ތިން އަހަރަށް ފަހު ވޮލީބޯލް އެސޯސިއޭޝަން ކަޕް ބޭއްވުމަށް ކަލަންޑަރުގައި ހިމަނައިފި އެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން މި އަހަރުގެ އަހަރީ ކަލަންޑަރު އިއްޔެ އާންމުކުރިއިރު، ލޯކަލް ސީޒަންގެ ގައުމީ ލެވަލްގެ މުބާރާތްތައް ފަށަން، ތާވަލުކޮށްފައިވަނީ މެއި 15 ވަަނަ ދުވަހު ފަށާ އެސޯސިއޭޝަން ކަޕްގެ ޕްރިލިމިނަރީ ބުރުންނެވެ. ޕްރިލިމިނަރީ ބުރުން ހޮވޭ ޓީމުތަކާ އެކު އެސޯސިއޭޝަން ކަޕްގެ ފައިނަލް ރައުންޑް އޮންނާނީ މެއި 24 ވަނަ ދުވަހު އެވެ.
ވީއޭއެމް އިން އެންމެ ފަހުން އެސޯސިއޭޝަން ކަޕް ބާއްވާފައިވަނީ 2019 ވަނަ އަހަރު އެވެ. އޭގެ ފަހުން ވީއޭއެމް ހިންގުން ނޯމަލައިޒް ކޮމިޓީއަކާ ހަވާލުކޮށް ފަހުން އިންޓަރިމް ކޮމިޓީއެއްގެ ބެލުމުގެ ދަށަށް އެސޯސިއޭޝަން ދިޔައިރު، އެންމެ ފަހުން ވީއޭއެމްގެ އިންތިހާބެއް ބޭއްވި މިހާރު އޮތް ލީޑަޝިޕާ ހިންގުން ހަވާލުވީ މިދިޔަ އަހަރު އޭޕްރީލް މަހުގެ ތެރޭގަ އެވެ.
ކޮވިޑް-19އާ ހެދި ރާއްޖޭގެ ކުޅިވަރަށް އައި ހުއްޓުމުގެ ތެރޭގައި ލޯކަލް ވޮލީ މުބާރާތެއް ވެސް ބޭއްވޭ ގޮތެއްނުވި އެވެ.
އެންމެ ފަހުން ބޭއްވި ގައުމީ ފެންވަރުގެ އިންޑޯ ލޯކަލް ވޮލީ މުބާރާތަކީ 2020 ވަނަ އަހަރުގެ ކުރީކޮޅުގައި ބޭއްވި ގައުމީ ލީގާއި ގައުމީ މުބާރާތެވެ. އޭގެ ފަހުން ގައުމީ ލެވަލްގެ އިންޑޯ މުބާރާތްތަކުގެ ފެށުމަކީ މި އަހަރުގެ އެސޯސިއޭޝަން ކަޕެވެ. މިދިޔަ އަހަރު ވަނީ ބީޗް ވޮލީބޯޅައިގެ ގައުމީ މުބާރާތް ބާއްވައިފަ އެވެ.
އެސޯސިއޭޝަން ކަޕްގެ ފައިނަލް ބުރުން މި ވަގުތު ފުރުސަތު ލިބިފައި އޮތީ ދިވެހި ސިފައިންގެ ކްލަބާއި ޕޮލިސް ކްލަބް، ސްޕޯޓްސް ކްލަބް ސިޓީ އަދި ގުޑީސް ސްޕޯޓްސް ކްލަބް އެވެ.
އެސޯސިއޭޝަން ކަޕްގެ ފައިނަލް ބުރު ކުރިއަށްދާނީ އަންހެން އަދި ފިރިހެން ޑިވިޝަނުގައި ވެސް ހަ ޓީމެއް ހިމެނޭ ގޮތަށެވެ. އަންނަ އަހަރުގެ އެސޯސިއޭޝަން ކަޕުން ރާއްޖެ އެޓޯލް ވޮލީބޯލް ޗެމްޕިއަންްޝިޕްގެ ޒޯން ޗެމްޕިއަން ޓީމުތަކަށް ފުރުސަތު ލިބޭނެ އެވެ. މިހާރު ރާއްޖެ އެޓޯލް ވޮލީބޯލް ޗެމްޕިއަންޝިޕްގެ އަތޮޅު ބުރުތައް ދަނީ ކުރިއަށެވެ. ފ. އަތޮޅުގެ މުބާރާތް ނިމިފައިވާއިރު، މި ވަގުތު ކުރިއަށްދަނީ ގދ. އަތޮޅުގެ މުބާރާތެވެ.
މި އަހަރުގެ ރާއްޖެ އެޓޯލް ވޮލީބޯލް ޗެމްޕިއަންޝިޕްގެ ޒޯން ބުރު ބާއްވައި ޗެމްޕިއަންކަން ކަނޑައެޅޭ ޒޯންތައް މި ފަހަރުގެ އެސޯސިއޭޝަން ކަޕަށް ވެސް ކޮލިފައިވާނެ ކަމަށް މީގެ ކުރިން ވީއޭއެމުން ވަނީ ބުނެފަ އެވެ. އެކަމަކު، މިހާރު އޮތްގޮތުން މި އަހަރުގެ އެސޯސިއޭޝަން ކަޕް ފެށުމުގެ ކުރިން އެއްވެސް ޒޯނެއްގެ ބުރު ކުޅެވުމުގެ ފުރުސަތު ކުޑަ އެވެ.
މި އަހަރުގެ ވީއޭއެމްގެ ކަލަންޑަރުގައި ލޯކަލް ވޮލީ ސީޒަންގެ އެހެން މުބާރާތްތައް ރޭވިފައިވާ ގޮތަށް ބަލާއިރު، ޖޫން ނުވަ ވަނަ ދުވަހު ގައުމީ ވޮލީ ލީގު ފަށާނެ އެވެ. އޭގެ ފަހުން ގައުމީ ވޮލީ ބޯޅަ މުބާރާތް ފަށާނީ ޖޫން މަހު 26 ވަނަ ދުވަހު އެވެ. ފޯރިގަދަ އިންޓަ ރިސޯޓް މުބާރާތް ޖުލައި ފަސް ވަނަ ދުވަހު ފަށާ ގޮތަށް ހިމަނާފައިވާއިރު، ސެޕްޓެމްބަރު މަހުގެ ތެރޭގައި ވޮލީބޯޅަ ޔޫތު ޗެމްޕިއަންޝިޕާއި އިންޓަ އޮފީސް/ކޮމްޕެނީ މުބާރާތް އޮންނާނެ އެވެ. އަދި އޮކްޓޫބަރު މަހުގެ ތެރޭގައި ބީޗްވޮލީބޯޅައިގެ އެސޯސިއޭޝަން ކަޕާއި ގައުމީ މުބާރާތް އޮންނާނެ އެވެ.
