ޕޫނޭ (އޭޕްރީލް 7) - އިންޑިއަން ޕްރިމިއާ ލީގު (އައިޕީއެލް) ގައި ޕެޓް ކަމިންސް ރޭ ހެދި ރެކޯޑާ އެކު މުމްބާއީ އިންޑިއަން އަތުން ކޮލްކަތާ ނައިޓް ރައިޑާސް މޮޅުވެއްޖެ އެވެ.
ކަމިންސް ވަނީ ރޭގެ މެޗުގައި އައިޕީއެލް ތާރީހުގައި އެންމެ އަވަހަށް ހާފް ސެންޗަރީ ހެދި ކުޅުންތެރިޔާގެ ރެކޯޑް ހަދައިފަ އެވެ.
ދުނިޔޭގެ އެންމެ އަގުބޮޑު ކްރިކެޓް ލީގުގެ ކަމަށްވާ އައިޕީއެލްގައި ރޭ ކުޅުނު މެޗުން މޮޅުވެ ކޮލްކަތާ ނައިޓް ރައިޑާސް ވަނީ ތާވަލްގެ އެއް ވަނަ އަށް ޖެހިލައިފަ އެވެ. އެއީ ކުޅުނު ހަތަރު މެޗުގެ ތެރެއިން ތިން މެޗު ކާމިޔާބުކޮށް ހަ ޕޮއިންޓް ހޯދައިގެންނެވެ. ކޮލްކަތާ އަތުން ބަލިވެ، މުބާރާތުގެ އެންމެ ކާމިޔާބު ޓީމު މުމްބާއީ އިންޑިއަންސް އޮތީ ތާވަލްގެ ފުލުން ދެ ވަނައިގަ އެވެ. އެ ޓީމު މިހާތަނަށް ކުޅުނު ތިން މެޗުން ވެސް ވަނީ ބަލިވެފަ އެވެ.
ރޭ ކުޅުނު ފޯރިގަދަ މެޗުގެ ޓޮސް ދިމާވުމުން ކޮލްކަތާ އިން ނިންމީ މުމްބާއީ އަށް ފުރަތަމަ ބެޓްކުރަން ފުރުސަތުދޭށެވެ. އެ ގޮތުން މުމްބާއީ ކުޅެން އަރައި 20 އޯވަރުގައި 4 ކުޅުންތެރިން ނުބައިވެގެން ހެދުނީ 161 ލަނޑެވެ. މުމްބާއީގެ ފެށުން މި އިނިންގްސްގައި ދިޔައީ ގޯސްކޮށެވެ. ތިން ވަނަ އޯވަރުގައި ކެޕްޓަން ރޯހިތު ޝަރުމާ ނުބައިވިއިރު، މި ދިޔަ ދެ މެޗުގައި ރަނގަޅު ކުޅުމެއް ދެއްކި އިޝާން ކިޝަން އަށް ވެސް ހެދުނީ އެންމެ 14 ލަނޑެވެ. ފަހު ދިހަ އޯވަރުގައި އެ ޓީމުން ރަނގަޅު ކުޅުމެއް ދެއްކި އެވެ. އެ ގޮތުން ސޫރްޔަކުމާރު ޔާދަވް 36 ބޯޅައިން 52 ލަނޑު ހެދިއިރު، ތިލަކް ވަރުމާ ވަނީ 27 ބޯޅައިން 28 ލަނޑު ހަދައިފަ އެވެ. އެންމެ ފަހުން ކުޅެން ނުކުތް ކެއިރެން ޕޮލާޑް ފަހު އޯވަރުގައި 5 ބޯޅައިން ހެދި 22 ލަނޑުވެސް ފާހަގަކޮށްލެވެ އެވެ.
މި އިނިންގްސްގައި ކޮލްކަތާ ޓީމުން އެންމެ ރަނގަޅަށް އުކީ ހަތަރު އޯވަރުގައި 49 ލަނޑަށް ދެ ވިކެޓު ނެގި ޕެޓް ކަމިންސް އެވެ. މި މުބާރާތުގައި މިހާތަނަށް އެންމެ ގިނަ ވިކެޓު ނެގި އުމޭޝް ޔާދަވް ވަނީ މި މެޗުގައިވެސް ހަތަރު އޯވަރުގައި އެއް ވިކެޓު ނަގާފަ އެވެ.
ކޮލްކަތާއިން ކުޅެން ނިކުމެ ބޭނުންވި ވަރުގެ ކުޅުމެއް ކުރީކޮޅު ނުދެއްކުނެވެ. ފުރަތަމަ 10 އޯވަރުގައި މުހިންމު 3 ކުޅުންތެރިން ނުބައިވިއިރު، 67 ލަނޑު ހެދި އެވެ. އެ ޓީމަށް މެޗުން މޮޅުވުމުގެ އުއްމީދު ދަމަހައްޓައިދިނީ މި އިނިންގްސްގައި 50 ލަނޑު ހެދި ވެންކަޓޭޝް އައްޔަރެވެ. ސާދަ ވަނަ އޯވަރުގައި އެ ޓީމުގެ އޯލްރައުންޑަރު އަންދްރޭ ރަސެލް ނުބައިވެ ފަސް ވަނަ ވިކެޓު ގެއްލުމާ އެކު މުމްބާއީ އިންޑިއަންސް މި މެޗުން މޮޅުވެދާނެ ކަމަށް ބެލެވުނެވެ. ނަމަވެސް ދެން ކުޅެން ނުކުތް ޕެޓް ކަމިންސް ވަނީ އެންމެން ހައިރާން ކޮށްލައި މުޅި މެޗު އަނބުރާލައިފަ އެވެ.
ބެޓް ކުރުމުގައި ކުރިން ފާހަގަނުވި ނަމަވެސް މި މެޗުގައި ކަމިންސް ދެއްކި ކުޅުމާ އެކު އެންމެން ތިބީ ހައިރާންވެފަ އެވެ. އެންމެ 14 ބޯޅައިން 50 ލަނޑު ހަމަކޮށް އައިޕީއެލް ތާރީހުގެ އެންމެ އަވަސް ހާފް ސެންޗަރީ ހަދާފައިވާ ލޮކޭޝް ރާހުލްގެ ރެކޯޑާއި ހަމަކޮށްފަ އެވެ. ލޮކޭޝް ރާހުލް މި ރެކޯޑު ހެދީ 2014 ވަނަ އަހަރުގެ އައިޕީއެލްގައި ޑެލީ ކެޕީޓަލްސްއާ ދެކޮޅަށް ކުޅުނު މެޗުގަ އެވެ. ކަމިންސް ކޮލްކަތާ މޮޅުކޮށްދިނީ 30 ބޯޅައިން 35 ލަނޑު ހަދަން އޮއްވަ އެވެ. 16 ވަނަ އޯވަރުގައި އެކަނި 36 ލަނޑު ހަދައި ކަމިންސް ކޮލްކަތާ މި މެޗުން މޮޅުކޮށްދިނެވެ.
މި އިނިންގްސްގައި މުމްބާއީގެ މުރުގަން އަޝްވިން 3 އޯވަރުގައި 25 ލަނޑަށް 2 ވިކެޓު ނެގިއިރު، ޓައިމަލް މިލްސް ވެސް ވަނީ 3 އޯވަރުގައި 38 ލަނޑަށް 2 ވިކެޓު ނަގައިފަ އެވެ.
އިންޑިއަން ޕްރިމިއާ ލީގުގައި މިރޭ ކުޅޭ މެޗުގައި ވާދަކުރާނީ އައިޕީއެލްގައި އަލަށް ކުޅެމުން އަންނަ ލަކްނޯ ސުޕަ ޖަޔަންޓްސް އާއި ޑެލީ ކެޕިޓަލްސް އެވެ. އައިޕީއެލްގެ ދެ މެޗު ހޮނިހިރު އަދި އާދިއްތަ ކުޅެ އެވެ. ހަފްތާގެ ބާކީ ހުރި ހުރިހާ ދުވަހަކު ކުޅެނީ ދުވާލަކު މެޗެކެވެ. މުބާރާތުގެ ލީގު ބުރުގެ ފަހު މެޗު ކުޅޭނީ އަންނަ މަހު 22 ގަ އެވެ.
