ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް މުބާރާތް ފެށިއިރު، 91 ޓީމު ވާދަކުރި އެވެ. މިހާރު މުބާރާތުގެ އަތޮޅު ބުރާއި ޒޯން ބުރު މި ވަނީ ނިމިފަ އެވެ. ގަދަ 16 ޓީމުގެ ބުރުގެ އަށް މެޗު މިރޭ ކުޅޭއިރު، މިއީ ފޯރިގަދަ މެޗުތަކަކަށްވާނެ ކަން ޔަގީނެވެ. މުބާރާތުގެ މިހާތަނަށް ފެނިގެން ގޮސްފައިވާ 162 މެޗަށް ވުރެ، ކުރިއަށް ހުރީ މާ ވާދަވެރިވާނެ މެޗުތަކެކެވެ. އެއީ ދެން އޮތީ ނޮކައުޓް މެޗުތައް ކަމަށްވާތީ އެވެ..
ގަދަ 16 މެޗު 1: ގއ. ކޮނޑޭ - ކ. ގާފަރު (މިރޭ 20:15)
މި ފަހަރުގެ މުބާރާތަށް އެންމެ ރަނގަޅަށް ތައްޔާރުވި އެއް ޓީމަކީ ކޮނޑޭ އެވެ. ރަށުންބޭރުން އެ ޓީމުގައި ތިން ކުޅުންތެރިއަކު ރަޖިސްޓްރީކުރިއިިރު، އެ ތިން ކުޅުންތެރިން ވަނީ ކޮނޑޭ މި ހިސާބަށް އައުމުގައި ތަފާތު ދައްކައިފަ އެވެ. ކޮނޑޭއާ ދެކޮޅަށް މިރޭ ނުކުންނަ ގާފަރު ޓީމަކީ ކ. އަތޮޅާއި ޒޯން ތިނެއްގެ ޗެމްޕިއަނުންނެވެ. ގާފަރު ޓީމަށް ބަލާއިރު، މި މުބާރާތުގައި ބަދަލު ކުޅުންތެރިންނާ އެކު އެންމެ ވަރުގަދަ ސްކޮޑެއް އޮތް އެއް ޓީމަކީ ގާފަރެވެ. ޓީމުގެ ކޯޗަކަށް ހުރީ ފުޓްސަލްގައި ގިނަ ކާމިޔާބީތަކެއް ހޯދާފައިވާ މުހައްމަދު އައްޒާމް އެވެ.
ގަދަ 16 މެޗު 2: މާފަންނު - މ. ދިއްގަރު (މިރޭ 20:15)
މާލޭ ޒޯންގެ ޗެމްޕިއަންކަން ދިފާއުކުރި މާފަންނު ޓީމަށް ބަލާއިރު، މާލެ ސަރަަހައްދުގައި ކުޅޭ ގިނަ ފުޓްސަލް މުބާރާތްތަކުގައި ގަވާއިދުން ކުޅޭ ގިނަ ކުޅުންތެރިންތަކެއް ހިމެނެ އެވެ. އެ ޓީމުގެ ބެންޗަށް ބެލިޔަސް ފުޓްސަލްގައި ތަޖުރިބާހުރި ގިނަ މޫނުތަކެއް އެބަތިބި އެވެ. ދިއްގަރު ޓީމުން މީގެ ކުރިން ވެސް ގަދަ 16 ބުރުގައި ކުޅެފައިވާއިރު، މިރޭގެ މެޗަކީ އެ ޓީމުން މި މުބާރާތުގައި ކުރިއަށް ފިޔަވަޅެއް އަޅާކަމަށްވާނަމަ މޮޅު ކުޅުމެއް ދައްކަން ޖެހޭނެ މެޗެކެވެ.
ގަދަ 16 މެޗު 3: އދ. މާމިގިލި - ހުޅުމާލެ (މިރޭ 21:15)
އަތޮޅު ޗެމްޕިއަންކަން ހޯދުމަށް ފަހު މާމިގިލިން ވަނީ ޒޯން ހަތަރެއްގެ ތަށި ވެސް އުފުލާލައިފަ އެވެ. މާމިގިލި ޓީމަށް ބަލާއިރު، މިދިޔަ އަހަރު ބޭއްވި ކްލަބް މޯލްޑިވްސް ކަޕްގެ ޗެމްޕިއަންކަން ހޯދި އާރްޑީސީ ޓީމުގައި މޮޅަށް ކުޅުނު އިބްރާހިމް މައިސާން އަކީ އެ ޓީމުގެ ކެޕްޓަނެވެ. އަނެއްކޮޅުން ހުޅުމާލެ އިން ގަދަ 16 ބުރުގެ ޖާގަ ކަށަވަރުކުރުމުގައި ތަފާތު ދެއްކި ގޯލްކީޕަރު މުހައްމަދު ޒުހަލް އަކީ ކްލަބް މޯލްޑިވްސް ކަޕްގައި އާރްޑީސީގެ ކީޕަރެވެ.
ގަދަ 16 މެޗު 4: މާލެގަން - ށ. ކަނޑިތީމު (މިރޭ 21:15)
ށ. އަތޮޅުގެ ތަށި އުފުލާލި ކަނޑިތީމަށް ޒޯން ޗެމްޕިއަންކަން ނުލިބުނު ކަމުގައި ވިޔަސް އެ ޓީމަކީ މުބާރާތުގައި ފެނުނު އެންމެ ޑިސިޕްލިން އެއް ޓީމެވެ. ގަދަ 16 ބުރަށް ނުކުންނައިރު، ކަނޑިތީމަށް އޮތް އެޑްވާންޓޭޖަކީ އިދިކޮޅަށް ނުކުންނަ މާލެގަން އަށް ވުރެ ގިނަ މެޗު މި ފަހަރުގެ މުބާރާތުގައި ކުޅެފައިވުމެވެ. މާލެގަން އަށް އޮތް ހިތްހަަމަޖެހުމަކީ އެ ޓީމަކީ ޒޯން ހަތެއްގެ ޗެމްޕިއަންކަމަށް ވުމެވެ.
ގަދަ 16 މެޗު 5: ރ. ދުވާފަރު - ސ. ފޭދޫ (މިރޭ 22:15)
މި ފަހަރުގެ މުބާރާތުގެ ފުރަތަމަ މެޗުން ފެށިގެން މިހިސާބަށް އައިއިރު، ވަރުގަދަ ޖޯޝެއްގައި ކުޅެމުން އައި އެއް ޓީމަކީ ދުވާފަރެވެ. ދަނޑުބޭރުގެ ސަޕޯޓާ އެއްވަރަށް ދަނޑުމަތީގައި ވެސް ދުވާފަރުގެ ކުޅުން ފެނިގެންދިޔައިރު، އެ ޓީމުން ވަނީ ރ އަތޮޅުގެ ޗެމްޕިއަންކަމާއި ޒޯން ދޭއްގެ ޗެމްޕިއަންކަން ހޯދައިފަ އެވެ. ދުވާފަރުން ޒޯން ދޭއްގެ ތަށި އުފުލާލީ ޒޯން ބުރުގައި އެންމެ ފަހުގެ ރަނަރަޕް، އަދި ބ. އަތޮޅު ޗެމްޕިއަން އޭދަފުށި ވެސް ބަލިކޮށްފަ އެވެ. ދުވާފަރާ ދެކޮޅަށް ނުކުންނަ ފޭދޫ ވަނީ ޒޯން ހަތެއްގައި ފުވައްމުލަކު މާލެގަން އަތުން ބަލިވެފަ އެވެ.
ގަދަ 16 މެޗު 6: ތ. ތިމަރަފުށި - އއ. މަތިވެރި (މިރޭ 22:15)
ގަދަ 16 ބުރުގައި އެންމެ ފޯރިގަދަވާނެ ކަމަށް ބެލެވޭ މެޗަކީ ތިމަރަފުށްޓާއި މަތިވެރީގެ ކުރިމަތިލުމެވެ. މި ދެ ޓީމުން މިހާތަނަށް މެޗަކުން ބަލިވެފައިނުވެ އެވެ. މި މުބާރާތުގެ ޗެމްޕިއަންކަން ދެ ފަހަރު ހޯދި ހަމައެކަނި ޓީމު ކަމަށްވާ ތިމަރަފުށްޓަކީ އެންމެ ފަހުގެ ޗެމްޕިއަން ވެސްމެ އެވެ. ތިމަރަފުށިން ތަށި ދިފާއުކުރަން ކުރާ މަސައްކަތުގައި މިހާތަނަށް ކުރިމަތިވާނެ އެންމެ ބޮޑު ޓެސްޓަކީ މަތިވެރި މެޗު ކަމަށް ބެލެވެ އެވެ. މަތިވެރި ޓީމަށް ބަލާއިރު، އެ ޓީމަށް އެންމެ ބޮޑު ސަޕޯޓެއް ލިބެނީ ދަނޑު ބޭރުން އެ ރަށުގެ ސަޕޯޓަރުން ދައްކާ ހިތްވަރުންނެވެ. މިހާތަނަށް މަތިވެރިން ކުޅުނު ގިނަ މެޗުތަކެއްގައި ކާމިޔާބު ހޯދުމުގެ ބޮޑު ބާރަކަށް ސަޕޯޓަރުންގެ ނަން ކިޔާނެ އެވެ.
ގަދަ 16 މެޗު 7: ހއ. އިހަވަންދޫ - ދ. ކުޑަހުވަދޫ (މިރޭ 23:15)
ކޯޗު މުހައްމަދު އަނިލްގެ އިރުޝާދުގެ ދަށުން އިހަވަންދޫން ނުކުމެ، ވަނީ އަތޮޅުގެ ޗެމްޕިއަންކަމާއި ޒޯން އެކެއްގެ ތަށި ވެސް އުފުލާލައިފަ އެވެ. މިރޭ ކުޑަހުވަދޫއާ ދެކޮޅަށް ނުކުންނައިރު، މިއީ ފޯރިގަދަ މެޗަކަށްވާނެ އެވެ. ކުޑަހުވަދޫ އަދި މެޗަކުން ބަލިވެފައިނުވާއިރު، އެ ޓީމަަށް ޒޯން ތަށި ގެއްލުނީ ލަނޑުގެ ތަފާތުންނެވެ. ކުޑަހުވަދޫގެ ފާހަގަކޮށްލެވޭ ކުޅުންތެރިއަކީ ޖުމައިލް ޖަލީލް (ޖުމްބެ) އެވެ. އަނެއްކޮޅުން އިހަވަންދޫ ޓީމަށް ބަލާއިރު، ފާހަގަކޮށްލެވޭ ކުޅުންތެރިން އެބަތިބި އެވެ. އޭގެ ތެރޭގައި އިބްރާހިމް ހާމިދު ހިމެނެ އެވެ.
ގަދަ 16 މެޗު 8: ގދ. ވާދޫ - ބ. އޭދަފުށި (މިރޭ 23:15)
ނޮކައުޓް ފުރަތަމަ މެޗުތަކަށްދާއިރު، ބ. އޭދަފުށްޓާއި ވާދޫގެ ކުރިމަތިލުން ވެސް ފޯރިގަދަވާނެ އެވެ. ވާދޫ އިން ވަނީ އަތޮޅު ޗެމްޕިއަންކަން ހޯދުމުގެ އިތުރުން ޒޯންގައި ވެސް ތަފާތު ދައްކައި، ޒޯން ހައެއްގެ ޗެމްޕިއަންކަން ވެސް ހޯދައިފަ އެވެ. ހުނަރަށް ބަލާއިރު އޭދަފުށްޓާއި ވާދޫގައި ވެސް މޮޅެތި ކުޅުންތެރިން އެބަތިބި އެވެ. އެހެން ކަމުން މިރޭ ކުއާޓާ ފައިނަލަށް ދާއިރު، ދެ ޓީމުން ވެސް ބޮޑަށް މަސައްކަތް ކުރަން ޖެހޭނީ ޓީމެއްގެ ގޮތުގައި ކުޅެ، ލިބޭ ފުރުސަތުތަކުގެ ބޭނުން ހިފާށެެވެ.
