އުރީދޫ ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ދަ ގްރާންޑޭ ސްޕޯޓްސް ކްލަބް އަތުން ކްލަބް ވެލެންސިއާ އިން 1-0 އިން އުނދަގޫ މޮޅެއް ހޯދައިފި އެވެ.
ވެލެންސިއާ އިން މި މެޗަށް ނުކުތްއިރު، އެންމެ ފަހުން ކުޅުނު ނުވަ މެޗުގެ ތެރެއިން ފުރަތަމަ ފަހަރަށް ވަނީ ބަލިވެފަ އެެވެ. އެހެންވެ، މިއަދު ދަ ގްރާންޑޭ އަތުން އުނދަގުލުން މޮޅުވި ކަމުގައި ވިޔަސް މިއީ އެ ޓީމުން ފަރުޖައްސައިލާނެ ނަތީޖާއެކެވެ. ކުޅުނު ތިން މެޗުން ލިބުނު ހަ ޕޮއިންޓާ އެކު ވެލެންސިއާ އޮތީ ލީގުގެ ދެ ވަނައިގަ އެވެ.
ވެލެންސިއާ އިން މި މެޗާ ކުރިމަތިލީ ވެސް އަނިޔާ އާއި އެހެނިހެން ސަބަބުތަކަކާ ހެދި ޓީމުގެ މުހިންމު ކުޅުންތެރިންތަކެއް ނުލަ އެެވެ. އެ ގޮތުން ޓީމުގެ ކެޕްޓަން އަލީ ފާސިރު (ސެންޓޭ) އާއި މިޑްފީލްޑަރު އަސްހަދު އަލީ (އަޑުބަރޭ)، ލަންކާގެ ޑިފެންޑަރު ޑަކްސަން ޕުސްލަސް އަދި މިޑްފީލްޑަރު އަބްދުﷲ މިދުހަތު ފަހުމީ (ބިޗަޑް) ހުރީ ޓީމާ ދުުރުގަ އެވެ. ދަ ގްރާންޑޭގެ ލަންކާ ފޯވާޑް މުހައްމަދު އާކިބް އަނިޔާއާ ހެދި މި މެޗުގައި ނުކުޅެ އެވެ.
މެޗު ފަށައިގެން ފުރަތަމަ 10 މިނިޓް ތެރޭ ވެލެންސިއާގެ ސްޕެއިން ފޯވާޑް ބޯހާސް މާޓިން ވަނީ ދެ ހަމަލާއެއް އުފައްދަން މަސައްކަތް ކޮށްފަ އެެވެ. ވެލެންސިއާގެ ކެޕްޓަން ބޭންޑް އަޅައިގެން ކުޅެމުން އަންނަ ބޯހާސް ޖެހި ބޯޅަތައް ދިޔައީ ގޯލާ ސީދާނުވެ އެެވެ.
ދަ ގްރާންޑޭގެ ޒުލްކިފްލި (ކ) ކައިރިން ވެލެންސިއާގެ ހަނާން ބޯޅަ ހިފައިގެންދަނީ.-- ފޮޓޯ: އަބްދުﷲ އިޔާން/ އަދަދު
އޭގެ ފަހުން ދެ ކައުންޓަ އެޓޭކުގައި ދަ ގްރާންޑޭ އަށް ރަނގަޅު ވަގުތުގައި ބޯޅަ ފޮނުވާނުލެވި ފުރުސަތު ގެއްލުނީ އެވެ. ވެލެންސިއާ އަށް ލީޑުނަގައިދިނީ މެޗުގެ 25 ވަނަ މިނިޓްގައި އަބްދުﷲ ޔާމީން (ޔާނު) އެވެ. އޭރިއާބޭރުން ޔާނު ޖެހި ބޯޅަ ދަ ގްރާންޑޭގެ ކުޅުންތެރިއަކު ފައިގައި ޖެހިފައި ތިރިތރިން ގޮސް ވަނީ ގޯލުގެ ކަނަށެވެ.
ފުރަތަމަ ހާފު ނިމުމުގެ ކުރިން ދަ ގްރާންޑޭ އިން އެއްވަރުކުރެވޭތޯ ރަނގަޅު ހަމަލާތަކެއް ފޮނުވާލި އެވެ. މެޗުގެ 37 ވަނަ މިނިޓްގައި ދަ ގްރާންޑޭގެ ޖަޕާން މިޑްފީލްޑަރު ޔޫގޯ ކަވަބާޓާ ފޮނުވާލި ހިލޭޖެހުން ވެލެންސިއާގެ ކީޕަރު މުހައްމަދު ފައިސަލް ވަނީ މަތަކޮށްފަ އެވެ. އޭގެ ފަސް މިނިޓް ފަހުން ދަ ގްރާންޑޭގެ އިސްމާއިލް މަފާޒް އިބްރާހިމް އެ ޓީމުގެ އަލީ ޝަމާލަށް ޖައްސާލި ބޯޅަ ރަނގަޅަށް ފައިގައި ލައްވާނުލާތީ ގޯލަށް ފޮނުވާނުލެވުނެވެ.
ދެ ވަނަ ހާފްގެ ކުޅުން ފަށައިގެން ފުރަތަމަ ވިއްސަކަށް މިނިޓް ތެރޭ ދެ ޓީމަށް ވެސް މާ ރަނގަޅު ހުސް ފުރުސަތުތަކެއް ނުހޯދުނެވެ. އެ ވަގުތުގައި ވެލެންސިއާގެ ބޯހާސް ޖެހި ޝޮޓެއް ބްލޮކްވިއިރު، ދަ ގްރާންޑޭން ކުރި އެޓޭކެއްގައި އެ ޓީމުގެ އިބްރާހިމް އުސާމާ ނެގި ހުރަސް ޖަހަން އެރި ކުޅުންތެރިންނަށް ބޯޅަ ލިބޭގޮތެއްނުވި އެވެ.
ވެލެންސިއާގެ ސަން މިއަދުގެ މެޗުގެ ތެރެއިން ބޯޅަ ފޮނުވާލަނީ.-- ފޮޓޯ: އަބްދުﷲ އިޔާން/ އަދަދު
އޭގެ ފަހުން ދަ ގްރާންޑޭ އިން ވަނީ ބަދަލެއްގެ ގޮތުގައި މުހައްމަދު ލަޔާން އަހުމަދާއި މުސްރިފު މޫސާ ކުޅެން އަރުވައިފަ އެވެ. އަދި ވެލެންސިއާ އިން ވެސް ވަނީ ބަދަލެއް ގެނެސްފަ އެވެ. އާދަމް އިޝާމް (ސަން)ގެ ބަދަލުގައި ޒުވާން ކުޅުންތެރިޔާ އާމިން އުމަރު މޫސާ ވަނީ ކުޅެން އަރުވައިފަ އެވެ. މެޗުގެ 77 ވަނަ މިނިޓްގައި ދަ ގްރާންޑޭ އޭރިއާތެެރެއިން ވެލެންސިއާގެ ޔާނު އަށް ލިބުނު ބޯޅަ ފޮނުވާލުން ލަސްކޮށްލުމުން ފުރުސަތު ގެއްލުނީ އެވެ.
ދަ ގްރާންޑޭ އަށް އެއްވަރުކޮށްދޭން އެ ޓީމުގެ ލަޔާނަށް ގިނަ ފުރުސަތުތަކެއް ލިބުނެވެ. މެޗުގެ 80 ވަަނަ މިނިޓްގައި ވެލެންސިއާގެ ހަސަން ސުފިއާން އަތުން ގެއްލުނު ބޯޅައެއް އޭރިއާތެރެއިން ހުސްކޮށް ލަޔާނަށް ލިބުމުން އޭނާ ޖެހި ބޯޅަ ވެލެންސިއާގެ ކީޕަރު ފައިސަލް ވަނީ ފައިން މަތަކޮށްފަ އެވެ. ލަޔާނަށް ލިބުނު ދެ ވަނަ ހުސް ފުރުސަތުގައި މި ފަހަރު ފޮނުވާލި ބޯޅަ ވަނީ ބްލޮކްވެފަ އެވެ. އޭގެ ފަހުން ލިބުނު ބޯޅައެއް ލަޔާން ވަނީ ގޯލުގެ ހުރަސްދަނޑިމަތިން ފޮނުވާލައިފަ އެވެ.
ލީގުގައި މިރޭ ކުޅޭ މެޗުގައި ޔުނައިޓެޑް ވިކްޓްރީ (ޔޫވީ) ބައްދަލުކުރާނީ ކްލަބް ގްރީން ސްޓްރީޓްސްއާ އެވެ.
