މެންޗެސްޓާ (އޭޕްރީލް 12) - މި ސީޒަނަށް ފަހު މެންޗެސްޓާ ސިޓީ ދޫކޮށްލަން ނިންމާފައިވާ ކަމަށް ބްރެޒިލްގެ މިޑްފީލްޑަރު ފެނާންޑީނިއޯ އިއުލާނުކުރިއިރު، އެކަމުގެ މައުލޫމާތު ފުރިހަމަ އަށް ލިބިފައިނުވާ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ފެނާންޑީނިއޯ، 36، ވަނީ މިދިޔަ އަހަރު ޖޫން މަހު ސިޓީއާ އެކު ހަދާފައިވާ ކޮންޓްރެކްޓް އިތުރު އެއް އަހަރަށް އާ ކޮށްފަ އެވެ. އަންނަ ސީޒަނުގައި ވެސް ސިޓީން ފެނިދާނެތޯ އެހުމުން ފެނާންޑީނިއޯ ބުނީ ގަވާއިދުން ކުޅެން ބޭނުންވާތީ އަންނަ ސީޒަނުގައި ސިޓީން ނުފެންނާނެ ކަމަށެވެ.
މި ސީޒަނުގައި ފެނާންޑީނިއޯ ސިޓީ އަށް ކުޅުނީ 23 މެޗުގަ އެވެ. އިނގިރޭސި ޕްރިމިއާ ލީގުގައި ފެނާންޑީނިއޯ ކުޅެފައިވަނީ ހަ ފަހަރު އެވެ. މިއީ 2013 ވަނަ އަހަރު ޝަހުތަރު ޑޮނެސްކް ދޫކޮށް ސިޓީ އަށް ބަދަލުވި ފަހުން ލީގު ސީޒަނެއްގެ މިހާ ހިސާބަށް ފެނާންޑީނިއޯ އެންމެ މަދުން މެޗު ކުޅުނު ފަހަރެވެ.
"އަހަރެން ބްރެޒިލަށް ގޮސްފައި، އާއިލާއާ އެކު ވަގުތު ކޮޅެއް ހޭދަކޮށްފައި، މުސްތަގުބަލާ ބެހޭގޮތުން ގޮތެއް ނިންމާނަން،" އަންނަ ސީޒަނުގައި ކުޅޭނެ ޓީމެއް ނިންމާފައިވޭތޯ އެހުމުން ފެނާންޑީނިއޯ ބުންޏެވެ.
މި ސީޒަނުގައި ސިޓީގެ މެޗެއްގެ ތެރެއިން ފެނާންޑީނިއޯ: މިއީ ސިޓީ އަށް ބަދަލުވި ފަހުން ފެނާންޑީނިއޯ އެންމެ މަދުން ލީގު މެޗުގައި ފެނުނު ފަހަރު.
އަންނަ ސީޒަނުގައި ފެނާންޑީނިއޯ ފެނުން އެންމެ ގާތީ އިޓާލިއަން ލީގު ނޫނީ ބްރެޒިލްގެ ކްލަބަކުންނެވެ. ބްރެޒިލްގެ މީޑިއާ ރިޕޯޓްތައް ބުނާގޮތުން ފެނާންޑީނިއޯ ހޯދަން ބްރެޒިލްގެ ގިނަ ކްލަބްތަކުން އަންނަނީ މަސައްކަތްކުރަމުންނެވެ. މެޗ
ފެނާންޑީނިއޯ ޓީމު ދޫކޮށްލަން ނިންމި ވާހަކައާ ބެހޭގޮތުން ގާޑިއޯލާއާ ނޫސްވެރިން ސުވާލުކުރުމުން ބުނީ ފެނާންޑީނިއޯގެ އެ ނިންމުމުގެ މައުލޫމާތު ފުރިހަމަަ އަށް ލިބިފައިނުވާ ކަމަށާއި ކުރިއަށް އޮތްތަނުގައި ފެނާންޑީނިއޯއާ އެ ކަމާ ބެހޭގޮތުން ވާހަކަ ދައްކާނެ ކަމަށެވެ.
"ފަހަރެއްގައި ވެދާނެ އެއީ ފެނާންޑީނިއޯގެ އާއިލާއާ ގުޅޭ ނިންމުމެއް ކަމަށް. ނޫނީ ވެދާނެ މި ސީޒަނުގައި މެޗު ކުޅެލަން ލިބުނު ވަގުތު މަދުވެގެން އޭނާ ނިންމަން ޖެހޭ ނިންމުމެއް ކަމަށް. އަދި މި ވަގުތު އަހަންނަށް މި ކަމުގެ ފުރިހަމަ މައުލޫމާތެއް ލިބިފައިނުވޭ،" ގާޑިއޯލާ ބުންޏެވެ.
ސިޓީއާ އެކު ފެނާންޑީނިއޯ ވަނީ ހަތަރު ފަހަރު ޕްރިމިއާ ލީގުގެ ޗެމްޕިއަންކަމާއި ލީގު ކަޕް ހަ ފަހަރު އަދި އެފްއޭ ކަޕް އެއް ފަހަރު ކާމިޔާބުކޮށްފަ އެވެ. ގާޑިއޯލާ ބުނީ ސިޓީ އަށް ފެނާންޑީނިއޯ ކޮށްދީފައިވަނީ އަގުހުރި ހިދުމަތްތަކެއްކަން އެ ކްލަބްގެ ކޮންމެ މީހެއް ވެސް ގަބޫލުކުރާނެ ކަމަށެވެ.
ގާޑިއޯލާ ދެއްކި ވާހަކަތަކާ ބެހޭގޮތުން ފެނާންޑީނިއޯ ބުނީ އަބަދުވެސް ވާހަކަ ދައްކަނީ ހަގީގަތަށް ކަމަށާއި މި ސީޒަނުގައި ސިޓީން ވާދަކުރަމުން އަންނަ ހުރިހާ މުބާރާތެއްގެ ތަށި ހޯދަން އޭނާގެ ފަރާތުން ފުރިހަމަ އެއްބާރުލުން ލިބޭނެ ކަމަށެވެ.
ފެނާންޑީނިއޯ ސިޓީން ގޮސްފިނަމަ އެ ތަނަށް އެ ޓީމުން ހޯދަން މަސައްކަތްކުރަނީ ރެއާލް ސޮސިއެޑާޑަށް ކުޅެމުން އަންނަ މިޑްފީލްޑަރު މިކޭލް މެރީނޯ އެވެ. މެރީނޯ ވަނީ މީގެ ކުރިން އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑަށް ކުޅެފަ އެވެ.
