މެޑްރިޑް (މާޗު 21) - ސްޕެނިޝް ލަލީގާގައި ރޭ ވާދަވެރި ރެއާލް މެޑްރިޑް އަތުން އެ ޓީމުގެ ދަނޑުގައި 4-0 އިން ބާސެލޯނާ މޮޅުވުމުން، ބާސެލޯނާއާ މެދު އޮތް އުންމީދުތައް އާވެއްޖެ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ރެއާލްގެ އަތުން ރޭ ބާސެލޯނާ އިން ބޮޑު މޮޅެއް ހޯދީ ގެބޮންގެ ފޯވަޑް ޕިއޭ އެމްރިކް އޮބާމަޔަން ޖެހި ދެ ލަނޑާއި، ފެރާން ޓޯރޭޒް އަދި ރޮނާލްޑް އަރައުހޯ ޖެހި ލަނޑުތަކުންނެވެ.
ރޭގެ މެޗަކީ ޒަވީ ބާސެލޯނާގެ ކޯޗުކަމާ ހަވާލުވި ފަހުން ކުޅުނު "އެލް ކްލެސިކޯ"ގެ ދެ ވަނަ މެޗެވެ. ފުރަތަމަ މެޗުން ވަނީ ޖެނުއަރީ މަހު ސްޕެނިޝް ސުޕަ ކަޕް ސެމީގައި ބަލިވެފަ އެވެ. އެހެންވެ، ރޭގެ ކްލަސިކޯ މެޗު ބެލެވިފައި އޮތީ، ޒަވީގެ އިރުޝާދުގެ ދަށުން ބާސެލޯނާ އިން ހޯދާފައިވާ ކުރިއެރުން ވަޒަންކޮށްލެވޭނެ މެޗަކަށެވެ. މި މެޗުން، ސާބިތުވި އެއް ކަމަކީ ޒަވީގެ އިރުޝާދުގެ ދަށުން، ބާސެލޯނާ އަކީ އަންނަ ސީޒަންގައި ލީގު ތައްޓަށް ވާދަކުރެވޭ ފެންވަރުގެ ޓީމެއްގެ ގޮތުގައި ބެލެވޭނެ ކަމެވެ.
"މިއީ މިހާރައި ކުރިއަށް އޮތް ތަނުގައި، ބާސެލޯނާ އަށް ކުރިއެރުންތަކެއް ހޯދުމުގެ މަގު ފަހިގެންދިޔަ މެޗެއް،" މެޗަށް ފަހު ބާސާގެ ކުރީގެ ކެޕްޓަން ޒަވީ ބުންޏެވެ. "މި މެޗުގައި ގިނަ ފުރުސަތުތައް ހޯދީ ބާސެލޯނާ އިން އަދި މާ ރަނގަޅަށް ކުޅުނު. މިއަށްވުރެ ތަފާތު ބޮޑު ނަތީޖާއެއް ބާސާ އަށް ހައްގު."
ބާސާގެ ރަން ޒަމާން އަލުން ފެށުނީތޯ ނޫސްވެރިއެއް އެހުމުން ޒަވީ ބުނީ "ޓީމު އޮތީ ރަނގަޅު މަގުގައި" ކަމަށެވެ.
ލީގު ތާވަލްގެ އެއްވަނައިގައި އޮތް ރެއާލާއި ބާސެލޯނާގެ ދެމެދުގައި އޮތް ފަރަގު ބޮޑުވިޔަސް، ޒަމާންވީ ވާދަވެރިން އަތުން އަމިއްލަ ދަނޑުގައި ލަދުވެތި ގޮތަކަށް ބަލިވުމަކީ ރެއާލަށް ކުރިމަތިވާނެ ޕްރެޝަރެކެވެ.
މެޗަށް ފަހު ރެއާލްގެ ކޯޗު ކާލޯ އަންޗެލޮޓީ ބުނީ މެޗަށް ޓީމު ރޭވުމުގައި އޭނާ އަށް ގޯސްތަކެއް ހެދުނު ކަމަށާއި ސަޕޯޓަރުންގެ ކިބައިން މާފަށް އެދޭ ކަމަށެވެ.
"އަހަރެމެންގެ ކުޅުން ވަރަށް ރަށް. އަހަންނަށް ޓީމު ރޭވުމުގައި ވެސް ގޯސްތަކެއް ހެދުނު. އަހަރެން މާފަށް އެދެން. ވަރަށް ދެރަވެއްޖެ މި ނަތީޖާއާ ގުޅިގެން،" އަންޗެލޮޓީ ބުންޏެވެ. -- އޭއެފްޕީ
