޯމަސް މުލާ ދިން ބޯޅައަކުން ރޮބަޓް ލެވަންޑޯސްކީ އެވެ. ލެވަންޑޯސްކީ ތިރިތިރިން ޖެހި ބޯޅަ ގޯލަށް ވަނީ ދަނޑީގައި ޖެހިފަ އެވެ.
މެޗުގެ 72 ވަނަ މިނިޓްގައި ބަޔާނަށް ދެ ވަނަ ގޯލެއް ޖަހައިދޭން މުލާ އަށް ރަނުގެ ފުރުސަތެއް ލިބުނެވެ. ލެރޯއި ސާނޭ ނެގި ހުރަހަކުން އޭރިއާތެރެއިން ހުސްކޮށްއަރައި މުލާ ބޮލުން ޖެހި ބޯޅަ ދިޔައީ އަރިމަތިން ބޭރުންނެވެ.
ވިޔަރެއާލުން މުޅި މެޗުގައި ޑިފެންސަށް ވިސްނައިގެން ކުޅުނު ނަމަވެސް ފަހުން ބަދަލުތަކެއް ގެނެސްގެން އެޓޭކްކުރަން މަސައްކަތް ފެށި އެވެ. ވިޔަރެއާލަށް ނަތީޖާ ހަމަހަމޮށްދިން ގޯލު ޖަހައިދިނީ ބަދަލެއްގެ ގޮތުގައި ކުޅެން އެރި ސެމިއުލް ޗުކުވޭޒީ އެވެ. މެޗު ނިމެން ދެ މިނިޓަށް ވެފައި ވަނިކޮށް ބަޔާންގެ އޭރިއާ ކައިރިން ވިޔަރެއާލްގެ ފޯވާޑް، ޖެރާޑް މޮރޭނޯ ހުސްކޮށްލާފައި ދިން ބޯޅަ ޗުކުވޭޒީ ވަނީ ބަޔާން ކީޕަރު މެނުއަލް ނޯޔާ އަށް ފުރުސަތެއް ނުދީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ވިޔަރެއާލުން ސެމީ ފައިނަލުގެ ޖާގަ މި ހޯދީ ޔޫރަޕްގެ ގަދަ ދެ ބާރު ކަޓުވާލައިފަ އެވެ. ގަދަ 16 ބުރުގައި ޔުވެންޓަސް ދަނޑުގައި މޮޅުވެ، އެ ޓީމު ކަޓުވާލިއިރު، ކުއާޓާގައި މި ވަނީ ޗެމްޕިއަންސް ލީގުގެ ތަށި ހަ ފަހަރު ހޯދާފައިވާ ބަޔާން ބަލިކޮށްފަ އެވެ.
އުނާއި އެމެރީގެ ކޯޗުކަމުގައި ކުޅޭ ވިޔަރެއާލުން ސެމީގައި ކުޅެން ޖެހޭނީ ކުއާޓާގައި ލިވަޕޫލާއި ބެންފީކާ ކުޅެގެން މޮޅުވާ ޓީމަކާ އެވެ. ލިވަޕޫލް ވަނީ ފުރަތަމަ ލެގުގައި ބެންފީކާ ދަނޑުގައި 3-1 އިން މޮޅުވެފަ އެވެ.
