ހުވަދުއަތޮޅުގެ އެންމެ ދެކުނުގައި އޮތް ގައްދޫގެ މި ޒުވާނުންގެ ކޮންމެ ދުވަހެއް ފުރިހަމަވަނީ ރަށުގެ ފުއްޓަރު ފަރާތުން ނަގާ ރާޅުތަކުގެ ތެރޭގައި ވަގުތު ހޭދަކޮށްލުމުންނެވެ. ފިލާގަނޑެއް ހިފައިގެން އޭނާ އެ ރާޅުތަކުގެ ފޮނުގަނޑު މެދުން އުނދުހިލާފައި އެ ދަނީ މިކަމުން ލިބޭ ހިތްހަމަޖެހުމާ އުފާވެރިކަމުގެ ބޮޑުކަމުންނެވެ. ކޮންމެ ދުވަހަކީ އާ ހުނަރެއް ދަސްކޮށް އެކަމުގެ ތެރެއަށް އިތުރަށް ހިތްޖެހޭ ދުވަހެއް ކަމަށް ބަލައިގެން ދިޔައީ ކުރިއަށެވެ. ފަރުމައްޗާ ދިމާލުން ނަގާ ރާޅުގެ ބިޔަކަމާއި އުސްކަމަކަށް އޭނާ ފަރުވާލެއް ނެތެވެ. ހިތުގައި ބިރުވެރިކަމެއްވެސް ނެތެވެ. އެ އަށް ވުރެ ބޮޑަށް މިކަމުން އޭނާއަށް ލިބޭ ހިތްހަމަޖެހުމާ އުފާވެރިކަން ބޮޑެވެ. ދުވާލުގެ 12 ގަޑިއިރުގެ ގިނަ ވަގުތު އޭނާ ހޭދަކުރަނީ "ކަޅެގަލެގޮޑާ"އޭ ރަށު މީހުން ކިޔާ ދެކުނު ފުއްޓަރުގެ ރާޅުގަނޑުގެ ތެރޭގައެވެ.
މިއީ މި ފަހުން ރާއްޖޭގެ ސާފިންގެ މަލަމަތި ބަދަލުކޮށްލި ގައްދޫގެ "ޓައިގަ ވޭވްސް" ސާފަރުންގެ ފެށުމެވެ. ގައްދޫގެ ސާފިން ބާނީ އަހުމަދު ރަޝީދު (ހަންވީ)ގެ މަސައްކަތުން ރަށުގައި މިހާރު އެންމެ މަގުބޫލު އެއް ކުޅިވަރުގެ ފެށުމެވެ.
ކިޔެވުމަށް ވުރެ އޭރު ވެސް އޭނާގެ ޝައުގުވެރިކަން އޮތީ މޫދު ކުޅިވަރަށެވެ. ރަށުގެ ގިނަ ޒުވާނުން ފުޓްބޯޅައާއި ވޮލީބޯޅައަށް ޝައުގުވެރިކަން ހުންނައިރު، ގޭގެ ކުރިމަތީގައި އޮންނަ މޫދަކީ އޭނާގެ ކުޅިވަރު މައިދާނެވެ. މި ދާއިރާ އިން އޭރު މާ ގިނަ ފުރުސަތުތަކެއް ލިބެން ނެތްކަމުގައި ވިޔަސް ސާފިން އަށް ހުރި ޝައުގުވެރިކަމާއި ފޯރިއެއް ކަނޑުވައެއް ނުލެވުނެވެ.
ގައްދޫގައި ސާފިން ކުރިއެރުވުމަށް ގިނަ މަސައްކަތްތަކެއް ކުރަމުން އަންނަ އަހުމަދު ރަޝީދު (ހަންވީ): ފޮޓޯ / އެމްއެސްއޭ
މިހާރު މިއީ އޭގެ 15 އަހަރު ފަހެވެ. ގައުމީ ފެންވަރުގައި ސާފިން އަކީ މަގުބޫލު ކުޅިވަރެކެވެ. ސާފަރުންނަށް ފަތުރުވެރިކަމުގެ ދާއިރާގައި އެތައް ފުރުސަތުތަކެއްވެސް އެބައޮތެވެ. ފަތުރުވެރިކަމުގެ މުހިންމު ބަޔަކަށް މިކަން ވެއްޖެ އެވެ. އާމްދަނީގެ ގޮތުން ބަލާއިރު ރަނގަޅު ވަޒީފާއަކަށް ވެސް މިކަން ވެއްޖެ އެވެ. ރާއްޖޭގެ ގައުމީ ސާފިން ޓީމެއް އެކުލަވާލައި ބައިނަލްއަގްވާމީ މުބާރާތްތަކަށްވެސް މިހާރު ރާއްޖެ ވާދަކުރަން ފަށައިފި އެވެ. މި ވަގުތު ރާއްޖޭގެ ގައުމީ ޓީމުގެ ހަތަރު ސާފަރުންގެ ތެރެއިން ތިން ސާފަރުންނަކީ ގައްދޫ އަށް ނިސްބަތްވާ ސާފަރުންނެވެ.
މިވަގުތު ރާއްޖޭގެ ގައުމީ ޓީމްގައި ހިމެނޭ ގައްދޫގެ ތިން ސާފަރުންނަކީ ވެސް ހަންވީ އަތުގައި ހިފައިގެން ރާޅަށް ނިކުތް ކުދިންނެވެ. އެންމެ ފަހުން ބޭއްވި ގައުމީ ލީގުގެ "ކަޅެގަލެކޮޑާ 2022"ގެ ޗެމްޕިއަން އިސްމާއިލް ރަޝީދު (ސްމައިލީ) އަކީި ހަންވީގެ އެއްބަނޑު އެއްބަފާ ކޮއްކޮ އެވެ. މިދިޔަ އަހަރުގެ ގައުމީ ޗެމްޕިއަން ހޫދު އަހުމަދު (ހޯޖާ) އަކީ ހަންވީގެ ދެ ބެއިންގެ ދެ ދަރި ކޮއްކޮ އެވެ. އުންމީދީ ސާފަރު ނަޖާހު މުހައްމަދު (ކަނބޯ)ގެ ކެރިއަރުގެ ފެށުމަކީ ހަންވީގެ އިރުޝާދާ އެހީތެރިކަމެވެ.
މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ އެންމެ ފަހުގެ ބަލާއިރު ރާއްޖޭގައި ބޭއްވި ކޮންމެ ސާފިން މުބާރާތެއްގައި ގައްދޫގެ ސާފަރުންގެ ވިދުން ގަދައެވެ.
ގައްދޫގެ ސާފިން ޓީމްގެ ބައެއް މެންބަރުން : ފޮޓޯ / އެމްއެސްއޭ
ބޮޑު ކާމިޔާބީ އަށް ބަލާއިރު، ގައްދޫ ސާފަރުންގެ ޗެޕްޓަރު ފަށަން ޖެހެނީ 2019 އިންނެވެ. ގައުމީ ޓީމަށް ކުޅުންތެރިން ހޮވުމަށް ބޭއްވި "ދަ ޓްރަޔަލްސް" ކާމިޔާބުކުރީ ސްމައިލީ އެވެ. އޭގެ ފަހުން ގައުމީ ޓީމާ އެކު ސްމައިލީ ވަނީ އޭޝިއަން ޗެމްޕިއަންޝިޕްގައި ވާދަކޮށް ޝޯޓްބޯޑް ކެޓަގަރީގެ ފައިނަލް ހީޓުގައި ވާދަކޮށްފަ އެވެ. އޭގެ ޖެހިގެން އައި އަހަރު މުޅި ދުނިޔެ އަށް ބަލިމަޑުކަމެއްގެ ސިފައިގައި ބިންދާލި ކޮވިޑް-19ގެ އެކި ރާޅުތަކުގެ ސަބަބުން މޫދުކުޅިވަރުތައް އޮތީ ހުއްޓިފަ އެވެ.
ދެ އަހަރެއްހާ ދުވަހުގެ ހުއްޓުމަކަށް ފަހު 2021 ވަނަ އަހަރުގެ ގެ ފުރަތަމަ މުބާރާތް ކަމަށްވާ ގައްދޫ ޕްރޯގެ އެއް ވަނަ، ދެ ވަނަ އަދި ތިން ވަނަ ހޯދީ ވެސް ގައްދޫގެ ދެ ސާފަރުންނެވެ. ކުއާޓާ ފައިނަލުގައި ވާދަކުރި އަށް ސާފަރުންގެ ތެރެއިން ފަސް ސާފަރުންނަކީ ގައްދޫގެ ޒުވާނުންނެވެ.
އޭގެ ފަހުން ބޭއްވީ ގައުމީ މުބާރާތެވެ. ގައުމީ މުބާރާތުގެ އެއް ވަނަ ހޯދީ ހޯޖާ އެވެ. މުބާރާތުގެ ތިން ވަނަ ހޯދީ ކަނބޯ އެވެ. ގައުމީ މުބާރާތުގެ އެއް ވަނަ ޓީމަކަށް މާލެ ހޮވުނުއިރު ދެ ވަނަ ހޯދީ ގައްދޫ އެވެ. މައިގަނޑު ސަބަބަކަށްވީ ގައްދޫގެ ސާފަރުން ވާދަކުރި އިވެންޓްތައް މަދުވުމެވެ.
މި އަހަރުގެ ސީޒަން ފެށި ގައުމީ ލީގުގެ ފުރަތަމަ މުބާރާތް ގައްދޫ ޕްރޯ މުބާރާތާ އެކުގަ އެވެ. މިފަހަރު ވެސް ފައިނަލުގައި ވާދަކުރީ އެ ރަށުގެ ދެ ސާފަރުންނެވެ. ސެމީ ފައިނަލުގައި އެރަށުގެ ތިން ސާފަރުން ވާދަކުރިއިރު، ކުއާޓާ ފައިނަލުގައި ވާދަކުރި ހަ ސާފަރުންގެ ތެރެއިން ހަތަރު ސާފަރުންނަކީ ގައްދޫގެ ސާފަރުންނެވެ.
ގައްދޫގައި ސާފިން އަށް ފޯރި ގައްދޫ އިން ދައްކާލީ ގައްދޫ ޕްރޯ ނުވަތަ "ކަޅެގަލެކޮޑާ 2022" ހުޅުވުމުގެ ރަސްމިއްޔާތުންނެވެ. މި ރަސްމިއްޔާތު އެތައް ގޮތަކުން ފާހަގަކޮށްލެވެނެވެ. މުޅިން ތަފާތު ގޮތަކަށް ގައްދޫގެ ސަގާފަތާއި އާދަކާދަ ދައްކައިދޭ ގޮތަށް ފެނުނު މި ރަސްމިއްޔާތުގައި މައިކް ހިފައިގެން ހުރީ ގައްދޫގެ ސާފަރުންގެ ފިލްމުގެ ހަގީގީ ބަތަލު ހަންވީ އެވެ.
ރަށުގެ ކުދި ބޮޑު އެންމެން ކަހަލަ ގޮތަކަށް ބައިވެރިވި މި ރަސްމިއްޔާތުގައި ގައްދޫގެ ސާފަރުންނަށްޓަކަައި ރަށް ފަހުރުވެރިވާ މިންވަރު ފެނުނެވެ. ސާފިންގެ އަސްލު މަންޒަރު މި ވަގުތު ސިފަކޮށްދޭއިރު، ކުރީ ސަފުގައި ގިނަވާނީ ގައްދޫގެ ސާފަރުންނެވެ. އެއީ މި ވަގުތު އެ ރަށުގެ ސާފަރުންގެ ފަހަތަށް ޖައްސެލެވެން ނެތީމަ އެވެ.
