ރާއްޖޭގައި ގިނަ އަދަދަކަށް ބަންގްލަދޭޝް ސަޕޯޓަރުން އެބަތިބި ކަމަށާއި އެ މީހުންގެ އެހީއާ އެކު މިރޭ ކުޅޭ މެޗުގައި ރާއްޖޭގެ ގައުމީ ފުޓްބޯޅަ ޓީމު އަތުން ބަންގްލަދޭޝަށް މޮޅުވެވިދާނެ ކަމަށް އެ ޓީމުގެ ކެޕްޓަން ޖަމާލް ބުޔާން ބުނެފި އެވެ.
ބަންގްލަދޭޝާއި ރާއްޖެ ވަނީ މިދިޔަ އަހަރު ދެ ފަހަރު ބައްދަލުކޮށްފަ އެވެ. އޮކްޓޫބަރު މަހު މާލޭގައި ކުޅުނު ސާފް ޗެމްޕިއަންޝިޕްގެ މެޗުން ރާއްޖެ 2-0 އިން މޮޅުވި ނަމަވެސް އޭގެ އެއް މަސް ފަހުން ބަންގްލަދޭޝް އިން ވަނީ ސްރީ ލަންކާގައި ކުޅުނު ފޯ ނޭޝަންސް ކަޕްގައި ރާއްޖެ 2-1 އިން ބަލިކޮށްފަ އެެވެ. މިހާތަނަށް މާލޭގައި ބަންގްލަދޭޝް އަށް ރާއްޖެ ބަލިކުރެވިފައިނުވާއިރު، ޖަމާލް ބުނީ މިރޭގެ މެޗުގައި އެކަން ކުރަން ބަންގްލަދޭޝް ސަޕޯޓަރުންގެ އެހީ ބޭނުންވާނެ ކަމަށެވެ.
"ރާއްޖޭގައި ވެސް އަހަރެމެންނަށް މޮޅުވެވިދާނެ. އަހަރެމެން އެންމެނަށް އެނގޭ މިތަނުގައި (ރާއްޖޭގައި) ގިނަ ބަންގްލަދޭޝް މީހުން އުޅޭކަން އެ މީހުންގެ އެހީގައި މޮޅުވެވިދާނެ،" ބަންގްލަދޭޝްގެ ޓީ ސްޕޯޓްސް އަށް ދިން އިންޓަވިއުއެއްގައި ޖަމާލް ބުންޏެވެ.
އިއްޔެ ބޭއްވި ނޫސްވެރިންގެ ބައްދަލުވުމުގެ ތެރެއިން ބަންގްލަދޭޝްގެ ކެޕްޓަން ޖަމާލް ބުޔާން.-- ފޮޓޯ: މުހައްމަދު ޝާބިން/ އަދަދު
ރާއްޖޭން 2016 ވަނަ އަހަރު ސެޕްޓެމްބަރު މަހު މާލޭގައި ބަންގްލަދޭޝާ ދެކޮޅަށް ކުޅުނު އެކުވެރިކަމުގެ މެޗުގައި ރާއްޖޭގެ ސަޕޯޓަރުންނާއި ބަންގްލަދޭޝް ސަޕޯޓަރުންނަށް ވަކިން ޓިކެޓް ވިއްކާ އުސޫލެއް ތަންފީޒުވާގޮތަށް ހަމަޖެހިފައި ނެތްއިރު، އެ މެޗުގައި ދަނޑުފުރާލީ ބަންގްލަދޭޝް ސަޕޯޓަރުން ވަދެ އެވެ. އޭގެ ފަހުން، މިދިޔަ އޮކްޓޫބަރު މަހު ރާއްޖޭގައި ބޭއްވި ސާފް ޗެމްޕިއަންޝިޕްގައި ބަންގްލަދޭޝާއި ރާއްޖެ ކުޅުނު މެޗުގައި ޓިކެޓް ވިއްކީ މުބާރާތުގެ ގަވާއިދުގައިވާ އުސޫލަށް ބަލައި، ބަންގްލަދޭޝް ސަޕޯޓަރުންނަށް 200 ޓިކެޓެވެ. އެ ފަހަރު ޓިކެޓްގެ މައްސަލަ ހޫނުވެ، ފަހުން ސޯޝަލް ސެންޓަރުގައި ވެސް ވަނީ ޓިކެޓް ވިއްކައިފަ އެވެ. އެކަމަކު، އެފްއޭއެމުން މިހާރު ނިންމާފައިވަނީ ބަންގްލަދޭޝްގެ އެދުމާ އެކީގައި މި ފަހަރު ވިއްކަން ހަމަޖެހިފައިވާ 5000 ޓިކެޓްގެ ތެރެއިން 500 ޓިކެޓް ބަންގްލަދޭޝް ސަޕޯޓަރުންނަށް ވިއްކުމަށެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ޖަމާލް ވަނީ އެފްއޭއެމްގެ ފަރާތުން އިލްތިމާސެއްކޮށް، ބަންގްލަދޭޝް ސަޕޯޓަރުންނަށް ވެސް ފުރުސަތު ދޭން އެދޭ ކަމަށް ބުނެފަ އެވެ.
"ތެދަށް ބުނަންޏާ އަހަރެން އުންމީދުކުރަނީ ބަންގްލަދޭޝް މީހުންނަށް ވެސް ރާއްޖޭގެ ފެޑެރޭޝަނުން (އެފްއޭއެމް އިން) ފުރުސަތު ދޭނެ ކަމަށް މެޗަށް ވަންނަން. ކުރިން ފަހަރު ހެން މި ފަހަރު ނުވާނެ ކަމަށް މި ބަލަނީ. ޔަގީނުން ވެސް މިއީ ރާއްޖޭގެ ހޯމް ދަނޑު. އަހަރެމެން އެންމެނަށް ވެސް އެނގޭ ވަރަށް ގިނަ ބަންގްލަދޭޝް މީހުން ރާއްޖޭގައި އުޅޭކަން. އެ މީހުން މެޗު ބަލަން ވެސް ބޭނުންވާނެ. އެންމެ ފަހުން އަހަރެމެން ރާއްޖޭގައި ކުޅުނުއިރު ވަރަށް ގިނަ މީހުން ޝަކުވާކުރި އެ މީހުން ޓިކެޓް ގަނެފައި ވެސް މެޗު ބަލަން ނުވަދެވުނު ކަމަށް. އެއީ ރަނގަޅު ގޮތެއް ނޫން،" ކުރިން ސައިފް ސްޕޯޓިން ކްލަބާ އެކު އޭއެފްސީ ކަޕްގައި ރާއްޖެ އައި ޖަމާލް ބުންޏެވެ.
މިދިޔަ އަހަރު ސާފް ޗެމްޕިއަންޝިޕްގައި ގަވާއިދު ހެދީ ރާއްޖޭގެ ސަޕޯޓަރުންނަށް ހާއްސަ ފަޅިން ބަންގްލަދޭޝް މީހުން ޓިކެޓް ގަތް ނަމަވެސް މެޗު ބަލަން ނުވައްދާގޮތަށެެވެ. އެއީ ސަލާމަތީ ސަބަބުތަކަށް ބެލުމަށް ފަހު އެވެ.
ބަންގްލަދޭޝް އިން އެންމެ ފަހުން ރާއްޖެއާ ދެކޮޅަށް ކުޅުނު ދެ މެޗުގައި ނުކުތީ ތަފާތު ދެ ކޯޗުންނާ އެކު އެވެ. ސާފް ޗެމްޕިއަންޝިޕްގައި ބަންގްލަދޭޝް ކޯޗަަކަށް ހުރީ ރާއްޖޭގެ ނިއު ރޭޑިއަންޓަށް ކުރިން އިރުޝާދުދިން ސްޕެއިނުގެ ކޯޗު އޮސްކާ ބްރުޒޮން އެވެ. ފޯ ނޭޝަންސް ކަޕްގައި ބަންގްލަދޭޝް އިން ރާއްޖެ ބަލިކުރިއިރު، ކޯޗަކީ ޕޯޗުގީސް ކޯޗު މާރިއޯ ލެމޯސް އެވެ. މި ފަހަރު ބަންގްލަދޭޝް އަށް ކޯޗުކޮށްދޭނީ މިދިިޔަ ޖެނުއަރީ މަހު ހަވާލުވި ސްޕެއިނުގެ ހަވިއޭ ކަބްރޭރާ އެވެ.
ޖަމާލް ބުނީ ތަފާތު ތިން ކޯޗުންނާ އެކު ކުރު މުއްދަތެއްގައި މަސައްކަތްކުރަން ޖެހުނު ކަމުގައި ވިޔަސް ކުޅުންތެރިންނަށް މީގެ މާ ބޮޑެތި އުނދަގޫތަކެއް ހުންނާނެ ކަމަށް ނުދެކޭ ކަމަށެވެ. އަދި ކަބްރޭރާއާ އެކު މިދިޔަ ތިން ހަތަރު ދުވަހު ކުރި ޓްރެއިނިންތަކާއި ބޭއްވި ޓެކްޓިކަލް ސެޝަންތަކުގައި ދަސްވި ކަންތައްތަކަށް ބަލާއިރު މިރޭގެ މެޗުގައި ވެސް ރަނގަޅަށް ކުޅެވޭނެ ކަަމަށް ޖަމާލް ވަނީ ބުނެފަ އެެވެ.
މި މަހުގެ އިންޓަނޭޝަނަލް ބްރޭކުގައި ރާއްޖެ އާއި މޮންގޯލިއާ ދެކޮޅަށް ކުޅޭ މެޗަށް ބަންގްލަދޭޝް އިން ނެގި ސްކޮޑުގައި މުހިންމު ބައެއް ކުޅުންތެރިން ނެތްއިރު، އާ ކުޅުންތެރިންތަކަށް ވަނީ ފުރުސަތު ދީފަ އެވެ. ސްކޮޑުގައި ނެތް ކުޅުންތެރިންނަށް ބަލާއިރު، އަނިޔާގެ ސަަބަބުން ކުޅުމާ ދުުުރުގައި ހުރި އިތުބާރު ޑިފެންޑަރު ޓޯޕޫ ބަރްމަން އާއި މުހައްމަދު ރިދޯއިގެ އިތުރުން މި ވަގުތު ފޯމު ދަަށްވެފައިވާ ކަމަށް ބުނެ، ޓީމުން ބާކީ ކުރި ޔާސީން ހާން، ސާދުއްދީން އަދި މަހުބޫބް ރަހްމާން އަކީ މީގެ ކުރިން ގަވާއިދުން ޖާގަ ހޯދަމުން އައި ކުޅުންތެރިންނެވެ.
ގަލޮޅު ދަނޑުގައި ރާއްޖެ އާއި ބަންގްލަދޭޝް ވާދަކުރާ އެކުވެރިކަމުގެ މެޗު މާދަމާރޭ ފަށާނީ ރާއްޖެ ގަޑިން 21:00 ގައެވެ.
