މިލާން (އޭޕްރީލް 5) - އިޓާލިއަން ލީގުގެ އެއް ވަނައިގައި އޮތް އޭސީ މިލާން މިރޭ އަމިއްލަ ދަނޑުގައި ބޮލޯނިއާއާ ލަނޑެއް ނުޖެހި 0-0 އިން އެއްވަރުވެ. މަގާމު ދަމަހައްޓަން އިތުުރު ޕްރެޝަރަކާ ކުރިމަތިލާން ޖެހިއްޖެ އެވެ.
މިރޭގެ ނަތީޖާއާ އެކު މިލާން އެއް ވަނައިގައި އޮތީ އެއް ޕޮއިންޓުގެ ލީޑަކާ އެކު އެވެ. އެއް ވަނައިގައި އޮތް މިލާނާއި ދެ ވަނައިގައި އޮތް ނަޕޯލީން ވަނީ 31 މެޗު ކުޅެފަ އެވެ. މިލާނަށް 67 ޕޮޮއިންޓް ލިބިފައިވާއިރު، ދެ ވަނައިގައި އޮތް ނަޕޯލީގެ އޮތީ 66 ޕޮއިންޓެވެ. އެންމެ ފަހުގެ ޗެމްޕިއަން އިންޓަ މިލާން ތިން ވަނައިގައި އޮތީ 30 މެޗުން 63 ޕޮއިންޓާ އެކު އެވެ. ހަތަރެއްގައި އޮތް ޔުވެންޓަސް އަށް 31 މެޗުން ވަނީ 59 ޕޮއިންޓް ލިބިފަ އެވެ. ފަސް ވަނައިގައި އޮތް ހޯސޭ މޮރީނިއޯގެ ރޯމާ އަށް ވެސް ވަނީ 31 މެޗުން 59 ޕޮއިންޓް ލިބިފަ އެވެ.
އަމިއްލަ ދަނޑުގައި ކުޅުނު މިލާނުން މިރޭ ޖުމްލަ 33 ހަމަލާ އުފެއްދިއިރު، އޭގެއިން ގޯލާ ސީދާކޮށް ފޮނުވާލީ ހަތް ބޯޅަ އެވެ. މިލާނުން 2011 ވަނަ އަހަރުގެ ފަހުން ފުރަތަމަ ފަހަރަށް އިޓާލިއަން ލީގުގެ ޗެމްޕިއަންކަން ހޯދަން މަސައްކަތްކުރާއިރު، މިރޭގެ މެޗުން މޮޅެއް ނުލިބުމަކީ ސީޒަނުގެ ފަހު ހަތް މެޗަށްދާއިރު، އެ ޓީމު ޕްރެޝަރަށް ވެއްޓޭނެ ކަމެކެވެ.
ބޮލޯނިއާ އިން ވަނީ މިރޭ 68،000 ސަޕޯޓަރުންގެ ކުރިމަތީގައި ކުޅުނު މެޗުގައި ގޯލެއް ޖެހުމާ ވެސް ގާތަށް ޖެހިލައިފަ އެވެ. އެ ގޮތުން ބޮލޯނިއާގެ މޫސާ ބަރޯ ފޮނުވާލި ބޯޅަ މިލާންގެ ކީޕަރު މައިކް މައިގްނޯން ވަނީ މަތަކޮށްފަ އެވެ. މިލާނަށް ގޯލެއް ޖަހައިދޭން އޮލިިވިއޭ ޖިރޫޑް ފޮނުވާލި ދެ ހަމަލާއެއް ބޮލޯނިއާ ކީޕަރު ލޫކަސް ސްކޮރުޕްސްކީ ވަނީ މަތަކޮށްފަ އެވެ. ދެ ވަނަ ހާފްގައި މިލާނުގެ ރަަފައެލް ލެއާއޯ ޖެހި ބޯޅައެއް ވެސް ކީޕަރު ސްކޮރުޕްސްކީ ވަނީ މަތަކޮށްފަ އެވެ.
ބަދަލު ކުޅުންތެރިއެއްގެ ގޮތުގައި ކުޅެން އަރައި، ޒްލަޓާން އިބްރަހިމޮވިޗް ވެސް މިލާނަށް ލަނޑެއް ޖަހައިދެވޭތޯ މަސައްކަތްކުރިއިރު، މެޗުގެ އިތުރު ވަގުތުގެ ފަހު މިނިޓްގައި މިލާންގެ ފަހު ހަަމަލާ ފޮނުވާލީ އަންޓޭ ރެބިޗް ބޮލުންނެވެ. އެ ބޯޅަ ވެސް ހުއްޓުވީ މެޗުގައި މޮޅަށް ކުޅުނު ސްކޮރުޕްސްކީ އެވެ.
މިލާންގެ ކޯޗު ސްޓެފާނޯ ޕިއޯލީ. ބުނީ މި މެޗުން މޮޅެއް ނުލިބުނީ ޕްރެޝަރުގައި ކުޅެން ޖެހުނު ކަމަށް ބުނާ ވާހަކަތަކަށް އެއްބަސްވެވެން ނެތް ކަމަށެވެ. އޭނާގެ ނަޒަރުގައި މޮޅެއް ނުހޯދުނީ ލަނޑެއް ޖެހުމުގައި ބޭނުންވާ ނަސީބުގެ އެހީ ވެސް ނެތުމުން ކަމަށް ޕިއޯލީ ވަނީ ފާހަގަކޮށްފަ އެވެ.
