ލަންޑަން (ފެބްރުއަރީ 24) - ބޮލުގެ ނާށިގަނޑަށް ލިބުނު ސީރިއަސް އަނިޔާ އިން ރަނގަޅުވެ، ވުލްވްސްގެ މެކްސިކޯގެ ފޯވަޑް ރައުލް ހިމެނޭޒް އަލުން ކުޅެން ފެށުމަކީ ލިބުނު ހިތްހަމަޖެހުމެއް ކަމަށް އާސެނަލްގެ ކޯޗު މިކޭލް އާޓޭޓާ ބުނެފި އެވެ.
ހިމެނޭޒްގެ ބޮލުގެ ނާށިގަނޑަށް އަނިޔާވީ 2020 ވަނަ އަަހަރުގެ ނޮވެމްބަރު މަހު، އާސެނަލްއާ ދެކޮޅަށް އެ ކްލަބުގެ އެމިރޭޓްސް ސްޓޭޑިއަމްގައި ކުޅުނު މެޗެއްގަ އެވެ.
މި އަނިޔާގެ ސަބަބުން، ހިމެނޭޒް ވަނީ ކުޅުމާ ދުރުގައި އަށް މަސް ދުވަސް ހޭދަކޮށްފަ އެވެ. ޑޮކްޓަރުން ކުރިން ބުނީ ހިމެނޭޒް އަލުން ކުޅުމަކީ ނާދިރު ކަމެއް ކަމަށެވެ. އެހެން ނަމަވެސް، އަމިއްލަ އަށް ކުރި މަސައްކަތާއި ހިތްވަރުން، ހިމެނޭޒް ވަނީ އަލުން ކުޅެން ފަށައިފަ އެވެ.
ހިމެނޭޒްގެ ކެރިއަރަށް ނުރައްކާވި އަނިޔާ ލިބުނު ސްޓޭޑިއަމް ކަމަށްވާ އެމިރޭޓްސްގައި މިރޭ އޭނާ ކުޅޭނެ އެވެ. އާސެނަލްއާ ދެކޮޅަށް މިރޭ ވުލްވްސް ކުޅޭ މެޗުގައި، އެ ޓީމުގެ ފޯވަޑްލައިން ލީޑު ކުރާނީ ހިމެނޭޒް ،30، އެވެ.
މެޗުގެ ކުރިން ނޫސްވެރިންނާ ވާހަކަދައްކަމުން، އާޓޭޓާ ވަނީ ހިމެނޭޒް އަށް އަނިޔާވި ދުވަހުގެ "ބިރުވެރި" ހަނދާންތައް އާކޮށްފަ އެވެ. އަދި، އެ ނުރައްކާތެރި އަނިޔާ އިން ރަނގަޅުވެ، ހިމެނޭޒް އަލުން ދަނޑަށް ނުކުތުމަކީ އޭނާ އަށް ވެސް ލިބުނު ބޮޑު ހިތްހަމަޖެހުމެއް ކަމަށް އާޓެޓާ ބުންޏެވެ.
"އެއީ ވަރަށް ބިރުވެރި ވަގުތުކޮޅެއް. ވީގޮތެއް ނޭނގިގެން، ޑޮކްޓަރުންނާއި އެހެން މީހުން ވެސް އުޅުނު މަންޒަރު ފެނި، ހިތުގެ ތެރެއަށް ބިރުވެރިކަން ވަތް،" އެ މެޗުގެ ހަނދާން އާކުރަމުން އާޓޭޓާ ބުންޏެވެ. "ވަރަށް އުފާވޭ އެހާ އަވަހަށް ޖިމެނޭޒް ދަނޑަށް އެނބުރި އައިސް، ގޯލުތައް ޖަހާ މަންޒަރު ފެންނާތީ."
އާޓެޓާ ބުނީ ވުލްވްސް އަކީ މި ސީޒަންގެ ގަދަ ހަތަރަކަށް ވާދަކުރާނެ ޓީމެއް ކަމަށެވެ. އަދި ވުލްވްސްއާ ދެކޮޅަށް ކުޅޭ މެޗަކީ ފަސޭހަ މެޗަކަށްނުވާނެ ކަމަށެވެ.
އާސެނަލް އިން ވަނީ ވުލްވްސްގެ ދަނޑުގައި މީގެ ދެ ހަފުތާކުރިން ކުޅުނު މެޗު 1-0 އިން ކާމިޔާބުކޮށްފަ އެވެ.
މިރޭގެ މެޗަށް ނުކުންނައިރު ވުލްވްސް އޮތީ ތާވަލްގެ ހަތް ވަނައިގަ އެވެ. އެ ޓީމުގެ މައްޗަށް ދެ ޕޮއިންޓްގެ ލީޑެއް ނަގައި، އާސެނަލް އޮތީ ހަ ވަނައިގަ އެވެ. -- އޭއެފްޕީ
