މެޑްރިޑް (މާޗް 21) - ސްޕެއިން ގައުމީ ޓީމުން ކުރިއަށް ހުރި ބައިނަލްއަގުވާމީ އެކުވެރިކަމުގެ މެޗުތަކަށް ނެގި ސްކޮޑުން މެންޗެސްޓާ ޔުނައިޓެޑްގެ ގޯލްކީޕަރު ޑޭވިޑް ޑެހެއާގެ ބަދަލުގައި ބްރެންޓްފޯޑްގެ ކީޕަރު ޑާވިޑް ރާޔާ ނަގައިފި އެވެ.
ޑެހެއާގެ އިތުރުން ޗެލްސީގެ ސްކޮޑުގައި ހިމެނޭ ދުނިޔޭގެ އެންމެ އަގުބޮޑު ގޯލްކީޕަރު ކެޕާ އަރިއްޒަބަލާގާ އަށް މި ފަހަރުގެ ސްކޮޑުން ވެސް ފުރުސަތު ނެތެވެ. ސްޕެއިން ޓީމުގައި މި ފަހަރު ހިމަނާފައިވާ ތިން ކީޕަރުންނަކީ ރާޔާގެ އިތުރުން ބްރައިޓަން ހޯލްވް އެންޑް އަލްބިއަންގެ ރޮބާޓް ސަންޗޭޒް އަދި އެތުލެޓިކް ބިލްބާއޯގެ އުނާއި ސިމޯން އެވެ.
ސްޕެއިން ޓީމަށް ޑެހެއާ އެންމެ ފަހުން ކުޅުނީ 2020 ވަނަ އަހަރުގެ އޮކްޓޫބަރު މަހުގަ އެވެ. ސްޕެއިނުން މިދިޔަ ނޮވެމްބަރު މަހު ނެގި ސްކޮޑުގައި ޑެހެއާ ހިމެނުނު ނަމަވެސް ކުޅުމުގެ ފުރުސަތު ނުދެ އެވެ. ޔުނައިޓެޑްގައި މި ފަހަރު މޮޅު ސޭވްތަކެއްކޮށް، ރަނގަޅު ފޯމެއް ދަމަހައްޓަމުން އަންނަ ޑެހެއާ ސްޕެއިން ޓީމަށް ނުނެގުމުން ސްޕެއިންގެ ކޯޗު ލުއިސް އެންރީކޭ އަށް ގިނަ ސުވާލުތަކެއް ވަނީ ކުރިމަތިވެފަ އެވެ.
ބްރެންޓްފޯޑް މެޗެއްގެ ތެރެއިން ރާޔާ.
ޑެހެއާގެ ސުވާލުތަކަށް ސީދާ ޖަވާބެއް ދިނުމުގެ ބަދަލުގައި އެންރީކޭ ވަނީ އުމުރުން 26 އަހަރުގެ ރާޔާގެ ކުޅުމަށް ތައުރީފުކޮށްފަ އެވެ. ސްޕެއިނުން ގޯލްކީޕަރުން ލައްވައި، ފައިން ޕާސް ދީގެން އެޓޭކް އެންމެ ފަހަތުން ފަށައިގެން ކުޅޭ ފުޓްބޯޅަ ކުޅޭ ޓީމަކަށް ވާން ކުރާ މަސައްކަތުގައި މުސްތަގުބަލަށް ބަލާއިރު، ރާޔާ އަކީ މުހިންމު ކުޅުންތެރިއަކަށް ވާނެ ކަމަށް އެންރީކޭ ވަނީ ބުނެފަ އެވެ.
ޕްރިމިއާ ލީގުގައި ރާޔާ މި ފަހަރު ކުޅުނު 15 މެޗުން ފަސް ކްލީންޝީޓް ނަގާފައިވާއިރު، ޑެހެއާގެ ބަދަލުގައި އޭނާ ސްޕެއިން ޓީމަށް ނެގުމަކީ އެ ގައުމުގެ މީޑިއާގައި ވަރަށް ގަދަޔަށް ދެކެވެމުން އަންނަ ވާހަކައެކެވެ.
ރާޔާ ބުނީ ކޮންމެ މީހެއް ވެސް އަމިއްލަ ވިސްނުމުގައި ވާހަކަ ދައްކާނެ ކަމަށާއި އޭނާގެ ފޯކަސް އަކީ ލިބިފައިވާ ފުރުސަތުގެ ބޭނުން ހިފުން ކަމަށެވެ.
އަލްބޭނިއާ (26 މާޗް) އާއި އައިސްލެންޑާ (29 މާޗް) ދެކޮޅަށް ސްޕެއިނުން ކުރިއަށް އޮތް ނުވަ ވަރަކަށް ދުވަސް ތެރޭ ކުޅޭ މެޗުތަކަށް ނެގި ސްކޮޑުން ޗެލްސީގެ ވާތުބެކް، މާކޯސް އަލޮންސޯ، ބާސެލޯނާގެ ޕެޑްރީ ގޮންޒާލޭޒް އަދި އެތުލެޓިކޯ މެޑްރިޑްގެ މާކޯސް ލޮރެންޓޭ އަށް ވަނީ ފުރުސަތު ދީފަ އެވެ.
ސްޕެއިން ސްކޮޑުގައި ހިމެނެނީ ކީޕަރުންގެ ގޮތުގައި ސިމޯން، ސަންޗޭޒް، ރާޔާ، އަލޮންސޯ، ޖޯޑީ އަލްބާ، އެރިކް ގާސިއާ، އައިމެރިކް ލަޕޯޓް، ޕައު ޓޮރޭޒް، ޑިއޭގޯ ލޮރެންޓޭ، ސެޒާ އަޒްޕިލިކުއޭޓާ، ޑަނީ ކާވަހާލް، ރޮޑްރީ، ކޯކޭ، ލޮރެންޓޭ، ޕެޑްރީ، ގަވީ، ކާލޮސް ސޮލެއާ، ޑަނީ އޮލްމޯ، ޕަބްލޯ ސަރާބިއާ، އަލްވާރޯ މޮރާޓާ، ރައުލް ޑެ ޓޯމާސް، ފެރާން ޓޮރޭޒް އަދި ޔެރެމީ ޕީނޯ އެވެ.
