ލަންޑަން (މާޗް 24) - އިނގިރޭސި ޕްރިމިއާ ލީގުގެ ގިނަ ކްލަބްތަކާއި އިންގްލެންޑް ގައުމީ ޓީމަށް ކުރިން ކުޅުނު ފޯވާޑް ޖަމެއިން ޑެފޯ ފުޓްބޯޅަ އިން ރިޓަޔާކޮށްފި އެވެ.
އުމުރުން 39 އަހަރުގެ ޑެފޯ ވަނީ މަތީ ފަންތީގައި ޕްރޮފެޝަނަލްކޮށް 22 އަހަރު ކުޅެފަ އެވެ. ޑެފޯ އަކީ އިނގިރޭސި ޕްރިމިއާ ލީގުގެ ތާރީހުގައި ނުވަ ވަަނަ އަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ. ޕްރިމިއާ ލީގުގެ ފަސް ކްލަބަކަށް ކުޅުނުއިރު، ޑެފޯ ވަނީ ލީގުގައި 496 މެޗުން 162 ގޯލު ޖަހައިފަ އެވެ.
ކެރިއަރުގެ އެންމެ ފަހު ކްލަބެއް ގޮތަށް ޑެފޯ ކުޅުނީ އިނގިރޭސި ތިން ވަނަ ޑިވިޝަންގައި ކުޅެމުން އަންނަ ސަންޑަލެންޑަށެވެ. އެންމެ ފަހު މެޗަކީ މިދިޔަ ހޮނިހިރު ދުވަހު ލިންކަންއާ ލަނޑެއް ނުޖެހި އެއްވަރުވި މެޗެވެ. އެ މެޗުގައި ޑެފޯ ކުޅެން އެރީ ބަދަލެއްގެ ގޮތުގަ އެވެ.
"މިއީ ވަރަށް އުނދަގޫ ނިންމުމެއް. އަހަރެން 22 އަހަރު އެންމެ މަތީ ފަންތީގައި ކުޅެފައި ކުޅުން ހުއްޓާލަން މި ނިންމިއިރު ވާނީ އާއިލާ އާއި ގާތް އެކުވެރިންނާ ވާހަކަ ދައްކާފައި،" ރިޓަޔާކުރުމަށް ފަހު ޑެފޯ ބުންޏެވެ.
އިންގްލެންޑް ގައުމީ ޓީމަށް 57 މެޗުން ޑެފޯ ވަނީ 20 ގޯލު ޖަހައިފަ އެވެ. އިންގްލެންޑްގެ ތިން އުމުރުފުރާއެއްގެ ގައުމީ ޓީމަށް ކުޅުނު ޑެފޯ ވަނީ ސީނިއާ ޓީމާ އެކު ޔޫރޯ އާއި ފީފާ ވޯލްޑް ކަޕްގައި ވެސް ކުޅެފަ އެވެ. ޑެފޯ، 2017 ވަނަ އަހަރުގެ ފަހުން އިންގްލެންޑް ގައުމީ ޓީމަށް ނުކުޅެ އެވެ.
ވެސްޓް ހޭމް ޔުނައިޓެޑުން ކެރިއަރު ފެށި ޑެފޯ ވަނީ އެ ޓީމުގެ އިތުރުން އިންގްލެންޑްގެ ބޯންމައުތު، ޓޮޓެންހަމް ހޮޓްސްޕާސް، ޕޯޓްސްމައުތު އަދި ސަންޑަލެންޑަށް ކުޅެފަ އެވެ. އޭގެ އިތުރުން އެމެރިކާގެ ޓޮރޮންޓޯ އެފްސީ އާއި ސްކޮޓްލެންޑްގެ ރޭންޖާސް އަށް ކުޅެފަ އެވެ.
ޓޮޓެންހަމުން އެންމެ ފަހުން ހޯދި ކާމިޔާބީ ހާސިލްކުރީ ޑެފޯ އެ ޓީމުގައި ހުއްޓަ އެވެ. އެއީ 2008 ވަނަ އަހަރުގެ އިނގިރޭސި ލީގު ކަޕް އެވެ. ޑެފޯ ވަނީ ދާދި ފަހުން ސްކޮޓްލެންޑް ލީގުގެ ޗެމްޕިއަންކަން ރޭންޖާސް އަށް ކުޅެމުން ހާސިލްކޮށްފަ އެވެ.
