ލަންޑަން (މާޗު 15) - ޗެލްސީގެ ކޯޗުކަމުގެ މަގާމުގައި މި ސީޒަންގެ ނިޔަލަށް ދެމިހުންނާނެ ކަމުގެ ޔަގީންކަން ދިން ނަމަވެސް، އެ ކްލަބާއެކު އޮތް މުސްތަގްބަލާ މެދު ޗެލްސީގެ ކޯޗު ތޯމަސް ޓުޗެލް "ފިނި" ޖަވާބެއް ދީފި އެވެ.
ރަޝިއާ އިން ޔޫކްރޭނާ ދެކޮޅަށް ކުރަމުންދާ ހަނގުރާމައާ ގުޅިގެން، ޗެލްސީގެ ވެރިޔާ، ރަޝިއާގެ މަހުޖަނު، ރޯމަން އަބްރަމޮވިޗް، އިނގިރޭސިވިލާތުގައި ކުރަމުން އަންނަ ވިޔަފާރިތައް ހުއްޓާލާން އެންގުމުގެ ސަބަބުން ޗެލްސީ އަށް ވަނީ ބޮޑު އަސަރެއްކޮށްފަ އެވެ. ރަޝިއާގެ ރައީސް ވްލަޑިމިއާ ޕުޓިންއާ ގާތްގުޅުމެއް އޮންނަ، އަބްރަމޮވިޗާ ދެކޮޅަށް އިނގިރޭސި ސަރުކާރުން ފިޔަވަޅު އެޅީ އެ ކްލަބު ވިއްކާލުމަށް އޭނާ މަސައްކަތް ފަށާފައި ވަނިކޮށެވެ. ފިޔަވަޅުތަކާ ގުޅިގެން، ޗެލްސީ ވިއްކާލުން ވެސް ވަނީ މަޑުޖެހިފަ އެވެ.
މި ފިޔަވަޅުތަކާ ގުޅިގެން، ޗެލްސީ އަށް އާމްދަނީ ހޯދުމަށް އޮތް މަގުތައް ވަނީ ގާތްގަނޑަކަށް ބަންދުވެފަ އެވެ. ޓްރާންސްފާތައް ހިންގުމުގެ މަގު ބަންދުވެފައިވާއިރު، ކުޅުންތެރިންގެ ކޮންޓުރެކްޓްތައް ވެސް އާނުކުރެވެ އެވެ. އެހެންކަމުން، މާލީ ގޮތުން އެ ކްލަބު އަނދަވަޅަކަށް ވެއްޓުމުގެ ބިރު އޮތީ ބޮޑުވެފަ އެވެ.
އިނގިރޭސި ޕްރިމިއާ ލީގުގައި އާދިއްތަ ދުވަހުގެރޭ ނިއުކާސަލް ޔުުނައިޓަޑް އަތުން 1-0 އިން ޗެލްސީ މޮޅުވެ، ސަޕޯޓަރުންނަށް ކޮންމެ ވެސް ވަރެއްގެ ހިތްހަމަޖެހުމެއް ލިބުނު ނަމަވެސް، ކްލަބުގެ މުސްތަގުބަލާ މެދު ކުރަމުންދާ އުފެދިފައިވާ އޮތް ނުތަނަވަސްކަން ފިލައެއް ނުދެ އެވެ. ޗެލްސީގެ ކުޅުންތެރިންގެ އިތުރުން، ކޯޗުގެ މުސްތަގްބަލާ މެދު ވެސް އޮތީ ސުވާލު އުފެދިފަ އެވެ.
މެޗަށް ފަހު ނޫސްވެރިންނާ ވާހަދައްކަމުން، ޓުޗެލް ބުނީ މި ސީޒަންގެ ނިޔަލަށް އެ ކްލަބުގެ ކޯޗުގެ މަގާމުގައި ދެމިހުންނާނެ ކަމަށެވެ. އެކަމަކު، މި ސީޒަނަށް ފަހު އެ ކްލަބުގައި މަޑުކުރުމާމެދު ސުވާލުކުރުމުން، އޭނާ އެކަމާމެދު ސީދާ ޖަވާބެއް ނުދިނެެވެ.
"ހަމަ ޔަގީނުން ވެސް މި ސީޒަންގެ ނިޔަލަށް އަހަރެން މި ކްލަބުގައި މަޑުކުރާނަން،" ޕީއެސްޖީ އާއި ބޮރޫޝިއާ ޑޯޓްމަންޑަށް ކުރިން ކޯޗުކޮށްދިން ޓުޗެލް ބުންޏެވެ.
"ދެން ދުވަހަކަށް ފަހު ދުވަހެއް ކަންތައްތައް ދާ ގޮތެއް ބަލަމާ. ކަންތައްތައް ބަދަލުވާނެ ގޮތެއް ނޭނގެ."
ޗެލްސީ އަށް ޗެމްޕިއަންސް ލީގާއި ފީފާ ކްލަބު ވޯލްޑް ކަޕް އަދި ޔުއެފާ ސުޕަ ކަޕް ހޯދައިދީފައިވާ ޓުޗެލް މެންޗެސްޓާ ޔުނައިޓަޑަށް ބަދަލުވާން އުޅޭ ކަމުގެ އަޑުތަކެއް ވެރސް ވަނީ ފެތުރިފަ އެވެ.
ޓުޗެލް ބުނީ ސަޕޯޓަރުންނާއި ކްލަބުގައި ޝާމިލުވެ އުޅޭ ފަރާތްތަކުގެ މެދުގައި ނުވަތަނަވަސްކަން ބޮޑުވެފައިވާ ދުވަސްވަރެއްގައި، އެ ފަރާތްތަކަށް ހިތްހަމަޖެހުމެއް ގެނެވޭނީ ޗެލްސީގެ ޓީމު ވަރުގަދަ ރޫހެއްގައި މަސައްކަތް ކޮށްގެން ކަމަށެވެ. -- އޭއެފްޕީ
