ލަންޑަން (މާޗް 20) - އިނގިރޭސި އެފްއޭ ކަޕްގެ ސެމީ ފައިނަލުގައި މެންޗެސްޓާ ސިޓީ އާއި ލިވަޕޫލް ބައްދަލުކުރަން ޖެހިއްޖެ އެވެ.
ކުއާޓާ ފައިނަލުގެ ފަހު ތިން މެޗު މިރޭ ކުޅުނުއިރު، ލިވަޕޫލުން ވަނީ 1-0 އިން ނޮޓިންހަމް ފޮރެސްޓް ދަނޑުގައި މޮޅުވެފަ އެވެ. މެންޗެސްޓާ ސިޓީން ސައުތެމްޓަން ދަނޑުގައި ކުރިހޯދީ 4-1 އިންނެވެ. އަދި ފްރޭންކް ލަމްޕާޑް ކޯޗުކޮށްދޭ އެވަޓަން އަތުން 4-0 އިން މޮޅުވީ ޕެޓްރިިކް ވިއެރާ ހަވާލުވެހުރި، ކްރިސްޓަލް ޕެލަސް އެވެ. ރޭ ޗެލްސީން ވަނީ 2-0 އިން މިޑްލްސްބަރާ ބަލިކޮށްފަ އެވެ.
ސެމީ ފައިނަލް މެޗުތައް އޮންނާނީ އަންނަ މަހުގެ 16 އާއި 17 ވަނަ ދުވަހު އެވެ. ލިވަޕޫލާއި ސިޓީ އަކީ މި ފަހަރުގެ ޕްރިމިއާ ލީގާއި ޗެމްޕިއަންސް ލީގުގައި ވެސް ފޭވަރިޓުންގެ ގޮތުގައި އޮތް ދެ ޓީމެވެ. އެ ދެ ޓީމު އެފްއޭ ކަޕްގެ ސެމީގައި ކުޅޭ މެޗު ފޯރިގަދަވާނެ އެވެ. އަންނަ މަހުގެ ތެރޭގައި ޕްރިމިއާ ލީގުގައި ވެސް މި ދެ ޓީމު ބައްދަލުކުރާނެ އެވެ.
މި ފަހަރު ލީގު ކަޕް ޗެމްޕިއަންކަން ހޯދި ލިވަޕޫލަށް މިރޭ ނޮޓިންހަމް ބަލިކުރި ގޯލު ޖަހައިދިިނީ 78 ވަނަ މިނިޓްގައި ކޮސްޓާސް ސިމިކާސް ނެގި ހުރަހަކުން ޑިއޯގޯ ޖޮޓާ އެވެ. މިއީ ޖޮޓާ، މި ސީޒަނުގެ ހުރިހާ މުބާރާތެއްގައި ޖެހި 19 ވަނަ ގޯލެވެ. ޖޮޓާ އަކީ މި ވަގުތު ޔޫރަޕްގެ ވަރުގަދަ ފަސް ލީގަށް ބަލާއިރު، އެންމެ ގިނަ ގޯލު ޖެހި ޕޯޗުގީސް ކުޅުންތެރިޔާ އެވެ. މެންޗެސްޓާ ޔުނައިޓެޑްގެ ތަރި، ކްރިސްޓިއާނޯ ރޮނާލްޑޯ ވަނީ 18 ގޯލު ޖަހައިފަ އެވެ.
ނޮޓިންހަމް ފޮރެސްޓުން މި ފަހަރުގެ އެފްއޭ ކަޕްގައި އާސެނަލާއި ލެސްޓާ ސިޓީ ކަޓުވާލިއިރު، ދެއްކި ފަދަ ހިތްވަރެއް މިރޭ ލިވަޕޫލް ކައިރީގައި ވެސް ވަނީ ތަކުރާރުކޮށްފަ އެވެ. ލަނޑުޖަހަން ތަނަވަސްކުރި ފުރުސަތުތަކުގެ ބޭނުން ނުހިފުނީ އެވެ.
ސައުތެމްޓަން ކޮޅަށް ސިޓީގެ ރަހީމް ސްޓާލިން ގޯލު ޖަހައިދީފައިވަނިކޮށް ސައުތެމްޓަނުން އެއްވަރުކުރި ގޯލަކީ ސިޓީގެ އައިމެރިކް ލަޕޯޓް އަތުން ބައިކޮޅަށް ވަން ގޯލުންނެވެ. އަލުން ސިޓީން ލީޑުނެގީ ކެވިން ޑިބްރޭނާ ވައްދާލި ޕެނަލްޓީންނެވެ. އޭގެ ފަހުން ސިޓީގެ ފިލް ފޯޑެން އާއި ރިޔާދު މާރޭޒް ވަނީ ގޯލުތައް ޖަހައި، ސިޓީ އަށް ސެމީގެ ޖާގަ ޔަގީންކޮށްދީފަ އެވެ.
ޕެލަސް އިން އަމިއްލަ ދަނޑުގައި އެވަޓަންއާ ދެކޮޅަށް މޮޅަށް ކުޅުނެވެ. އެ ޓީމުގެ ގޯލުތައް ޖެހީ މާކް ގޭހީ، ޖިއާން ފިލިޕް މަޓޭޓާ، ވިލް ހިއުސް އަދި ވިލްފްރިއެޑް ޒަހާ އެވެ.
