ކްލަބް ވެެލެންސިއާ އަށް ކުޅެމުން އައި ސްރީ ލަންކާގެ ޑިފެންޑަރު ޑަކްސަން ޕުސްލަސް، ރޭ މާލޭގައި ދަންޖެހިގެން މަރުވިއިރު، މާދަމާ އޭނާގެ ހަށިގަނޑު ލަންކާ އަށް ގެންދަން މަސައްކަތް ކުރަމުން އަންނަ ކަމަށް ލަންކާގެ ފުޓްބޯޅަ ފެޑެރޭޝަނުން ބުނެފި އެވެ.
"އަދަދު" އަށް އެނގިފައިވާ ގޮތުގައި ޑަކްސަން, 31, ދިރިއުޅޭ ކޮޓަރީގައި ދަންޖެހި މަރުވެފައި ހުއްޓައި ފެނުނީ ހަބަރެއް ނުވެގެން އާއިލާ އިން އެންގުމުން ބެލި ބެލުމުގަ އެވެ. މި މައްސަލަ މިހާރު ރާއްޖޭގެ ފުލުހުން އަންނަނީ ތަހުގީގު ކުރަމުންނެވެ.
ލަންކާގެ ފުޓްބޯޅަ ފެޑެރޭޝަންގެ ރައީސް ޖޭސްވާރު އުމަރު މިއަދު ނެރުންވި ބަޔާނެއްގައި ބުނެފައިވަނީ ޑަކްސަންގެ މަރުގެ ކަންކަމުގައި ރާއްޖޭގެ އެކިއެކި ކަމާބެހޭ ފަރާތްތަކާ މަޝްވަރާ ކުރަމުން އަންނަ ކަމަށެވެ. އެ ގޮތުން ވާހަކަ ދެކެވެމުން އަންނަނީ ޑަކްސަން ކުޅެމުން އައި ކްލަބް ވެލެންސިއާ، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)، މޯލްޑިވްސް ޕޮލިސް، ރާއްޖޭގައި ހުންނަ ލަންކާ އެމްބަސީ އަދި ރާއްޖޭގެ ފޮރިން މިނިސްޓްރީއާ ކަމަށެވެ.
"ވާހަކަ ދެކެވެމުން އަންނަނީ މަރުވި ސަބަބު ދެނެގަންނަން،" ޖޭސްވާރު އުމަރުގެ ބަޔާނުގައިވެ އެވެ.
ޑަކްސަން ލަންކާ އަށް ގެނައުމުގެ އެކިއެކި ކަންކަން ހަމަޖައްސައިދިނުމުގައި ލަންކާގެ ކުޅިވަރާ ބެހޭ ވުޒާރާ އަދި ޔޫތު މިނިސްޓަރު ނަމާލް ރާޖަޕަކްސަ ވެދެއްވާ އެހީތެރިކަމަށް ލަންކާ ފުޓްބޯޅަ ފެޑެރޭޝަނުން ވަނީ ޝުކުރު އަދާކޮށްފަ އެވެ.
ލަންކާގެ ފުޓްބޯޅަ ފެޑެރޭޝަންގެ އިސް އޮފިޝަލުންނާއި ފުލުހުންގެ ޓީމެއް ޑަކްސަންގެ ގޭގައި.
ލަންކާގެ ފުޓްބޯޅަ ފެޑެރޭޝަންގެ ރައީސް ޖޭސްވާރު އުމަރާއި އިސް އޮފިޝަލުންގެ ޓީމެއް މިރޭ ވަނީ ޑަކްސަންގެ އާއިލާއާ ބައްދަލުކުރަން އެ މީހުން ދިރިއުޅޭ ގެޔަށް ގޮސްފަ އެވެ. ލަންކާ ފުޓްބޯޅަ ފެޑެރޭޝަނުން މާދަމާ ޑަކްސަންގެ ޖަނާޒާގެ ކަންކަން ބާއްވަން މަސައްކަތް ކުރަމުން އަންނައިރު، އޭގެ ހުރިހާ ހަރަދެއް ބަލަަހައްޓާނީ ފުޓްބޯޅަ ފެޑެރޭޝަންގެ ފަރާތުންނެވެ.
ވެލެންސިއާ އިން މިދިޔަ ހަފްތާގައި ގްރީން ސްޓްރީޓްސްއާ ދެކޮޅަށް ކުޅުނު މެޗުގައި ޑަކްސަންގެ ކަކުލަށް ލިބިފައިވާ އަނިޔާއަކާ ހެދި ކުޅުމާ ދުރުގައި ހުރުމުން އިއްޔެ ހަވީރު ވެލެންސިއާ އިން ދަ ގްރާންޑޭ ބަލިކުރި މެޗުގެ ސްކޮޑުގައި ޑަކްސަން ނެތެވެ. އެހެންވެ، އޭނާ ދަނޑަށް މެޗަށް ވެސް ނާދެ އެވެ. ދަންޖެހިފައި ހުއްޓައ ފެނުނީ ވެލެންސިއާ މެޗު ނިމުނުތާ ދެ ގަޑިއިރެއްހާއިރު ފަހުންނެވެ.
ޑަކްސަން އެންމެ ފުރަތަމަ، ފުރަަތަމަ ޑިވިޝަން ކުޅެން ރާއްޖެ އައީ މިދިޔަ ސީޒަނުގައި ޓީސީ ސްޕޯޓްސް ކްލަބް އަށެވެ. އެ ޓީމުގައި ރަނގަޅު ކުޅުމެއް ދެއްކި ޑަކްސަން ވަނީ މިދިޔަ އޮކްޓޫބަރު މަހު މާލޭގައި އޮތް ސާފް ޗެމްޕިއަންޝިޕާއި ނޮވެމްބަރު މަހު ލަންކާގައި ބޭއްވި ފޯ ނޭޝަންސް ކަޕްގައި ރާއްޖޭގެ ގައުމީ ޓީމާ ދެކޮޅަށް ލަންކާ ޓީމުގައި ހިމެނިގެން ކުޅެފަ އެވެ.ސާފް ޗެމްޕިއަންޝިޕްގައި ލަންކާ އިން އިންޑިއާއާ އެއްވަރުކުރި މެޗުގެ މޮޅު ކުޅުންތެރިޔާގެ މަގާމު ހޯދީ ޑަކްސަން އެވެ.
މި ފަހަރުގެ ސީޒަނަށް ކްލަބް ވެލެންސިއާ ވަރުގަދަކުރިއިރު، ޑަކްސަން ގެންނަން ނިންމި އެވެ. މެޗަކުން ބަލިނުވެ ވެލެންސިއާ އިން ޕްރެޒިޑެންޓްސް ކަޕް ޗެމްޕިއަންކަން ހޯދިއިރު، ޑަކްސަން އަކީ ޓީމުގެ ދިފާއީ އެއް ތަނބެވެ. ޕްރެޒިޑެންޓްސް ކަޕްގެ ލީގު ބުރުގައި ވެލެންސިއާ އިން މާޒިޔާ އަތުން 1-0 އިން މޮޅުވި މެޗުގެ މޮޅު ކުޅުންތެރިއަކީ ވެސް ޑަކްސަން އެވެ.
ޑަކްސަންގެ މަރާ ގުޅިގެން ވެލެންސިއާ އިން ނެރުނު ބަޔާނުގައި ބުނެފައިވަނީ މިއީ އެ ކްލަބަށް ލިބުނު ޝޮކެއް ކަމަށެވެ. މި އުނދަގޫ ވަގުތުގައި ޑަކްސަންގެ އާއިލާއާ އެކު ވެލެންސިއާގެ ކުޅުންތެރިންނާއި ކޯޗިން ސްޓާފުން އަދި މެނޭޖްމަންޓުން ތިބި ކަމަށާއި އަބަދުވެސް ޑަކްސަން ހަދާން ކުރާނީ ކްލަބަށް އަގުހުރި ހިދުމަތެއް ކޮށްދީފައިވާ ކުޅުންތެރިއެއްގެ ގޮތުގައި ކަމަށް ވެލެންސިއާގެ ބަޔާނުގައި ބުނެފައިވެ އެވެ.
