ލަންޑަން (މާޗް 22) - މި ސީޒަން ނިމުމުން ޕްރޮފެޝަަނަލްކޮށް ރެފްރީކަން ކުރުން ހުއްޓާލުމަށް އިނގިރޭސި މަޝްހޫރު ރެފްރީ މައިކް ޑީން ނިންމައިފި އެވެ.
އިނގިރޭސި މަޝްހޫރު ނޫހެއް ކަމަށްވާ ދި ޓެލެގްރާފުން ކަށަވަރުކޮށްދީފައިވާ ގޮތުގައި ޑީން މި ސީޒަން ނިމުމުން ރެފްރީކަން ކުރުމާ ދުރަށް ޖެހިލާނެ އެވެ.
އުމުރުން 53 އަހަރުގެ ޑީން އަކީ އިނގިރޭސި ޕްރިމިއާ ލީގުގައި އެންމެ ގިނަ މެޗުގައި އިންސާފުކުރުމުގެ ރެކޯޑާއި އެންމެ ގިނަ ރަތް ކާޑު ދެއްކުމުގެ ރެކޯޑް އޮތް އިނގިރޭސި ރެފްރީ އެވެ. ދެހާސް ވަނަ އަހަރުން ފެށިގެން މިހާތަނަށް ރެފްރީކަން ކުރި ޑީން ވަނީ ޕްރިމިއާ ލީގުގެ 553 މެޗެއްގައި ރެފްރީކަން ކޮށްފަ އެވެ. އަދި އެ މެޗުތަކުގައި ޖުމްލަ އެކު 114 ރަތް ކާޑު ވަނީ ދައްކައިފަ އެވެ.
އިނގިރޭސި ބައެއް މީޑިއާ ރިޕޯޓްތައް ބުނާގޮތުން ޑީން ރިޓަޔާކުރާނީ ދަނޑުމަތީގައި ރެފްރީކަން ކުރުމުންނެވެ. އޭނާ ވަނީ ޕްރޮފެޝަނަލް ގޭމް މެޗު އޮފިޝަލްސް (ޕީޖީއެމްއޯއެލް)އާ މަޝްވަރާކޮށް، އަންނަ ސީޒަނުން ފެށިގެން ވީޑިއޯ އެސިސްޓަން ރެފްރީ (ވީއޭއާރް)ގެ އޮފިޝަލްކަން އެކަނި ކުރާގޮތަށް ކެރިއަރު ކުރިއަށް ގެންދަން ހުށަހަޅައިފަ އެވެ.
މިދިޔަ އަހަރު ވެސް ޑީން ރިޓަޔާކުރަން ނިންމި ނަމަވެސް އެ ފަހަރު އެ ނިންމުން ބަދަލުވީ ޕީޖީއެމްއޯއެލްގެ ޗީފް، މައިކް ރައިލީގެ އެދުމުގެ މަތިންނެވެ. ރައިލީ ހުށަހެޅީ އިތުރު އެއް އަހަރު ޑީން ރެފްރީއެއްގެ ގޮތުގައި މަސައްކަތް ކުރުމަށެވެ. އިނގިރޭސި ލީގުގައި މި ވަގުތު 50 އަހަރުން މަތީގެ ރެފްރީންގެ ގޮތުގައި ހަރަކާތްތެރިވަމުން އަންނަނީ މާޓިން އެޓްކިންސަން، ޖޯން މޮސް އަދި ކެވިން ފްރެންޑް އެވެ. ކުރިއަށް އޮތް އަހަރުތަކުގައި މި ރެފްރީން ވެސް މަޑުމަޑުން ރިޓަޔާމަންޓާ މެދު ވިސްނައި، އެ ގޮތަށް ނިންމުމުގެ ފުރުސަތު އެބައޮތެވެ.
ކުކުޅު ފެކްޓަރީއެއްގައި ގާތްގަނޑަކަށް 15 ވަރަކަށް އަހަރު މަސައްކަތް ކުރި ޑީން ވަނީ ގޮލްފްގެ އެކި ލެވަލްތަކުގެ މުބާރާތްތަކުގައި ބައިވެރިވެފަ އެވެ. އަދި އޭނާ އަކީ އިނގިރޭސި ހަތަރު ވަނަ ޑިވިޝަންގެ ކްލަބް ޓްރަންމޭއާ ރޯވާސްގެ އެޑްވައިޒަރީ ރޯލްގައި ހިމެނޭ ފަރާތެކެވެ.
