އުރީދޫ ދިވެހި ޕްރިމިއާ ލީގުގައި މިރޭ ކްލަބް ގްރީން ސްޓްރީޓްސް އަތުން 1-0 އިން މޮޅުވެ، ޔުނައިޓެޑް ވިކްޓްރީ (ޔޫވީ) އިން ރަނގަޅު ފޯމު ދަމަހައްޓައިފި އެވެ.
ޔުނައިޓެޑް ވިކްޓްރީން އެންމެ ފަހުން ކުޅުނު މެޗުގައި ދަ ގްރާންޑޭ އަތުން މޮޅުވިއިރު، ގްރީން ސްޓްރީޓްސް ވަނީ ކްލަބް ވެލެންސިއާ ބަލިކޮށްފަ އެވެ. އެހެންވެ، ޔުނައިޓެޑް ވިކްޓްރީ އާއި ގްރީން ސްޓްރީޓްސް އިން ވެސް މިރޭގެ މެޗަށް ނުކުތީ މޮޅެއް ހޯދައި، ރަނގަޅު ފޯމު ކުރިއަށް ގެންދިއުމަށެވެ.
ޔުނައިޓެޑް ވިކްޓްރީ މިރޭ ހޯދި ތިން ޕޮއިންޓާ އެކު ވަނީ ލީގުގެ ގަދަ ތިނެއްގެ ތެރޭގައި ހިމެނިފަ އެވެ. އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި ދެން އޮތް ޔުނައިޓެޑް ވިކްޓްރީ އާއި ވެލެންސިއާ އަށް ވަނީ ހަ ޕޮއިންޓް ލިބިފަ އެވެ. މާޒިޔާ އަށް ލަނޑުގެ ތަފާތުން ކުރި ލިބޭއިރު، ޔުނައިޓެޑް ވިކްޓްރީ އާއި ވެލެންސިއާ އޮތީ އެއް މެޗު އިތުރަށް ކުޅެގެން ލަނޑުގެ ގޮތުން އެއްވަރުވެފަ އެވެ.
މިރޭގެ މެޗު ފަށައިގެން ފަސް ވަނަ މިނިޓްގައި ޔުނައިޓެޑް ވިކްޓްރީގެ ކިރްގިސްތާން މިިޑްފީލްޑަރު އަނަޓޯލީ ވްލަޝީޗޭފް (ޓޯނީ) ޖެހި ބޯޅަ އަމާޒުވީ ގްރީން ސްްޓްރީޓްސްގެ ޕާކިސްތާން ކީޕަރު ހަނީފް ސާގިބް އަތަށެވެ. އޭގެ އިރުކޮޅެއް ފަހުން ގްރީން ސްޓްރީޓްސްގެ ކުރިއަށް ކުޅޭ ކޮލަމްބިއާގެ ފޯވާޑް ހޯސޭ އަވީލާ އަށް ހުސް ފުރުސަތެއް ލިބި ބޭނުމެއް ނުކުރެވުނެވެ. މެޗުގެ 21 ވަނަ މިނިޓްގައި ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) ޖެހި ބޯޅަ ޔުނައިޓެޑް ވިކްޓްރީގެ ކީޕަރު އަހުމަދު އަނަފް ޒަރިޔަންދު ވަނީ މަތަކޮށްފަ އެވެ.
ޔުނައިޓެޑް ވިކްޓްރީގެ ބައްސާމް (ކ) ގްރީން ސްޓްރީޓްސްގެ ނާހިލް ކައިރިން ބޯޅަ ހިފައިގެންދަނީ.-- ފޮޓޯ: އަބްދުﷲ އިޔާން/ އަދަދު
ފުރަތަމަ ހާފު ނިމުމުގެ ކުރިން ޔުނައިޓެޑް ވިކްޓްރީގެ ކެޕްޓަން އަލީ ހަމްދާން (އައްޔަ) ހުސްކޮށް ވަދެ އޭރިއާތެރެއިން ޖެހި ބޯޅަ ދިޔައީ ކީޕަރު ސާގިބް އަތަށެވެ. އެކަމަކު، ދެ ވަނަ ހާފްގެ ކުޅުން ފަށައިގެން ތިން ވަނަ މިނިޓްގައި ޔުނައިޓެޑް ވިކްޓްރީން ލީޑުނެގި އެވެ. މި ގޯލު ޖެހީ ބެލަރޫސްގެ ފޯވާޑް އިވާން ވެރާސް އެވެ. އޭރިއާތެެރެއިން އިވާން އަށް ލިބުނު ބޯޅަ އޭނާ ވަނީ ހަމަޖެހިލާފައި ގޯލުގެ ކައިރީ ކަނަށް ފޮނުވާލައިފަ އެވެ.
ގްރީން ސްޓްރީޓްސް އިން އެއްވަރުކުރަން ކުރިއަށް ޖެހިގެން ކުޅެމުންދިޔައިރު، މެޗުގެ 77 ވަނަ މިނިޓްގައި އެ ޓީމުގެ އަވީލާ އަށް ރަނގަޅު ފުރުސަތެއް ލިބުނެވެ. ޗޯޓު ހުރަސްކޮށްލި ބޯޅައެއް ހުސްކޮށް އަރައި އަވީލާ ބޮލުން ފޮނުވާލި ނަމަވެސް ބޯޅަ ދިޔައީ ގޯލާ ސީދާނުވެ އެވެ.
ޔުނައިޓެޑް ވިކްޓްރީ އަށް ލީޑުފުޅާކޮށްދޭން މުސައްނިފު މުހައްމަދާއި އައްޔަ ޖެހި ޝޮޓްތައް ގްރީން ސްޓްރީޓްސްގެ ޑިފެންޑަރުން ވަނީ ބްލޮކްކޮށްފަ އެވެ.
މެޗުގެ ފަހު ކޮޅުގައި ގްރީން ސްޓްރީޓްސް އިން ދިޔައީ ފުލުފުލުގައި އެޓޭކްކުރަމުންނެވެ. އޭގެ ތެރެއިން ބޯޅައެއްގައި ގްރީން ސްޓްރީޓްސްގެ ކެޕްޓަން ރިލްވާން ވަހީދު (ރިލޭ) ޖެހި ބޯޅައެއް ޔުނައިޓެޑް ވިކްޓްރީގެ ކުޅުންތެރިއަކު އަތުގައި ޖެހުނު ކަމަށް ބުނެ، ޕެނަލްޓީ އަކަށް އެޕީލްކުރި ނަމަވެސް މެޗުގެ ރެފްރީ އަފްޝީން ނަސީރު ނިންމީ ޕެނަލްޓީ ދޭން ނުޖެހޭ ކަމަށެވެ.
ލީގުގައި މާދަމާ ހަވީރު ކްލަބް އީގަލްސް ކުޅޭނީ ސުޕަ ޔުނައިޓެޑް ސްޕޯޓްސް (ސަސް)އާ އެވެ. މާދަމާރޭ ޓީސީ އާއި މާޒިޔާ ބައްދަލުކުރާނެ އެވެ.
