ކްރިކެޓް ބޯޑް އޮފް މޯލްޑިވްސް (ސީބީއެމް) އިން ކޮންމެ ރޯދަ މަހަކު ބާއްވާ ކްރިކެޓް ކާނިވަލްގައި ބައިވެރިވުމުގެ ފުރުސަތު ހުޅުވާލައިފި އެވެ.
ސީބީއެމް އިން ރޯދަ މަހު ބާއްވާ ފޯރިގަދަ ކްރިކެޓް ކާނިވަލުގައި ބައިވެރިވުމުގެ ފުރުސަތު އާންމުކޮށް ހުޅުވާލާފައިވަނީ މި މަހު 25 ވަނަ ދުވަހާ ހަމައަށެވެ. ބައިވެރިވުމުގެ ފުރުސަތު އޮތީ އޯޕަން ބައިން 12 ޓީމާއި ސަރުކާރު އޮފީސްތަކުން އަށް ޓީމަކަށާއި ކުންފުނިތަކުގެ ތެރެއިން 16 ޓީމަކަށެވެ.
ގަވާއިދުގައި ހިމަނާފައިވާ ބައިތަކަށް ބަލާއިރު، އޯޕަން ބައިގައި ޓީމަކަށް ގިނަވެގެން ގައުމީ ޓީމުގެ ދެ ކުޅުންތެރިންނަށް ކުޅެވިދާނެ އެވެ. ސަރުކާރު އޮފީސްތަކުގެ ޓީމުތަކަށް ގިނަވެގެން ބިދޭސީ ދެ ކުޅުންތެރިންނަށް ކުޅެވިދާނެ އެވެ. ކުންފުނިތަކުގެ ކެޓަގަރީ ވަނީ ކުޅުންތެރިން ރަޖިސްޓްރީ ކުރުމުގައި ދޫކޮށްލައިފަ އެވެ.
ކޮންމެ ކެޓަގަރީއެއްގައި ޓީމު ބައިވެރިކުރުމަށް ވެސް ފީއެއް ނަގާގޮތަށް ސީބީއެމް އިން ވަނީ ހަމަޖައްސައިފަ އެވެ. އެ ގޮތުން އޯޕަން ބައިގެ ޕާޓިސިޕޭޝަން ފީ އަކީ 1000 ރުފިޔާ އެވެ. ސަރުކާރު އޮފީސްތަކުގެ ބައިން ބައިވެރިވުމުގެ ފީ އަކީ 1500 ރުފިޔާ އެވެ. އަދި ކުންފުނިތަކުގެ ބައިން ބައިވެރިވުމުގެ ފީ އަކީ 5000 ރުފިޔާ އެވެ.
މުބާރާތުގެ ވަނަތަކަށް ދޭ ފައިސާގެ އިނާމަށް ބަލާއިރު، އޯޕަން ބަޔާއި ސަރުކާރުގެ އޮފީސްތަކުގެ ބައިގެ ތެރެއިން ކޮންމެ ޗެމްޕިއަން ޓީމަކަށް 8000 ރުފިޔާ ދޭނެ އެވެ. ކޮމްޕެނީތަކުގެ ބައިން ޗެމްޕިއަން ޓީމަށް 30،000 ރުފިޔާ ދޭ ގޮތަށް ވަނީ ނިންމައިފަ އެވެ.
ކްރިކެޓް ކާނިވަލުގައި ބައިވެރިވުމަށް އެދޭ ފޯމު، www.maldivescricket.org އިން ޑައުންލޯޑް ކުރެވޭނެ އެވެ.
ސީބީއެމް އިން ވަނީ މި އަހަރު ޖެނުއަރީ މަހު ޓީ20 ކްރިކެޓް މުބާރާތެއް ބާއްވައިފަ އެވެ. އަދި މިހާރު ޓީ10 ކްރިކެޓް މުބާރާތެއް ކުރިއަށްދާއިރު، މޯލްޑިވްސް ސްޕޯޓްސް އެވޯޑްސް ހަފްލާ ބާއްވަން ކުޅިވަރު އެކުވެނި އެއް ނަމްބަރު ދަނޑު ޔޫތު މިނިސްޓްރީން ނެގުމުން ޓީ10 މުބާރާތުގެ ދެ ސެމީ ފައިނަލާއި ފައިނަލް މެޗު ކުރިއަށްދާނީ މި މަހު 25 އާއި 26 ވަނަ ދުވަހު އެވެ.
