މެންޗެސްޓާ (10 އޭޕްރީލް) – އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީ އާއި ލިވަޕޫލް ބައްދަލުކުރާ މެޗަކީ މި ސީޒަންގައި މިހާތަނަށް ކުޅޭ އެންމެ ބޮޑު މެޗެވެ. މިއީ ލީގު ޗެމްޕިއަންކަން ހޯދާ ޓީމެއް، ކަނޑައެޅޭނެ މެޗުގެ ގޮތުގައި މީޑިއާ އިން ސިފަކުރެ އެވެ. މި ފަހުގެ ތާރީހުގައި، އިނގިރޭސި ޕްރިމިއާ ލީގުގައި އޮތް އެންމެ ވަރުގަދަ ޓީމުތަކުގެ ތެރޭގައި ސިޓީ އާއި ލިވަޕޫލް ހިމެނޭއިރު، މިރޭގެ މެޗަށް ބޮޑު ސަމާލުކަމެއް ލިބޭނެ އެވެ.
ސިޓީގެ ދަނޑުގައި މިރޭ ކުޅޭ މެޗަށް ކުރިމަތިލާއިރު، ސިޓީ ތާވަލްގެ އެއް ވަނައިގައި އޮތީ 73 ޕޮއިންޓާ އެކު އެވެ. ސިޓީ އަށްވުރެ އެއް ޕޮއިންޓް ފަހަތުން، ލިވަޕޫލް އޮތީ ދެ ވަނައިގަ އެވެ. ޖެނުއަރީ މަހު 14 ޕޮއިންޓުން ކުރީގައި އޮތް ސިޓީގެ ލީޑު ފަހަތަށް ސޮއްސާލިއިރު، އިތުރު ގޯހެއް ހަދަން ފުރުސަތެއް ނެތެވެ. މިރޭގެ މެޗުގެ ނަތީޖާ އިން، ލީގު ޗެމްޕިއަންކަންކަން ހޯދުމުގެ ރޭހުގެ މިސްރާބު ވެސް ބަދަލުވެދާނެ އެވެ.
މި ސީޒަންގައި ހަތަރު ތަށި ހޯދުމުގެ ފުރުސަތު ލިވަޕޫލަށް އެބައޮތެވެ. އަނެއްކޮޅުން، ސިޓީން އަމާޒު ހިފާފައިވަނީ ތިން ތަށި ހޯދުމަށެވެ. އެހެންކަމުން، މިރޭގެ މެޗުން ރަނގަޅު ނަތީޖާއެއް ހޯދުމަކީ ދެ ޓީމަށް ވެސް ވަރަށް މުހިންމު ކަމެކެވެ.
އިނގިރޭސި ލީގުގައި ލިވަޕޫލުން ސިޓީގެ ދަނޑުގައި އެންމެ ފަހުން މޮޅުވީ 2015 ވަނަ އަހަރެވެ. އެހެން ނަމަވެސް، މިރޭގެ މެޗަށް ކުރިމަތިލާޢިރު، ލިވަޕޫލުން ވަނީ ލީގުގައި ޖެހިޖެހިގެން 10 މެޗުން މޮޅުވެފަ އެވެ.
މެޗުގެ ކުރިން ވާހަކަ ދައްކަމުން ލިވަޕޫލްގެ ކޯޗު ޔާގެން ކްލޮޕް ބުނީ މިރޭގެ މެޗުން ކޮންމެ ޓީމެއް މޮޅުވިޔަސް، މިއީ ލީގު ޗެމްޕިއަންކަން ކަނޑާއެޅޭނެ މެޗެއް ނޫން ކަމަށެވެ.
"ސިޓީ އާއި ލިވަޕޫލްގެ ވާދަވެރިކަމުގެ ތެރެއިން، ދެ ޓީމަށް ވެސް ކުރިއެރުންތައް ލިބިއްޖެ،" ކްލޮޕް ބުންޏެވެ. "ސިޓީ އަކީ އަހަރެމެން ޓީމެއްގެ ގޮތުގައި ޑިވެލޮޕްވާން ވާދަވެރިއެއްގެ ގޮތުގައި ހިތްވަރުދިން ޓީމު، އަހަރެމެންގެ މި ރޭހުގައި ކުޅުންތެރިން ވެސް ކުރިއަރައިފި،"
ކްލޮޕް ވަނީ ސިޓީގެ ކޯޗު ގާޑިއޯލާ އަކީ އެންމެ މޮޅު ކޯޗުކަމަށާއި އެ އަށް ދެބަސްވާނެ މީހުން މަދުވާނެ ކަމަށް ބުނެފަ އެވެ. އެކަމަކު، ބޮޑު މެޗެއްގެ ކުރިން ކްލޮޕް އެ ވާހަކަ ބުނުމުން ގާޑިއޯލާ އެ ކަމަށް މާ ބޮޑު ސަމާލުކަމެއް ނުދެ އެވެ.
ކުރިން ބާސެލޯނާ އާއި ބަޔާން މިއުނިކަށް ކޯޗުކޮށްދިން ގާޑިއޯލާ ބުނީ އޭނާގެ ކެރިއަރުގައި ވެސް ފެނުނު އެންމެ ވާދަވެރި ޓީމަކީ ލިވަޕޫލް ކަމަށެވެ.
"މި ފަސް އަހަރުގެ ތެރޭގައި ސިޓީއާ އެންމެ ވާދަވެރި ކްލަބަކީ ލިވަޕޫލް. ވަރަށް ރަނގަޅު ވާދައެއް އެ ޓީމުން ސިޓީއާ ކުރޭ. ލިވަޕޫލުން ކުރާ މަސައްކަތް އަހަންނަށް ވަރަށް ކަމުދޭ. އަދި އެ ކްލަބުން ދޭ ޗެލެންޖް ވެސް ރަނގަޅު،" ގާޑިއޯލާ ބުންޏެވެ.
މިރޭގެ މެޗުން ސިޓީ މޮޅުވެއްޖެ ނަމަ، ލީގު ހޯދުމަށް އެ ޓީމުން ކުރަމުންދާ މަސައްކަތަށް އިތުރު ބާރެއް ލިބޭނެ އެވެ. އެކަމަކު ކްލޮޕްގެ ހިޔާލާ އެއްގޮތަށް، ގާޑިއޯލާ ވެސް ބުނީ މިރޭގެ މެޗުން ކޮންމެ ޓީމެއް މޮޅުވިޔަސް، ލީގު ޗެމްޕިއަން ކަމާ މެދު ގޮތެއް ކަނޑަނޭޅޭނެ ކަމަށެވެ.
"މެޗުން މޮޅުވެއްޖެ ނަަމަ އެއީ ވަރަށް މުހިންމު ތިން ޕޮއިންޓް. އެކަމަކު ބާކީ ހަތް މެޗު އޮތްކަން ހަނދާންކުރަންޖެހޭ. ބާކީ އޮތް މެޗުތަކުން ކޮންމެ ފަދަ ނަތީޖާއެއް ވެސް ނުކުމެދާނެ،" ގާޑިއޯލާ ބުންޏެވެ.
އެފްއޭ ކަޕްގެ ސެމީ ފައިނަލްގައި މި މަހުގެ 16 ވަނަ ދުވަހު ވެސް މި ދެ ޓީމު ކުރިމަތިލާނެ އެވެ. މީގެ އިތުރުން ޗެމްޕިއަންސް ލީގުގެ ފައިނަލްގައި ވެސް މި ދެ ޓީމު ކުރިމަތިލުމުގެ ފުރުސަތު އަދި އެބައޮތެވެ.
ސިޓީއާ ދެކޮޅަށް އެންމެ ފަހުން ލީގުގައި ލިވަޕޫލް ކުޅުނު ހަތަރު މެޗުން ވެސް މޮޅެއް ނުލިބެ އެވެ. އަދި ލިވަޕޫލުން ސިޓީ ދަނޑުގައި އެންމެ ފަހުން ކުޅުނު 11 މެޗުގައި ވެސް ކޮޅަށް ގޯލު ވަދެފައިވެ އެވެ. ކްލޮޕާއި ގާޑިއޯލާ ވަނީ މީގެ ކުރިން 22 ފަހަރު ކުރިމަތިލައިފަ އެވެ. ގާޑިއޯލާ އާއި ކްލޮޕަށް އަށް މޮޅު ލިބިފައިވާއިރު، ހަ މެޗު ނިމުނީ އެއްވަރުވެގެންނެެވެ.
ސިޓީގެ އިއްތިހާދު ސްޓޭޑިއަމްގައި މިރޭ ލިވަޕޫލާ ބައްދަލުކުރާ މެޗު ފަށާނީ ރާއްޖެ ގަޑިން މިރޭ 20:30ގަ އެވެ. -- އޭއެފްޕީ
