ދިވެހިރާއްޖޭގައި އަންނަ މަހު މަހު ބާއްވާ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕް މާކެޓްކޮށް ޕްރޮމޯޓްކުރުމަށް ޓީޓީ އެސޯސިއޭޝަނުން އަމިއްލަ ކުންފުންޏެއް ކަމަށްވާ ރެޒޫމޯ މޯލްޑިވްސްއާ ހަވާލުކޮށްފި އެވެ.
މި މުބާރާތަކީ ރާއްޖޭގެ ޖޫނިއާ ކުޅުންތެރިންނަށް އަމިއްލަ ގައުމުގައި ކުޅެ ޓީޓީން މެޑަލް ހޯދަން ލިބޭނެ ރަނުގެ ފުރުސަތެކެވެ.
ޓީޓީ އެސޯސިއޭޝަނުގެ ރައީސް އަލީ ރަޝީދު ވިދާޅުވީ މި މުހިއްމު ފުރުސަތުގެ ބޭނުން ހިފަން ޓީޓީ ކުޅުންތެރިން ނުކުންނައިރު އެކަމަށް ހުރިހާ ދިވެހިންގެ ސަޕޯޓް ބޭނުންވާނެ ކަމަށެވެ. ރެޒޫމޯއާ އެކު ހެދި އެއްބަސްވުމާ އެކު އެކަން ހާސިލްކުރެވޭނެ ކަމަށް ވިދާޅުވި އެވެ.
އައިއޯއައިޖީގެ މެޗެއްގެ ތެރެއިން ރަފާ އާއި ދީމާ.-- ފޮޓޯ: މޯލްޑިވްސް އޮލިމްޕިކް ކޮމިޓީ
އެންމެ ފަހުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ރަން މެޑަލް ހޯދި ޓީމުގައި ހިމެނުނު ރާއްޖޭގެ ޓީޓީގައި މި ވަގުތު ތިބި އެންމެ ފުންނާބު އުސް ދެ ތަރިން ކަމަށްވާ ފާތިމަތު ދީމާ އަލީ އާއި އާއިޝަތު ރަފާ ނާޒިމް މި ފަހަރުގެ މުބާރާތުގައި ވާދަކުރާނެ އެވެ. ދެކުނު އޭޝިއާގައި މިވަގުތު ތިބި އެންމެ އުންމީދީ ދެ ކުޅުންތެރިން ރާއްޖޭގައި ތިބުމާ އެކު މި ފަހަރު މެޑަލް ހޯދުމުގެ ފުރުސަތު އެބައޮތެވެ.
ރެޒޫމޯގެ އޮފިޝަލަކު ވިދާޅުވީ ބޭނުންވަނީ މުބާރާތުގެ ފޯރި ދިވެހިންގެ ތެރޭ ގަދަކޮށްލައި އެ ކުޅުންތެރިންނަށް ދިވެހިންގެ ސަޕޯޓް ހޯދައިދިނުން ކަމަށެވެ.
"އަމިއްލަ ގައުމުގައި ކުޅުމުގެ އެޑްވާންޓޭޖް ކުޅުންތެރިންނަށް ލިބެން އޮންނާނީ ދިވެހިން މެޗުތައް ބަލަން ވަދެގެން. އެކަން ފުރިހަމަކުރަން މަސައްކަތްކުރާނަން،" އޭނާ ވިދާޅުވި އެވެ.
އޭނާ ވިދާޅުވީ އެކަން އެންމެ ފުރިހަމައަށް ހާސިލްކުރެވޭނީ ސްޕޮންސަރުންގެ އެހީތެރިކަން ލިބިގެން ކަމަށާއި އެކަމަށް މިހާރު މަސައްކަތްކުރަމުން އަންނަ ކަމަށެވެ.
"ދިވެހި ކުޅުންތެރިން އަމިއްލަ ގައުމުގައި، ގައުމަށް ރީތި ނަން ހޯދައިދޭން މި ނުކުންނަނީ. އެކަމަށް ސްޕޮންސަރުންގެ އެހީ ބޭނުންވާނެ،" އޭނާ ވިދާޅުވި އެވެ.
އަންނަ މަހު 9-11 އަށް ސޯޝަލް ސެންޓަރުގައި ބާއްވާ މުބާރާތުގައި ރާއްޖޭގެ އިތުރުން އިންޑިއާ އާއި ސްރީ ލަންކާ އާއި ނޭޕާލާއި ބޫޓާނާއި ބަންގްލަދޭޝް އާއި ޕާކިސްތާން ބައިވެރިވެ އެވެ.
ސައުތު އޭޝިއާ ޖޫނިއާ މުބާރާތް އެންމެ ފުރަތަމަ ރާއްޖޭގައި ބާއްވަން ލިބުނީ މިދިޔަ އަހަރު އެވެ. އެކަމަކު، ކޮވިޑް-19ގެ ހާލަތު ސަބަބުން ރާއްޖޭގައި ނުބޭއްވުނެވެ. މި އަހަރު ލަންކާގައި ސައުތު އޭޝިއާ މުބާރާތް ބާއްވަން ލިބިފައި އޮތް ފުރުސަތު ރާއްޖެ އަށް ދޫކޮށްލިއިރު، އެންމެ ފުރަތަމަ މުބާރާތް ބާއްވަން ނިންމީ މިދިޔަ މަހު އެވެ. އެހެން ނަމަވެސް މުބާރާތުގައި ބައިވެރިވާ ބައެއް ގައުމުތަކުގެ ކޮވިޑް ހާލަތުގެ ސަބަބުން މުބާރާތް ފަސްކުރަން އެދުމުން މެއި މަހު ކުރިއަށް ގެންދާ ގޮތަށް ހަމަޖެއްސީ އެވެ.
