ސްރީ ލަންކާގައި މިރޭ ނިމުނު ކޮމަންވެލްތު ބީޗްވޮލީބޯޅަ ކޮލިފައިންގައި ރާއްޖޭން ވާދަކުރި އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)ގެ ޕެއާ ރިހި މެޑަލާ އެކު ކޮލިފައިން ނިންމާލައިފި އެވެ. ޗެމްޕިއަންކަން ނުލިބުމުން ރާއްޖޭގެ ޕެއާ ކޮމަންވެލްތު ގޭމްސް އަށް ކޮލިފައިނުވެ އެވެ.
މިއީ 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ފަހު ބީޗް ވޮލީބޯޅަ އަށް އަށް ލިބުނު ފުރަތަމަ މެޑަލް އެވެ. އެ ފަހަރު ޓީމު ބައިން ރިހި މެޑަލް ހޯދިއިރު، އިންޑިވިޖުއަލް ބައިން އެޑަމް އާއި ޝިއުނާޒް އަބްދުލް ވާހިދު (މަންކޭ) ވަނީ ލޯ މެޑަލް ހޯދައިފަ އެވެ. މަންކޭ މި ވަގުތު ހުރީ ޓީމުގެ މެނޭޖަރަކަށެވެ.
ރާއްޖެ، ސްރީ ލަންކާ، މެލޭޝިއާ އަދި ސިންގަޕޫރްގެ ދެމެދުގައި ކޮމަންވެލްތު ކޮލިފައިން ބޭއްވީ ނިގަމްބޯ ބީޗް ކޯޓުގަ އެވެ. ޗެމްޕިއަންކަން ހޯދާ ޓީމަކަށް އެކަނި މި އަހަރު ޖުލައި މަހު އިންގްލެންޑްގެ ބާމިންހަމްގައި ބާއްވާ ކޮމަންވެލްތު ގޭމްސް އިން ފުރުސަތު ލިބޭ ގޮތަށް އޮތްއިރު، މިރޭގެ ފައިނަލުގައި އެޑަމް އާއި ކުޑަކާއްޓެގެ ޕެއާ ބަލިވީ ލަންކާގެ އަޝެން އާއި މަލިންތާގެ ޕެއާ އަތުން 21-13، 21-13 އިންނެވެ.
ކުޑަކާއްޓެ ބުނީ މިއީ އެންމެ ބޭނުންވާ ނަތީޖާ ނޫން ކަމަށާއި އެކަމަކު، އެޑަމްއާ އެކު ދެ ވަނަ މުބާރާތުގައި ކުޅެ، މި ލިބުނު ރިހި މެޑަލަކީ ފެށުމެއްގެ ގޮތުގައި ދެކޭ ކަމަށެވެ.
އެޑަމް އާއި ކުޑަކާއްޓެ ޕެއާއެއްގެ ގޮތުގައި އެންމެ ފުރަތަމަ މުބާރާތެއް ކުޅުނީ މިދިޔަ މަހު ލަންކާގައި ބޭއްވި ސެންޓްރަލް ޒޯން ބީޗް ވޮލީބޯޅަ މުބާރާތުގަ އެވެ.
މިއީ ގައުމީ ބީޗްވޮލީބޯޅަ ޓީމުގެ ކޯޗުކަމަށް ގެނައި ބްރެޒިލްގެ މަތީ ފެންވަރުގެ ކޯޗު ވިނީޝިއުސް މާޓިން ގެނައި ފަހުން ގައުމީ ޓީމުގެ ދެ ވަނަ މުބާރާތެވެ. މީގެ ދެ މަހެއްހާ ދުވަސް ކުރިން ބީޗް ވޮލީބޯޅަ ޓީމަށް ދުނިޔޭގެ ވޮލީބޯޅަ ފެޑެރޭޝަން (އެފްއައިވީބީ) އިން ހަމަޖައްސައިދިން ކޯޗު ވިނީޝިއުސް ހުރީ ދެ އަހަރުގެ ކޮންޓްރެކްޓެއްގަ އެެވެ.
ލަންކާ މުބާރާތުގައި އެޑަމް އާއި ކުޑަކާއްޓޭގެ މެޗުތަކަށް ބަލާއިރު، ލަންކާގެ ޕެއާ އަޝެން އާއި މަލިންތާގެ ޕެއާ އަތުން އެޑަމް އާއި ކުޑަކާއްޓެގެ ޕެއާ ފުރަތަމަ މެޗުން ބަލިވީ 21-18 އާއި 21-15 އިންނެވެ. އެކަމަކު، ދެ ވަނަ މެޗުގައި އިއްޔެ ހަވީރު ވަނީ ސިންގަޕޫރުގެ ޒިހާއޯ އާއި ރޭމެންގް ގެ ޕެއާ އަތުން 21-12، 21-08 އިން މޮޅުވި އެެވެ. އެހެން ނަމަވެސް މިއަދު ހެނދުނު މެލޭޝިއާގެ ޕެއާ، ޝޮން އާއި ސިމް އަތުން އެޑަމް އާއި ކުޑަކާއްޓެގެ ޕެއާ ބަލިވީ 19-21، 18-21 އިންނެވެ.
ނަތީޖާތަކަށް ފަހު ޖުމްލަ ރޭންކިން އަށް ބެލިއިރު، ރާއްޖެ އާއި ސިންގަޕޫރު އަދި މެލޭޝިއާ އޮތީ މެޗުގެ ނަތީޖާ ޕޮއިންޓުން އެއްވަރުވެފަ އެވެ. އެކަމަކު، ސްކޯ ޕޮއިންޓް ތާވަލުގެ ރޭންކިން އަށް ބަލައިގެން ފައިނަލުގެ ޖާގަ ލިބުނީ އެޑަމް އާއި ކުޑަކާއްޓެ އަށެވެ.
ކޯޗު ވިނީޝިއުސްއާ އެކު ދެން ގަވާއިދުން ޓްރެއިނިން ހަދަމުން އަންނަ ޕެއާ އަކީ ރާއްޖޭގެ ގައުމީ ޗެމްޕިއަން ކަމަށްވާ، އަހުމަދު މުހައްމަދު (ކޯކޭ) އާއި މުހައްމަދު އަލީ (ޑެންޒޯ)ގެ ޕެއާ އެވެ. ކޮމަންވެލްތު ކޮލިފައިން ކުރިން ގަތަރުގައި ކޭމްޕްކުރިއިރާއި މުބާރާތުގެ ދަތުރުގައި ވެސް، ޑެންޒޯ އާއި ކޯކޭގެ ޕެއާ ބައިވެރިވި އެވެ.
