މިހާރު ކުރިއަށްދާ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖްގެ ދެ ވަނަ ދުވަހުގެ ހީޓްތައް ނިމުނުއިރު، ޖޫނިއާ މެންސް އާއި މެންސް އޯޕަން ރައުންޑުން ކުއާޓާ ފައިނަލަށް ހޮވުނު ބޮޑީބޯޑަރުންތައް ކަނޑައެޅިއްޖެ އެވެ.
މުބާރާތުގައި މިއަދު ކުއާޓާ ފައިނަލާއި ސެމީ ފައިނަލް އަދި ފައިނަލް ހީޓްތައް ވެސް އޮންނާނެ އެވެ.
ކުއާޓާ ފައިނަލުގެ ފުރަތަމަ ހީޓުގައި ވާދަކުރާނީ އަލީ ހުޝްރުވާން އަހުމަދު (ކުޑަ އައްޔަ) އާއި އިޔާން އަހުމަދު އެވެ. ކުޑަ އައްޔަ ކުއާޓާގެ ޖާގަ ހޯދީ ހަތަރު ވަނަ ބުރުގެ ފުރަތަމަ ހީޓުގައި އާމިން އުމަރު މޫސާ އާއި އަޝްރަފް ހަސަން ފަހަތަށް ޖައްސާލައި، 11.26 ޕޮއިންޓް ހޯދައިގެންނެވެ. އިޔާން ވަނީ ހަތަރު ވަނަ ބުރުގެ ހީޓް ދޭއްގެ ދެ ވަނަ ހޯދައިފަ އެވެ.
ކުއާޓާގެ ދެ ވަނަ ހީޓުގައި އޮތީ އަލީ ޝާމް ރާފިއު އާއި އާމިން އެވެ. ޝާމް ވަނީ ހަތަރު ވަނަ ބުރުގެ ދެ ވަނަ ހީޓްގެ އެއް ވަނަ ހޯދައިފަ އެވެ. އެއީ 5.73 ޕޮއިންޓް ސްކޯކޮށްގެންނެވެ. އާމިން އަކީ ހަތަރު ވަނަ ބުރުގެ ފުރަތަމަ ހީޓުގެ ދެ ވަނަ އެވެ. ކުއާޓާގެ ތިން ވަނަ ހީޓުގައި ބައްދަލުކުރާނީ އަސްވާން މުހައްމަދު އާއި މުހައްމަދު ވިއާމް އެވެ. އަސްވާން ވަނީ ހަތަރު ވަނަ ބުރުގެ ތިން ވަނަ ހީޓުގެ އެއް ވަނަ ހޯދައިފަ އެވެ. އެއީ 8.97 ޕޮއިންޓް ސްކޯކޮށްގެންނެވެ. ވިއާމް ކުއާޓާގެ ޖާގަ ހޯދީ ހަތަރު ވަނަ ބުުރުގެ ހަތަރު ވަނަ ހީޓުގެ ދެ ވަނަ ހޯދައިގެންނެވެ.
ކުއާޓާ ފައިނަލުގެ ފަހު ހީޓުގައި މުހައްމަދު ރީޝާން ވާދަކުރަން ޖެހޭނީ މުހައްމަދު ޖާވިދު (ޖާއްޓެ)އާ އެވެ. މުބާރާތުގައި މިހާތަނަށް ކޮންމެ ހީޓެއްގައި ވެސް ތަފާތު ދައްކަމުން އަންނަ ރީޝާން ކުއާޓާގެ ޖާގަ ހޯދީ ހަތަރު ވަނަ ބުރުގައި އޭނާ ވާދަކުރި ހަތަރު ވަނަ ހީޓުގެ އެއް ވަނަ ހޯދައިގެންނެވެ. އެއީ 12.83 ޕޮއިންޓް ސްކޯކޮށްގެންނެވެ. ޖާއްޓެ ވަނީ ހަތަރު ވަނަ ބުރުގެ ތިން ވަަނަ ހީޓުގެ ދެ ވަނަ ހޯދައިފަ އެވެ. އެއީ 8.16 ޕޮއިންޓް ސްކޯކޮށްގެންނެވެ.
ޖޫނިއާ ޑިވިޝަންގެ ކުއާޓާ ފައިނަލްގެ ޖާގަތައް ހޯދީ މުހައްމަދު ޖަރީޝް ޖިހާދު، ހަސަން މުހައްމަދު، އާމިން، މުހައްމަދު ކައިފް ރައިމޫން ކަމާލުއްދީން، އިޔާން އަހުމަދު، މުހައްމަދު އަޒާން އަހުމަދު، އަބްދުﷲ ޝިމާލް ޝަމީމް އަދި ޝިބްތު އެވެ. ޖޫނިއާ ޑިވިޝަނަށް ބަލާއިރު، ޕޮއިންޓް ސްކޯރިން އެންމެ ރަނގަޅީ އާމިން އެވެ. އާމިން ވަނީ ފުރަތަމަ ބުރުގައި ހީޓު ދޭއްގެ އެއް ވަނަ ހޯދުމުގެ އިތުރުން ތިން ވަނަ ބުރުގައި ވެސް ވާދަކުރި ހީޓް ކާމިޔާބު ކޮށްފަ އެވެ. ފުރަތަމަ ބުރުގެ ހީޓް އެކެއްގެ އެއް ވަނަ ހޯދި އިބްރާހިމް އަތޫފް ވަނީ ތިން ވަނަ ބުުރުގެ ފުރަތަމަ ހީޓުގައި ޖަރީޝް އަތުން ބަލިވެފަ އެވެ.
ހަތް އަހަރުގެ މެދުކެނޑުމަށް ފަހު އަލުން ފެށި ބުރުނު ޝިކާރު ޗެލެންޖްގައި މި ފަހަރު މުޅިން އަލަށްވ އަންހެން ޑިވިޝަން ވަނީ ހިމަނައިފަ އެވެ. މި ބައިގައި ވާދަކުރާ ހަތަރު ބޮޑީބޯޑަރުންނަކީ ދަފީނާ ހަސަން އިބްރާހިމް، ރައުފާ، ލުޖެއިން ހަސަން އަދި ޝާޒިޔާ ސައީދު އެވެ.
ޖުމްލަ ހަތަރު ހީޓަކަށް މި ޑިވިޝަން ބެހިފައިވާއިރު، މުބާރާތުގެ ފުރަތަމަ ދުވަހު (މިދިޔަ ބުރާސްފަތި ދުވަހު) ކުރިއަށްދިޔައީ ފުރަތަ ދެ ހީޓެވެ. ކޮންމެ ހީޓެއްގެ އެއް ވަނަ އަށް ދިޔަ ބޮޑީބޯޑަރު ފައިނަލަށް ހޮވުނުއިރު، ދެ ވަނަ އަށް ދިޔަ ބޮޑީބޯޑަރު ވަނީ ތިން ވަނަ ހޮވާ ހީޓަށް ދަތުރުކޮށްފަ އެވެ. އެ ގޮތުން ފުރަތަމަ ހީޓުގައި ރައުފާއާ ވާދަކޮށް ދަފީނާ މޮޅުވީ 3.80 ޕޮއިންޓް ސްކޯ ކޮށްގެންނެވެ. ރައުފާ އަށް ސްކޯ ކުރެވުނީ 2.26 ޕޮއިންޓެެވެ. މި ނަތީޖާއާ އެކު އެއް ވަނަ ހީޓުން ފައިނަލަށް ހޮވުނީ ދަފީނާ އެވެ. ދެ ވަނަ ހީޓުގައި ލުޖެއިން ވަނީ 4.90 ޕޮއިންޓް ސްކޯކޮށްފަ އެވެ. އޭނާއާ ވާދަކުރި ޝާޒިޔާ އަށް ލިބިފައިވަނީ 2.73 ޕޮއިންޓެވެ.
ލުޖެއިން ފައިނަލް ހީޓުގައި ދަފީނާއާ ދެކޮޅަށް ނުކުންނައިރު، ތިން ވަނަ ލިބޭނީ ޝާޒިޔާ އާއި ރައުފާ ވާދަކޮށްގެން މޮޅުވާ ބޮޑީބޯޑަރަކަށެވެ. ފައިނަލް ހީޓުތައް އޮންނާނީ މިއަދު މެންދުރު ފަހު އެވެ. ތިނެއް ޖަހާއިރު، ފައިނަލް ހީޓްތައް ފަށާއިރު، މުބާރާތުގެ ނިމުމުގެ ރަސްމިއްޔާތު މިއަދު ހަވީރު އޮންނާނެ އެވެ. ބުރުނު ޝިކާރު ބޮޑީބޯޑިން ޗެލެންޖަކީ މި ފަަހަރުގެ މުޅިން އަލަށް ފަށާފައިވާ ގައުމީ ބޮޑީބޯޑިން ލީގުގެ ފުރަތަމަ މުބާރާތެވެ.
