ކިންގްސް ބާސްކެޓްބޯޅަ ކްލަބް އުފެދުނީއްސުރެ އެ ކްލަބްގައި މުހިންމު ދައުރެއް އަދާކުރި އަހުމަދު ފިރާޝް (ފިރާ) ޓީރެކްސް ބީސީ އަށް ބަދަލުވިއިރު، ސްޓިންގާސް ބާސްކެޓްބޯލް ކްލަބް އިން ފާހަގަވި އަހުމަދު ސަބީހު ތައުފީގު އަދި އަހުމަދު އަލީ މުސްތަފާ (ބޮމްބެ) ކިންގްސް އަށް ސޮއިކޮށްފި އެވެ.
މި އަހަރުގެ ކުރީކޮޅު ބޭއްވި ގައުމީ މުބާރާތާއި ގަައުމީ ލީގަށް ފަހު ބާސްކެޓްބޯޅައިގެ ބޮޑެތި ކުލަބުތަކުން އަންނަނީ ޓީމުތައް ވަރުގަދަ ކުރުމުގެ މަސައްކަތް ކުރަމުންނެވެ. އެ ގޮތުން އެންމެ ބޮޑަށް ފާހަގަވަނީ ލީގާއި ގައުމީ މުބާރާތުގައި ނާކާމިޔާބީ އާއި ކުރިމަތިލާން ޖެހުނު ޓީރެކްސް އެވެ. އެ ޓީމުން އަންނަނީ ޓީމު ވަރުގަދަ ކުރުމަށް ރަނގަޅު ކުޅުންތެރިންތަކެއް އެ ޓީމަށް ގެންނަމުންނެވެ.
ޓީރެކްސް އަށް އެންމެ ފަހުން ސޮއިކުރި ކުޅުންތެރިއަކީ ކިންގްސް 2017 ގައި އުފެދުނު ފަހުން ވެސް އެ ޓީމަށް ކުޅުނު ފިރާ އެވެ. ފިރާ އަކީ ކިންގްސްގެ ކުރީގެ ކެޕްޓަނެވެ. އަނިޔާގެ ސަބަބުން މި ސީޒަންގެ ފުރަތަމަ ދެ މުބާރާތުގައި އޭނާ އަށް މާ ގިނަ މެޗުތަކެއް ނުކުޅެވެ އެވެ.
ފިރާ އަކީ މިދިޔަ ދެ ހަފުތާގެ ތެރޭ ޗެމްޕިއަން ކިންގްސް ދޫކޮށް ވާދަވެރި ޓީރެކްސް އަށް ބަދަލުވި ތިން ވަނަ ކުޅުންތެރިޔާ އެވެ. މީގެ ކުރިން ކިންގްސްގެ އިބްރާހިމް އަންފާލް (އަންޓޭ) އަދި މުހައްމަދު ހުވައިލިދު (ހުވޭ) ވެސް ވަނީ ޓީރެކްސް އަށް ސޮއިކޮށްފަ އެވެ.
މި ތިން ކުޅުންތެރިންގެ އިތުރުން އުއްމީދީ ދެ ކުޅުންތެރިންކަމަށްވާ ހުސައިން ނަދީމް އާއި ހައިޝަމް ދާއޫދު ވަނީ ޓީރެކްސް އަށް ބަދަލުވެފަ އެވެ.
ސްޓިންގާސް ދޫކޮށް ސަބީ އާއި ބޮމްބެ ކިންގްސް އަށް
ކިންގްސް ދޫކޮށް ދިޔަ ކުޅުންތެރިންގެ ބަދަލުގައި އެޓީމަށް ގެނައި އެންމެ ފާހަގަކޮށްލެވޭ ދެ ކުޅުންތެރިންނަކީ ސްޓިންގާސްގެ އަހުމަދު ސަބީހު ތައުފީގު (ސަބީ) އާއި އަހުމަދު އަލީ މުސްތަފާ (ބޮމްބެ) އެވެ.
މި ދެކުޅުންތެރިންގެ ތެރެއިން ސަބީ އަކީ މިދިޔަ ހަތަރު އަހަރަށް ބަލާއިރު ޒުވާން ކުޅުންތެރިންގެ ތެރެއިން އެންމެ ބޮޑު ކުރިއެރުމެއް ހޯދި ކުޅުންތެރިޔާ އެވެ. ސީނިއާ ގައުމީ ޓީމުންވެސް ޖާގަ ހޯދާފައި ސަބީ އަކީ ސްޕީޑް ބާރު، މަސައްކަތު ރޭޓު އެހާމެ، ރަނގަޅު ޕޮއިންޓް ގާޑެކެވެ. ސަބީގެ ފަސްޓް ޑިވިޝަން ކެރިއަރުގެ ހުރިހާ އަހަރުތަކެއް އޭނާ ހޭދަކުރީ ސްޓިންގާސް ބީސީގަ އެވެ.
ސްޓިންގާސް ދޫކޮށްލި އަނެއް ކުޅުންތެރިޔާ ބޮމްބެ އަކީ ގައުމީ ޓީމަށް ވެސް މީގެ ކުރިން އެތައް ފަހަރަކު ކުޅެފައިވާ ކުޅުންތެރިއެކެވެ. އޭނާއަކީ 2016ގެ ސާބާ މުބާރާތުގެ ރިހި މެޑަލް ހޯދި ޓީމުގައި ހިމެނުނު ކުޅުންތެރިއެކެވެ.
ސީޒަންގެ ބާކީ ހުރި މުބާރާތްތަކަށް ޓީމުތައް ވަރުގަދަ ކުރުމުގެ މަސައްކަތްކުރަމުން އަންނައިރު، ބޮޑެތި ކުލަބުތަކުން ވަނީ ޒުވާން ކުޅުންތެރިން ބިނާ ކުރުމަށް އެ ކުލަބުގެ ދަށުން ޒުވާން ކުޅުންތެރިން ހިމަނައިން ކުލަބުތައްވެސް ހިންގަމުންނެވެ.
