ލަންޑަން (އޭޕްރީލް 7) - ޔޫރޮޕާ ލީގުގެ ކުއާޓާ ފައިނަލް ފުރަތަމަ ލެގުގައި މިރޭ ބާސެލޯނާ އާއި އެއިންޓްރަކްޓް ފްރޭންކްފާޓް 1-1 އިން އެއްވަރުވިއިރު، އެއް ކުޅުންތެރިއަކު މަދުކޮށް މެޗުގެ ބޮޑުބައި ކުޅުނު ވެސްޓް ހޭމް ޔުނައިޓެޑާއި ލިޔޯން ކުޅުނު ކުއާޓާ ފައިނަލް މެޗު ވެސް 1-1 އިން އެއްވަރުވެއްޖެ އެވެ.
ޖަރުމަނުގެ ފްރޭންކްފާޓް ދަނޑުގައި މިރޭ ކުޅުނު މެޗުގައި ބާސެލޯނާ އަށް ފުރަތަމަ ހާފުގައި މާ ރަނގަޅަށް ފުރުސަތުތަކުގެ ބޭނުން ނުހިފުނެވެ. ދެ ވަނަ ހާފްގެ ކުޅުން ފަށައިގެން ތިން ވަނަ މިނިޓްގައި ފްރޭންކްފާޓްގެ އަންސްގާ ކްނައޮފް ވަނީ މޮޅު ގޯލެއް ޖަހައި އެ ޓީމަށް ލީޑުނަަގައިދީފަ އެވެ. މެޗުގެ 48 ވަނަ މިނިޓްގައި ކްނައޮފް އޭރިއާބޭރުން ޖެހި ބޯޅަ ބާސެލޯނާ ކީޕަރު ޓާ ސްޓެގެން އަތްމަތިން ގޮސް އަމާޒުވީ ގޯލުގެ މަތީ ކަނަށެވެ.
ނަތީޖާ ހަމަހަމަކުރަން ބާސެލޯނާ އިން ކުރި މަސައްކަތް މާގިނައިރެއްނުވެ ކާމިޔާބުކުރި އެވެ. މެޗުގެ 66 ވަނަ މިނިޓްގައި މި ގޯލު ޖެހީ ފެރާން ޓޮރޭޒް އެވެ. ބާސެލޯނާ އިން މެދުތެރެއިން ކުޅުނު ރަނގަޅު ކުޅުމަކަށް ފަހު ފްރެންކީ ޑި ޔޯން ޖައްސާލި ބޯޅަ ފެރާން ވަނީ ހަމަޖެހިލާފައި ތިރީ ކަނަށް އަމާޒުކޮށްލައިފަ އެވެ.
ދެ ވަނަ ހާފްގައި ހޯދި ދެ ވަނަ ރީނދޫ ކާޑާ އެކު ފްރޭންކްފާޓްގެ ޓޫޓާ އަށް މެޗުގެ 78 ވަނަ މިނިޓްގައި ރަތް ކާޑެއް ދެއްކި އެވެ. އިތުރު ވަގުތު ހިމެނޭ ގޮތަށް މެޗުގެ ފަހު 15 ވަރަކަށް މިނިޓް އެއް ކުޅުންތެރިއަކު މަދުކޮށް ކުޅެެގެން ވެސް ފްރޭންކްފާޓް ވަނީ ބާސެލޯނާއާ އެއްވަރުކޮށްފަ އެވެ. މި ނަތީޖާއާ އެކު ނިމުމުން އަންނަ ހަފްތާގައި ބާސެލޯނާ ދަނޑުގައި ކޮންމެ ޓީމެއް މޮޅުވި ކަމުގައި ވިޔަސް ސެމީގެ ފުރުސަތު ލިބޭނެ އެވެ.
ވެސްޓް ހޭމްގެ ބޮވެން (ވ) ލިޔޯންގެ ޕަކޭޓާ ކައިިރން ބޯޅަ ހިފައިގެންދެވޭތޯ މަސައްކަތްކުރަނީ.--- ފޮޓޯ: އޭއެފްޕީ
ލަންޑަން ސްޓޭޑިއަމްގައި މިރޭ ކުޅުނު މެޗުގައި ވެސްޓް ހޭމުން ރޭވި ގޮތަށް ކުރިއަށްދާން މައްސަލަ ދިމާވީ އެ ޓީމުގެ އާރޮން ކްރެސްވެލް އަށް ފުރަތަމަ ހާފުގެ އިތުރު ވަގުތުގައި ސީދާ ރަތް ކާޑެއް ދެއްކުމުންނެވެ. ލިޔޯންގެ މޫސާ ޑެމްބެލޭ ހުސްކޮށް ބޯޅަ ހިފައިގެންދިޔަ ވަގުތެއްގައި ހުރަސްއެޅި ކަމަށް ބަލައި ކްރެސްވެލް އަށް ދެއްކީ ސީދާ ރަތެކެވެ. މިއީ ޔޫރަޕްގެ ރަސްމީ މުބާރާތެއްގައި ވެސްޓް ހޭމް ކުޅުންތެރިއަކަށް ދެއްކި ފުރަތަމަ ރަތް ކާޑެވެ.
އެއް ކުޅުންތެރިއަކު މަދުކޮށް ދެ ވަނަ ހާފްގައި ކުޅެން ޖެހުނު ނަމަވެސް ފުރަތަމަ ލީޑުނެގީ ވެސްޓް ހޭމް އިންނެވެ. ލިޔޯންގެ ޑިފެންޑަރު ޖެރޯމް ބޯޓެން ހެދި ގޯހެއްގެ ފައިދާނަަގައި ވެސްޓް ހޭމްގެ މި ގޯލު ޖެހީ މި ސީޒަނުގައި ތަފާތު ފޯމެއްގައި ހުރި ޖެރޮޑް ބޮވެން އެވެ.
މެޗުގެ 66 ވަަނަ މިނިޓްގައި ލިޔޯނުން އެއްވަރުކުރީ ޓޮޓެންހަމްގެ ލޯން އެއްބަސްވުމެއްގެ ދަށުން ކުޅެމުން އަންނަ ޓަންގީ އެންޑޮމްބެލޭ އެވެ. ލިޔޯންގެ ވިންގް، ޓެޓޭ ކުޅެން އެރިތާ ކުޑައިރުކޮޅެއްގެ ތެރޭގައި ޖެހި ބޯޅައެއް ވެސްޓް ހޭމް ކީޕަރު ލޫކަސް ފަބިއާންސްކީ އަތުގައި ޖެހިފައި ނުކުތް ވަގުތު އެންޑޮމްބެލޭ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
އަންނަ ހަފްތާގެ ބުރާސްފަތި ދުވަހުގެރޭ ލިޔޯން ދަނޑުގައި ކޮންމެ ޓީމެއް މޮޅުވި ކަމުގައި ވިޔަސް ސެމީން ޖާގަ ލިބޭނެ އެވެ.
ޔޫރޮޕާ ލީގުގައި މިރޭ ކުޅުނު ކުއާޓާ ފައިނަލް އަނެއް ދެ މެޗުގެ ނަތީޖާ އަށް ބަލާއިރު، އަބެލް ރުއީޒްގެ ގޯލުން ޕޯޗުގަލްގެ ބްރާގާ އިން ވަނީ ސްކޮޓްލެންޑްގެ ރޭންޖާސް 1-0 އިން ބަލިކޮށްފަ އެވެ. އެޓަލަންޓާގެ ލުއިސް މުރިއެލް ލީޑުނަގައިދީފައި ވަނިކޮށް އާރްބީ ލައިޕްޒިގުން 1-1 އިން އެއްވަރުކުރީ އެޓަލަންޓާގެ ޑަވިޑޭ ޒަޕަކޯސްޓާ އަތުން ބައިކޮޅަށް ވަން ގޯލުންނެވެ. މި މެޗުގައި ލައިޕްޒިގުގެ އަންޑްރޭ ސިލްވާ ފޮނުވާލި ޕެނަލްޓީ ވަނީ ނާކާމިޔާބުވެފަ އެވެ.
