އޭޝިއަން ޗެމްޕިއަންޝިޕަށް ގައުމީ ނެޓްބޯޅަ ޓީމް ތައްޔާރުވަނީ

އަންނަ ސެޕްޓެމްބަރު މަހު ސިންގަޕޫރުގައި ބާއްވާ އޭޝިއަން ނެޓްބޯޅަ ޗެމްޕިއަންޝިޕަށް ގައުމީ ނެޓްބޯޅަ ޓީމްގެ ތައްޔާރީތައް ފަށައިފި އެވެ.

ނެޓްބޯޅައިގެ އޭޝިއާ ސަރަހައްދުގެ އެންމެ ބޮޑު މުބާރާތް ސިންގަޕޫރުގައި ކުރިއަށްދާނީ ސެޕްޓެމްބަރު މަހުގެ 4 އިން 11 އަށެވެ. މިފަހަރުގެ މުބާރާތުގައި 11 ގައުމަކުން ވާދަކުރާނެ އެވެ. އެއީ ބުރޫނާއީ، ޗައިނީސް ތައިޕޭ، ހޮންކޮންގް، އިންޑިއާ، މެލޭޝިއާ، ފިލިޕީންސް، ސިންގަޕޫރު، ސްރީ ލަންކާ، ތައިލަންޑް، ޕާކިސްތާންގެ އިތުރުން ރާއްޖެ އެވެ.

ގައުމީ ނެޓްބޯޅަ ޓީމްގެ ޕްރެކްޓިސްތައް ފަށާފައިވަނީ 16 ކުޅުންތެރިންނާ އެކު ގައެވެ. ކޯޗަކަށް ހަމަޖައްސާފައިވަނީ ނީޝާ ހަލީމް އެވެ. ނީޝާ ވަނީ ދާދިފަހުން ނިމުނު "މޯލްޑިވްސް ސްޕޯޓްސް އެވޯޑްސް 2022"ގެ މިދިޔަ ތިން އަހަރުގެ އަންހެން އެންމެ މޮޅު ކޯޗުގެ މަގާމް ހޯދައިފަ އެވެ.

ގައުމީ ނެޓްބޯޅަ ޓީމުގެ ފަރިތަކުރުންތަކުގެ ތެރެއިން.-- ފޮޓޯ: މުހައްމަދު ޝާބިން/ އަދަދު

ނެޓްބޯޅަ އެސޯސިއޭޝަނުން ބުނީ މިވަގުތު 16 ކުޅުންތެރިންނާ އެކު ގައުމީ ޓީމުގެ ޕްރެކްޓިސް ކުރި ކަމުގައި ވިޔަސް މުބާރާތަށް ކައިރިކޮށްފައި ހަތަރު ކުޅުންތެރިން ބާކީކޮށް ފައިނަލް ޓީމު އެކުލަވާލާނެ އެވެ.

މި މުބާރާތަށް ތައްޔާރުވުމުގެ ގޮތުން ނެޓްބޯލް އޭޝިއާ އިން ކޮންމެ ފަހަރަކު ވެސް ކުރިއަށްގެންދާ އޭޝިއަން އަމްޕަޔަރިން ކޭމްޕް މި އަހަރުވެސް އޮންނާނެ އެވެ. އޭޝިއަން ނެޓްބޯޅަ ޗެމްޕިއަންޝިޕްގައި އަމްޕަޔަރުކަން ކުރާނީ މި ކޭމްޕުން ހޮވާލެވޭ އަމްޕަޔަރުންނެވެ.

އަންނަ ޖޫން މަހުގެ 4 އިން 9 އަށް ސިންގަޕޫރުގައި ކުރިއަށްދާ މި ކޭމްޕްގައި ކޮންމެ ގައުމަކުން ދެ އަމްޕަޔަރަކާއި އެއް އަމްޕަޔަރު ކޯޗު ބައިވެރިކުރާނެ އެވެ.

މީގެ ކުރިން ރާއްޖޭގެ އަމްޕަޔަރުން ވަނީ އޭޝިއާގެ ނެޓްބޯޅަ މުބާރާތްތަކުގައި އަމްޕަޔަރު ކަން ކޮށްފަ އެވެ. މިގޮތުން ރާއްޖޭގެ އަމްޕަޔަރު އަހުމަދު ރިލްވާން ވަނީ 2018ގެ އޭޝިއާ މުބާރާތުގެ ފައިނަލްގައި އަމްޕަޔަރުކަން ކޮށްފަ އެވެ.

އޭޝިއަން ނެޓްބޯޅަ ޗެމްޕިއަންޝިޕް އެންމެ ފުރަތަމަ ބާއްވާފައިވަނީ 1985 ވަނަ އަހަރުގަ އެވެ. ކުރިން ކޮންމެ ހަތަރު އަހަރުން އެއް ފަހަރު ބާއްވަމުން އައި މުބާރާތް ކޮންމެ ދެ އަހަރަކުން އެއް އަހަރު ބާއްވަން ނިންމީ 2012 ގަ އެވެ. އޭގެ ފަހުން 2020 ވަނަ އަހަރު ބާއްވަން އޮތް މުބާރާތް ކޮވިޑާއި ގުޅިގެންވަނީ ކެންސަލްކޮށްފަ އެވެ. މި އަހަރު މުބާރާތް މި އޮންނަނީ ހަތަރު އަހަރަށް ފަހުގަ އެވެ. މުބާރާތުގެ އެންމެ ކާމިޔާބު ޓީމަކީ ފަސް ފަހަރު ތަށި ހޯދާފައިވާ ސްރީ ލަންކާ އެވެ.