ލަންޑަން (މާޗް 30) - މި ސީޒަނަށް ފަހު ޔުވެންޓަސްއާ އެކު ހަދާފައިވާ ކޮންޓްރެކްޓް ހަމަވާތީ އެ ޓީމުގެ އާޖެންޓީނާ ފޯވާޑް ޕައޮލޯ ޑިބާލާ އާ ކްލަބެއް ހޯދަން ކުރާ މަސައްކަތުގައި އޭނާގެ އޭޖެންޓް އިންގްލެންޑްގެ ޓީމުތަކަކާ މަޝްވަރާ ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ޔުވެންޓަސް އިން ޖެނުއަރީ މަހު ފިއޮރެންޓީނާ އަށް ބޮޑު އަގުދީފައި ސާބިއާގެ ފޯވާޑް ޑޫސާން ވްލަހޯވިޗް ގެނައީ ޑިބާލާގެ ކޮންޓްރެކްޓް އާ ކުރަން ބޭނުން ނުވާތީ އެވެ. އެކަން ޔުވެންޓަސްގެ ސީއީއޯ މައުރީޒިއޯ އަރީވަބެނޭ ވަނީ އިޓަލީގެ މީޑިއާ އަށް ޔަގީންކޮށްދީފަ އެވެ.
ރިޕޯޓްތައް ބުނާގޮތުން ދާދި ފަހުން ޔުވެންޓަސް އިން 2025 ވަނަ އަހަރާ ހަމައަށް ޑިބާލާ އަށް އާ ކޮންޓްރެކްޓެއް ދިނީ މިހާރު ދެމުން އަންނަ މުސާރަ އަށް ވުރެ ކުޑަ އަދަދަކަށް އެއްބަސްވުމަށެވެ. އެކަމަކު، ޑިބާލާ ބޭނުންވަނީ ކުރިން ލިބެމުން އައި މުސާރަ އަށް ވުރެ ބޮޑު އަދަދެކެވެ. ޑިބަލާ މި ވަގުތު ޔުވެންޓަސްގެ ކޮންޓްރެކްޓްގައި ހުރީ ބޯނަހާ އެކު އަހަރަކު 16 މިލިއަން ޑޮލަރު ލިބޭ ގޮތަށެވެ.
ޔުވެންޓަސް އިން ކޮންޓްރެކްޓް އާ ކުރަން ޑިބާލާ އަށް ހުށަހެޅީ އަހަަރަކު ބޯނަހާ އެކު 14 މިލިއަން ޑޮލަރެވެ. އެ ހުށަހެޅުމަށް ޑިބާލާގެ ފަރާތުން އެއްބާރުލުމެއް ނުލިބި އެންމެ ފަހުން އޭނާ ދޫކޮށްލަން ޔުވެންޓަސް އިން ނިންމީ އެވެ.
އުމުރުން 28 އަހަރުގެ ޑިބާލާގެ އޭޖެންޓް، ޖޯޖް އަންޓުން ވަނީ މިހާތަނަށް އިންގްލެންޑްގެ މެންޗެސްޓާ ސިޓީ، ޓޮޓެންހަމް އަދި އާސެނަލާ މަޝްވަރާތަކެއް ބާއްވައިފަ އެވެ.
މީގެ ކުރިން އަންޓުން ވަނީ އިންޓަ މިލާންގެ އިސް ވެރިންނާ އެކު ޑިބާލާގެ ޓްރާންސްފާގެ މަޝްވަރާތަކެއް ކުރިއަށްގެންގޮސްފަ އެވެ. އިޓަލީގެ މީޑިއާތަކުން ރިޕޯޓްކުރާ ގޮތުގައި ކުރިން ޕަލާމޯ އަށް ކުޅުނު ޑިބާލާ ގެންނަން އިންޓަ އިން ވެސް ދޭން ނިންމީ ކުޑަ މުސާރައެކެވެ. އެހެންވެ، އަންޓުން ނިންމީ އެހެން ކްލަބްތަކާ މަޝްވަރާކުރުމަށެވެ.
ސްޕެއިނުގެ މީޑިއާތަކުން ރިޕޯޓްކުރާގޮތުގައި އިނގިރޭސި ކްލަބަކުން ޑިބާލާ ގަޔާވާ ހުށަހެޅުމެއް ނުލިބިއްޖެނަމަ ސްޕެއިނުގެ އެތުލެޓިކޯ މެޑްރިޑާ އެކު ވެސް އަންޓުން ވާހަކަދައްކާނެ އެވެ. އެއީ އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީ މީގެ ކުރިން ޑިބާލާގެ ސޮއި ހޯދުމަށް ޝައުގުވެރިކަން ފާޅުކޮށްފައިވާތީ އެވެ.
