މެޑްރިޑް (މާޗް 23) - ސްޕެއިންގެ ޓެނިސް ލެޖެންޑް، ރަފައެލް ނަޑާލްގެ ރިބް އަށް ލިބިފައިވާ އަނިޔާގެ ސަބަބުން އޭނާ މަހަކަށް ވުރެ ގިނަ ދުވަހު ކުޅުމާ ދުރުގައި ހުންނަން ޖެހިއްޖެ އެވެ.
ނަޑާލް، 35، އަށް އަނިޔާވީ ދާދި ފަހުން ކުޅުނު އިންޑިއަން ވެލްސް ސެމީ ފައިނަލުގަ އެވެ. އަދި ފައިނަލުގައި ޓޭލާ ފްރިޓްޒް އަތުން ބަލިވި މެޗުގައި ހާލަތު ބޮޑަށް ގޯސްވި އެވެ.
ސްޕެއިނުގެ ނޫހަކަށް ދިން އިންޓަވިއުއެއްގައި ނަޑާލް ބުނީ ފްރިޓްޒް އަތުން ބަލިވި މެޗުގައި ހާސްވެ، ނޭވާ ނުލެވޭފަދަ ހާލަތަކަށް ވެސް ދިޔަ ކަމަށެވެ.
އެހެންވެ، މުބާރާތް ނިންމާފައި ސްޕެއިނަށް އައިސް ހެދި މެޑިކަލް ޓެސްޓްތަކަށް ފަހު އެނގުނީ ލިބިފައިވާ އަނިޔާއިން ރަނގަޅުވާން ހަ ހަފްތާ ނަގާނެކަމެވެ.
ޖެނުއަރީ މަހު އަހަރުގެ ފުރަތަމަ ބޮޑު މުބާރާތް ކަމަށްވާ، އޮސްޓްރޭލިއަން އޯޕަން ކާމިޔާބުކޮށް ރެކޯޑް، 21 ވަނަ ގްރޭންޑް ސްލޭމް ތަށި އުފުލާލި ނަޑާލް އައީ މި އަހަރު ފެށިފަހުން ރަނގަޅު ފޯމެއް ދަމަހައްޓަމުންނެވެ. މި އަހަރުގެ މެލްބަން ސަމާސެޓް މުބާރާތާއި އޮސްޓްރޭލިއަން އޯޕަން އަދި މެކްސިކަން އޯޕަންގެ ޗެމްޕިއަންކަން ހޯދި ނަޑާލް، އިންޑިއަން ވެލްސް ފައިނަލުން ބަލިވީ ޖެހިޖެހިގެން 20 މެޗުން މޮޅުވަމުން އައުމަށް ފަހު އެވެ.
އަނިޔާގެ ސަބަބުން ނަޑާލަށް މޮންޓެކާލޯ އާއި ބާސެލޯނާގައި ކުޅޭ މުބާރާތުގައި ބައިވެރިނުވެވޭނެ އެވެ.
ނަޑާލް އެނބުރި އަންނާނެ ކަމަށް ބެލެވެނީ މެއި ފުރަތަމަ ހަފްތާގައި ބާއްވާ މެޑްރިޑް މާސްޓާސްގަ އެވެ. ނަޑާލްގެ އެންމެ ބޮޑު ޓާގެޓަކީ މެއި 22 ވަަނަ ދުވަހު ފަށާ އަހަރުގެ ދެ ވަނަ ގްރޭންޑް ސްލޭމް ފްރެންޗް އޯޕަން އެވެ. އެ މުބާރާތް 13 ފަހަރު ކާމިޔާބުކޮށް، ރެކޯޑް ޗެމްޕިއަނެއްގެ ގޮތުގައި އޮތީ ނަޑާލް އެވެ.
އިންޑިއަން ވެލްސް ފައިނަލުގައި ނަޑާލް އަތުން މޮޅުވި ފްރިޓްޒް ވަނީ ކެރިއަރުގައި ފުރަތަމަ ފަހަރަށް ދުނިޔޭގެ ރޭންކިންގެ ގަދަ 10 ތެރެއިން ޖާގަ ހޯދައިފަ އެވެ. ފްރިޓްޒް އޮތީ އަށް ވަަނައިގަ އެވެ.
މި ފަހަރުގެ ރޭންކިންގެ އެންމެ ބޮޑު ބަދަލަކީ ރަޝިއާގެ ޑަނީލް މެޑްވެޑޭވް ފަހަތަށް ޖައްސާލުމަށް ފަހު ސާބިއާގެ ނޮވަކް ޖޮކޮވިޗް އަލުން އެއް ވަނަ އަށް އެރުމެވެ. ކުރިން ހަތަރެއްގައި އޮތް ނަޑާލް، ތިން ވަނަ އަށް އެރީ މިދިޔަ މުބާރާތްތަކުގެ ނަތީޖާތަކަށް ބަލައި، ލިބުނު ޕޮއިންޓްތަކުންނެވެ.
