މައިލޯ އެފްއޭއެމް ވެޓެރަންސް ލީގު 2022 ގައި މިއަދު ހަވީރު ކުޅުނު މެޗުން ދިވެހި ސިފައިންގެ ކްލަބް 1-0 އިން ބަލިކޮށް ދަ ގްރާންޑޭ ސްޕޯޓްސް ކްލަބުން މުބާރާތުގައި ފުރަތަމަ މޮޅު ހޯދައިފި އެވެ.
މިއީ ދަ ގްރާންޑޭ އިން ވެޓެރަންސް މުބާރާތެއްގައި ބައިވެރިވި ފުރަތަމަ ފަހަރެވެ. މި ފަހަރުގެ ސީޒަނަށް ދަ ގްރާންޑޭގެ މެނޭޖްމަންޓްގެ ކަންކަން ބަދަލުވީ ކ. މާފުށްޓާ ގުޅިގެން ގިނަ ކަންކަން ކުރިއަށްގެންދެވޭތޯ އެވެ. އެ ގޮތުން ވެޓެރަންސް މުބާރާތުގައި ބައިވެރިވިއިރު، ދާދި ފަހުން ނިމުނު 19 އަހަރުން ދަށުގެ ޔޫތު ޗެމްޕިއަންޝިޕްގައި ވެސް ވަނީ ކުޅެފަ އެވެ.
ޓާފް އެއް ނަމްބަރު ދަނޑުގައި މިއަދު ކުޅުނު މެޗުގައި ދަ ގްރާންޑޭ އަށް ލީޑުނަގައިދޭން އެ ޓީމުގެ ފަހަތަށް ކުޅޭ އިބްރާހިމް ސާމިރު ޖެހި ބޯޅަ އަމާޒުވީ ގޯލުގެ ދަނޑިއަށެވެ. އޭގެ ކުރިން އެ ޓީމުގެ ޝުއައިބު ޒާހިރަށް ލިބުނު ފުރުސަތުން ޖެހި ބޯޅަ ދިޔައީ ހުރަސްދަނޑިމަތިންނެވެ. ފުރަތަމަ ހާފުގައި ސިފައިންގެ ޓީމުގެ މުހައްމަދު ރަމީޒް ޖެހި ބޯޅައެއް ދަ ގްރާންޑޭގެ ކީޕަރު ލުއައްޔު އާދަމް ވަނީ މަތަކުރި އެވެ.
ދެ ވަނަ ހާފް ފަށައިގެން ދަ ގްރާންޑޭގެ އިބްރާހިމް ޝަރީފް ޖެހި ބޯޅަ ސިފައިންގެ ޓީމު ކީޕަރު އިބްރާހިމް ރަޝީދު ވަނީ މަތަކޮށްފަ އެވެ. އޭގެ ފަހުން ދަ ގްރާންޑޭގެ ހަސަން ޝަރީފް ޖެހި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ.
ދަ ގްރާންޑޭ އާއި ދިވެހި ސިފައިންގެ ކްލަބް ބައްދަލުކުރި މެޗުގެ ތެރެއިން.-- ފޮޓޯ: މުހައްމަދު ޝާބިން/ އަދަދު
މެޗުން ދަ ގްރާންޑޭ މޮޅުވި ގޯލު ޖެހީ ދެ ވަނަ ހާފްގެ ފަހު ކޮޅުގައި ޕެނަލްޓީ އަކުން ހަަސަން އެވެ. މިއީ މެޗުގެ 56 ވަނަ މިނިޓްގައި ހަސަން ޖެހި ބޯޅައެއް ދިފާއުކުރަން އުޅުމުގެ ތެރޭގައި ދިވެހި ސިފައިންގެ ކްލަބްގެ ކުޅުންތެރިއަކު އަތުގައި ބޯޅައިން ޖެހުމުން ރެފްރީ ނިންމީ ޕެނަލްޓީ ދޭށެވެ. މެޗުގެ މޮޅު ކުޅުންތެރިއަކަށް ހޮވުނު ހަަސަން ޖެހި ޕެނަލްޓީ ގޯލަށް ވަނީ ސިފައިންގެ ޓީމު ކީޕަރު އިބްރާހިމް އަތުގައި ޖެހިފަ އެވެ.
އިތުރު ގޯލެއް ޖަހަން ވެސް ދަ ގްރާންޑޭ އަށް ފުރުސަތު ލިބުނެވެ. ހަސަން ދިން ބޯޅައަކުން އޭރިއާތެެރެއިން ދަ ގްރާންޑޭގެ އިލްޔާސް އިބްރާހިމް ޖެހި ބޯޅަ އަމާޒުވީ ގޯލުގެ ހުރަސްދަނޑިއަށެވެ.
ރަމަޟާން މަހު ކުރީގެ ކުޅުންތެރިންނަށް ހާއްސަކޮށްގެން ކުރިއަށް ގެންދާ ވެޓެރަންސް ކަޕް މި ފަހަރު މި ބާއްވަނީ ތިން އަހަރުގެ މެދުކެނޑުމަކަށް ފަހު އެވެ. އެފްއޭއެމާ ގުޅިގެން މި ފަހަރުގެ މުބާރާތް .އިންތިޒާމް ކުރަނީ ކްލަބް އިވެންޓްސް އިންނެވެ. މި ފަހަރުގެ މުބާރާތުގެ ގަވާއިދުގައިވާ ގޮތުން ކޮންމެ ޓީމު ލިސްޓެއްގައި ވެސް 35 އަހަރުން މަތީގެ ދެ ކުޅުންތެރިއަކު ހިމެނޭނެ އެވެ. އަދި ބާކީ ކުޅުންތެރިން ވާން ޖެހޭނީ 40 އަހަރުން މަތީގެ ކުޅުންތެރިންނަށެވެ. މީގެ އިތުރުން 2019 ވަނަ އަހަރުން ފެށިގެން ނިމިދިޔަ މުއްދަތުގައި އެފްއޭއެމުން ބޭއްވި ރަސްމީ އެއްވެސް މުބާރާތެއްގައި ބައިވެރިވި ކުޅުންތެރިއަކަށް ވެޓްރަންސް މުބާރާތުގައި ނުކުޅެވޭނެ އެވެ.
މުބާރާތް ރޭވިފައިވަނީ ހަތް ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ހޮވޭ ގޮތަށެވެ. ހުކުރު ދުވަސްތަކުގައި މެޗު ނުކުޅޭ ގޮތަށް ތާވަލުކޮށްފައިވާ މި މުބާރާތުގެ ފައިނަލް މެޗު އޮންނާނީ މި މަހު 30 ގަ އެެވެ. މުބާރާތުގައި މާދަމާ ހަވީރު ކުޅޭ މެޗުގައި ޕޮލިސް ކްލަބް ނުކުންނާނީ މޯލްޑިވްސް ސޮކަ މޭޓްސްއާ ދެކޮޅަށެވެ. މެޗު ފަށާނީ 16:30 ގަ އެވެ.
