ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް މުބާރާތުގައި ރޭ ކުޅުނު މެޗުތަކަށް ފަހު އދ. މާމިގިއްޔާއި ގދ. ވާދޫ އަދި ކ. ގާފަރު ޒޯން ޗެމްޕިއަންކަން ހޯދައިފި އެވެ.
ރޭ ކުޅުނު މެޗުތަކުގެ ނަތީޖާ އަށް ބަލާއިރު، ޒޯން ހަތަރެއްގައި ދިއްގަރުން ވަނީ 3-1 އިން އދ. އޮމަދޫ އަތުން މޮޅުވެފަ އެވެ. މާމިގިލިން އެ ޒޯންގެ ޗެމްޕިއަންކަން ހޯދީ ރޭ މ.މުލަކު އަތުން 9-4 އިން މޮޅުވެގެންނެވެ. ދިއްގަރަށް ވެސް ވަނީ އަނެއް ބުރުން ފުރުސަތު ލިބިފަ އެވެ. ޒޯން ތިނެއްގައި ގާފަރާއި އއ. މަތިވެރި ކުޅުނު މެޗު ލަނޑެއް ނުޖެހި އެއްވަރުވިއިރު، ޒޯން ޗެމްޕިއަންކަން ގާފަރަށް ވަނީ ލިބިފަ އެވެ. އެ ޒޯނުން ގަދަ 16 ބުރަށް މަތިވެރި ވަނީ ހޮވިފަ އެވެ. އަދި ރޭ އެ ޒޯނުގައި ރޭ ކ. ކާށިދޫން ވަނީ 5-1 އިން ޅ. ހިންނަވަރު ބަލިކޮށްފަ އެވެ.
ގދ. ވާދޫ އިން 2-1 އިން ގއ. މާމެންދޫ ބަލިކޮށް ޒޯން ހައެއްގެ ޗެމްޕިއަންކަން ހޯދިއިރު، ރޭ އެ ޒޯނުގައި ގއ. ކޮނޑޭ ވަނީ 2-1 އިން ލ. ގަން ބަލިކޮށްފަ އެވެ. އަނެއް ބުރަށް ދިޔައީ ވާދޫގެ އިތުރުން ކޮނޑޭ އެވެ.
މާމިލީގެ ކުޅުންތެރިން ޒޯން ތަށި ލިބުމުން އުފާފާޅުކުރަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި ދިއްގަރުގެ ގޯލުތައް ޖެހީ މުހައްމަދު ސާގިބް، ނޫހު މައްސޫދު އަދި އަލީ މާޖިދު އެވެ. އޮމަދޫގެ ގޯލުތައް ޖެހީ އަބްދުﷲ އަރުޖަމް އެވެ. މެޗުގެ މޮޅު ކުޅުންތެރިއަކީ ދިއްގަރުގެ ނޫހު އެވެ.
މާމިގިލިން މުލަކު ކޮޅަށް ޖެހި ނުވަ ގޯލުގެ ތެރެއިން ފަސް ގޯލު ޖަހައި، މެޗުގެ މޮޅު ކުޅުންތެރިޔާގެ މަގާމު ހޯދީ ހައިޝަމް އަރީފް އެވެ. އަނެއް ގޯލުތައް ޖެހީ މޫސާ ހަސަން ފުޅު، އުނައިޒް ގާސިމް، ހިސާމް ސަލީމް (ކޮކީ) އަދި އަހުމަދު ނިޒާމް (ނިޒާމްބެ) އެވެ. އަދި މުލަކުގެ ގޯލުތައް ޖެހީ އަހުމަދު ރަޝީދާއި އާދަމް ޝަހީމް (އާނާ) ކޮންމެ ކުޅުންތެރިއަކު ދެ ގޯލެވެ.
ޒޯން ހަތަރެއްގެ މޮޅު ކުޅުންތެރިޔާ އާއި އެންމެ ގިނަ ލަނޑު ޖެހި ކުޅުންތެރިޔާގެ ޓްރޮފީ ލިބުނީ މާމިގިލީގެ ހައިޝަމް އަށެވެ.
ހިންނަވަރު ކޮޅަށް ކާށިދޫން ގޯލުތައް ޖެހީ މެޗުގެ މޮޅު ކުޅުންތެރިޔާ ޝައްފާން ހަލީމާއި ކެޕްޓަން އަބްދުﷲ ސުޒޭރު، އަހުމަދު ނިސާހުގެ އިތުރުން އަހުމަދު ނާސިހު ދެ ގޯލެވެ. ހިންނަވަރުގެ ގޯލު ޖެހީ އިބްރާހިމް ނިހާމް އުސްމާން އެވެ. މަތިވެރިން ޖެހި ގިނަ ހަމަލާތަކެއް ހުއްޓުވި ކ. ގާފަރު ޓީމުގެ ގޯލްކީޕަރު ފައްޔާޒް ފަޔާޒް (ފައިއްޓެ) އަށް ވަނީ މެޗުގެ މޮޅު ކުޅުންތެރިޔާގެ މަގާމު ލިބިފަ އެވެ.
މި ޒޯނުގެ އެންމެ ގިނަ ގޯލު ޖެހި ކުޅުންތެރިންނަކީ ގާފަރުގެ އަލީ މާއިސް (މައްޓު)، ގައިސާން އަބޫބަކުރު މާހިރު އަދި އއ. މަތިވެރި ޓީމުގެ މުހައްމަދު އިމްރާން (ކުޑަ އިންމަ) އެވެ. އެންމެ މޮޅު ކުޅުންތެރިއަކީ މައްޓު އެވެ.
ގާފަރުން ވަނީ ކ. އަތޮޅުގެ ޗެމްޕިއަންކަމުގެ އިތުރުން ޒޯން ތިނެއްގެ ޗެމްޕިއަންކަން ވެސް ހޯދާފައި.-- ފޮޓޯ: ގޯލްޑަން ފުޓްސަލް އެސޯސިއޭޝަން
ވާދޫ ޓީމަށް ގޯލުތައް ޖަަހައިިދިނީ މެޗުގެ މޮޅު ކުޅުންތެރިޔާ މުސައްނިފު މުހައްމަދު (މުއްސަ) އާއި އަހުމަދު ނަޝާހު (ނައްޓު) އެވެ. މާމެންދޫގެ ހަމައެކަނި ގޯލު ޖެހީ އަހުސަމް ހަސަން ދީދީ އެވެ. ގއ. ކޮނޑޭ އިން ގަން ބަލިކުރިއިރު، ދެ ގޯލު ޖެހީ އިނާން އަހުމަދު (ބަޓުކް) އާއި ޝިފާޒް އާދިލް (ތުއްތު) އެވެ. ގަމުގެ ހަމައެކަނި ގޯލު ޖެހީ ހަސަން ފައްވާޒް އެވެ.
ޒޯން ހައެއްގައި އެންމެ ގިނަ ގޯލު ޖެހި ކުޅުންތެރިންނަކީ ވާދޫގެ މުހައްމަދު އިޔާދު އަލީ އާއި ކޮނޑޭގެ ތުއްތު އެވެ. މޮޅު ކުޅުންތެރިއާގެ ޓްރޮފީ ވެސް ހޯދީ އިޔާދު އެވެ.
މުބާރާތުގައި މިރޭ ވެސް ފޯރިގަދަ ހަ މެޗެއް ކުޅޭނެ އެވެ. އެ ގޮތުން 20:15 ގައި ފަށާނީ ޒޯން ފަހެއްގެ މެޗުތަކެވެ. އެންމެ ފަހުގެ ޗެމްޕިއަން ތިމަރަފުށިން ނުކުންނާނީ ފ. ބިލެއްދޫއާ ދެކޮޅަށެވެ. އެ ވަގުތު އެ ޒޯންގެ އަނެއް މެޗުގައި ދ. ކުޑަހުވަދޫން ކުޅޭނީ ތ. އޮމަދޫއާ އެވެ. އޭގެ އެއް ގަޑިއިރު ފަހުން މާލެ ޒޯންގެ ދެ މެޗު ކުޅޭނެ އެވެ. ހެންވޭރާއި މާފަންނު ކުޅޭއިރު، ހުޅުމާލެ ނުކުންނާނީ ވިލިމާލެއާ ދެކޮޅަށެވެ. ފަހު މެޗުތައް 22:15 ގައި ކުޅޭއިރު، ހއ. އިހަވަންދޫ ކުޅޭނީ ށ. ކަނޑިތީމާ ދެކޮޅަށެވެ. އަދި ނ،. ކުޑަފަރި އާއި ރ. ދުވާފަރު ބައްދަލުކުރާނެ އެވެ.
