ލަންޑަން (އޭޕްރީލް 5) - އިނގިރޭސި ޕްރިމިއާ ލީގުގައި މިރޭ އާސެނަލް ކުޅުނު މެޗުން ކްރިސްޓަލް ޕެލެސް އަތުން 3-0 އިން ބަލިވެ، ގަދަ ހަތަރެއްގެ ރޭހުގައި ބޮޑު ގެއްލުމަކާ ކުރިމަތިލާން ޖެހިއްޖެ އެވެ.
ބަލިނުވެ ފަރުޖައްސާލައިގެން އަލުން ހަަތަރަކަށް އަރައި، ތިން ވަނައިގައި އޮތް ޗެލްސީއާ ދެ ޕޮއިންޓަށް ގާތްކޮށްލުމުގެ ފުރުސަތު އޮތް އާސެނަލް ބަލިވުމުން އޮތީ ފަސް ވަނައިގަ އެވެ.
މި ވަގުތު ލީގު ތާވަލުގެ ހަތަރެއްގައި އޮތް ޓޮޓެންހަމަށް 30 މެޗުން 54 ޕޮއިންޓް ލިބިފައިވާއިރު، ފަސް ވަނައިގައި އޮތް އާސެނަަލަށް 29 މެޗުން ވަނީ 54 ޕޮއިންޓް ލިބިފަ އެވެ. ޓޮޓެންހަމްގެ 15 ފައިދާ ގޯލުއޮތްއިރު، އާސެނަލަށް ލިބިފައިވަނީ 10 ގޯލެވެ. ހަ ވަނައިގައި އޮތް ވެސްޓް ހޭމް ޔުނައިޓެޑައި ހަތް ވަނައިގައި އޮތް މެންޗެސްޓާ ޔުނައިޓެޑަށް ވަނީ 51 ޕޮއިންޓް ލިބިފަ އެވެ. ވެސްޓް ހޭމް 31 މެޗު ކުޅެފައިވާއިރު، ޔުނައިޓެޑް ކުޅުނީ 30 މެޗެވެ.
އާސެނަލްގެ ކުރީގެ ކެޕްޓަން ޕެޓްރިކް ވިއޭރާގެ ކޯޗުކަމުގައި ކުޅޭ ކްރިސްޓަލް ޕެލެސް އިން މި ސީޒަނުގެ ކުރީކޮޅުގައި އާސެނަލް ދަނޑުގައި ކުޅުނު މެޗުގައި ލީޑުގައި އޮތް ނަމަވެސް ފަހު ވަގުތު ވަނީ އެއްވަރުވެފަ އެވެ. އެކަމަކު، އޭގެ ބަދަލުގައި މިރޭ ކްރިސްޓަލް ޕެލެސްގެ ސެލްހަސްޓް ޕާކް ސްޓޭޑިއަމްގައި ކުޅުނު މެޗުގައި ޕެލެސް އިން ވަނީ ރަނގަޅު ލީޑަކާ އެކު އާސެނަލަށް ފުރުސަތެއް ނުދީ މޮޅުވެފަ އެވެ.
ޕެލެސް އިން މިރޭގެ މެޗުގެ ފުރަތަމަ 25 މިނިޓް ތެރޭ ދެ ގޯލުގެ ލީޑެއްނެގި އެވެ. އެ ގޮތުން މެޗުގެ 16 ވަނަ މިނިޓްގައި ކޮނާ ގެލަގާ ނެގި ހިލޭ ޖެހުމަކުން ޔަކީމް އެންޑަސަން ބޮލުން ޖައްސާލި ބޯޅަ ފުއްމައިގެން އަަރައި، ޖިއަން ކާލޯސް މަޓޭޓާ ވަނީ ބޮލުން ގޯލުގެ ތެރެއަށް ބޯޅަ ފޮނުވާލައިފަ އެވެ. އޭގެ ފަހުން މެޗުގެ 24 ވަނަ މިނިޓްގައި އާސެނަލްގެ ފަހަތުން ހުސްވި ޖާގަ އަކަށް ބަލައި، ރަނގަޅު ވަގުތުގައި ޕެލެސްގެ އެންޑަސަން ދިން ބޯޅަ ކޮންޓްރޯލް ކޮށްލުމަށް ފަހު ޖޯޑަން އަޔޫ ވަނީ ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފުގައި ކުޅުން ރަނގަޅުކޮށް، އާސެނަލްގެ އެމިލް ސްމިތު ރޯވް، ބުކާޔޯ ސަކާ އަދި މާޓިން އޮޑެގާޑަށް ރަނގަޅު ފުރުސަތުތަކެއް ލިބުނެވެ. އެކަމަކު، މީގެއިން އެއްވެސް ބޯޅައެއްގައި ޕެލެސްގެ ކީޕަރު ވިސެންޓޭ ގައީޓާ ކައިރިން ގޯލެއް ވައްދައިނުލެވުނެވެ. މެޗު ނިމެން 15 މިނިޓަށް ވެފައި ހުއްޓައި، ޕެލެސްގެ ފަހު ގޯލު ލިބުނު ޕެނަލްޓީ އަކުން ޖެހީ ވިލްފްރިއެޑް ޒަހާ އެވެ. މިއީ ޒަހާ ހޯދި ޕެނަލްޓީ އެކެވެ.
އެފްއޭ ކަޕްގެ ސެމީ ފައިނަލުން ވެސް ފުރުސަތު ހޯދާފައިވާ ޕެލެސް އިން އެންމެ ފަހުން ހުރިހާ މުބާރާތެއްގައި ކުޅުނު 11 މެޗުގެ ތެރެއިން ބަލިވީ އެންމެ ފަހަރަކު އެވެ. މިރޭގެ މެޗަކީ 2022 ވަނަ އަހަރު ފެށިފަހުން ޕްރިމިއާ ލީގުގައި ޕެލެސް އިން އަމިއްލަ ދަނޑުގައި ހޯދި ފުރަތަމަ މޮޅެވެ.
އާސެނަލްގެ ކޯޗު މިކޭލް އާޓެޓާ ބުނީ އޭނާގެ ޓީމުން ގަދަ ހަތަރެއްގައި ނިންމައި، އަންނަ ސީޒަނުގެ ޗެމްޕިއަންސް ލީގުގައި ކުޅެން މަސައްކަތް ކުރަމުން އަންނައިރު، މި މެޗުގައި ފެނުނީ އެ ލެވަލްގެ ކުޅުމެއް ނޫން ކަމަށެވެ. އަދި މީގެ އޮތް ގޮތަކީ މާފަށް އެދި ކުރިއަށް ހުރި މެޗުތަކުގައި ހާލަތު ރަނގަޅު ކުރުން ކަމަށް އާޓެޓާ ވަނީ ބުނެފަ އެވެ.
