ބާލިން (އޭޕްރީލް 5) - ޖަރުމަނު ލީގުގައި ހޮނިހިރު ދުވަހު ފްރެއިބާގް އަތުން 4-1 އިން ބަޔާން މިއުނިކް މޮޅުވި މެޗުގައި، ބަޔާންގެ 12 ކުޅުންތެރިން ދަނޑުމަތީގައި ތިބި މައްސަލަ ބެލުމަށް ފްރެއިބާގް އިން ހުށަހަޅައިފި އެވެ.
ފްރެއިބާގްގެ ދަނޑުގައި ހޮނިހިރު ދުވަހު ކުޅުނު މެޗުގެ 86 ވަނަ މިނިޓުގައި ނިކްލަސް ސޫލާ އާއި މާސެލް ސަބިޓްޒާ ބަދަލު ކުޅުންތެރިންގެ ގޮތުގައި އެރިއިރު، ދަނޑުން ފޭބީ އެންމެ ކުޅުންތެރިއެކެވެ. އެހެންވެ، 17 ސިކުންތަށް ބަޔާންގެ 12 ކުޅުންތެރިން ދަނޑުމަތީގައި ތިއްބެވެ.
ފްރެއިބާގް އިން ނެރުނު ބަޔާނެއްގައި ބުނީ މެޗުގެ ސައްހަކަމާމެދު ސުވާލު އުފެދޭތީ، އެ މެޗުގެ މައްސަލަ ބެލުމަށް އެ ކްލަބުން ހުށަހަޅާފައިވާ ކަމަށެވެ.
"ކުޅުންތެރިން ބަދަލުކުރި ވަގުތު، ހިނގި ކަންތައްތަކުގައި މި ކްލަބުގެ ޒިންމާއެއް ނެތް. އެކަމަކު ލީގުގެ ގަވައިދުތައް ހެދިފައިވާ ގޮތުގެ ސަބަބުން، މި ކްލަބަށް މި ޖެހުނީ މައްސަލަ ބަލައިދިނުމަށް އެދި ހުށަހަޅަން،" ފްރެއިބާގް އިން ބުންޏެވެ.
ޖަރުމަން ލީގުގެ ގަވައިދުގައިވާ ގޮތުގައި، މިފަދަ މައްސަލަތަކުގައި ކުށްވެރިވާ ޓީމު މެޗުން މޮޅިވިޔަސް، މެޗުގެ ނަތީޖާ ބަދަލުކޮށް، އެ މެޗުގެ ތިން ޕޮއިންޓް އިދިކޮޅު ޓީމަށް ދެވޭނެ ކަމަށެވެ.
ބަޔާން ޖަރުމަނު ލީގު ތާވަލްގެ އެއް ވަނައިގައި އޮތީ، ދެ ވަނައިގައި އޮތް ބޮރޫޝިއާ ޑޯޓްމަންޑަށް ވުރެ ނުވަ ޕޮއިންޓް ކުރީގަ އެވެ. ޖެހިޖެހިގެން 10 ވަނަ ފަހަރަށް، ލީގު ޗެމްޕިއަންކަން ބަޔާން ހޯދާނެ ކަމަށް ބެލެވެ އެވެ.
ފްރެއިބާގް އޮތީ ތާވަލުގެ ފަސް ވަނައިގަ އެވެ. ހަތަރު ވަނައިގައި އޮތް އާރްބީ ލައިޕްޒިގާއި ފްރައިބާގާ ދެމެދު އޮތީ ތިން ޕޮއިންޓްގެ ތަފާތެކެވެ. -- އޭއެފްޕީ
