އުރީދޫ ދިވެހި ޕްރިމިއާ ލީގުގައި މިރޭ ކްލަބް ގްރީން ސްޓްރީޓްސް އަތުން 1-0 އިން ބަލިވެ، ކްލަބް ވެލެންސިއާގެ ބަލިނުވުމުގެ ރެކޯޑަށް ނިމުން އަތުވެއްޖެ އެވެ.
ސީޒަން ހުޅުވަން ކުޅުނު ޗެރިޓީ ޝީލްޑް މެޗުން މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވި ފަހުން، ދެން ކުޅުނު ޕްރެޒިޑެންޓްސް ކަޕްގެ ޗެމްޕިއަންކަން ހޯދި ވެލެންސިއާ އިން އެ މުބާރާތް ކާމިޔާބުކުރީ މެޗަކުން ބަލިނުވެ އެވެ. ޕްރެޒިޑެންޓްސް ކަޕްގެ އަށް މެޗާއި ދިވެހި ޕްރިމިއާ ލީގުގެ ފުރަތަމަ މެޗުގައި ޔުނައިޓެޑް ވިކްޓްރީ (ޔޫވީ) އަތުން ވެލެންސިއާ ބަލިނުވެ އެވެ. އެކަމަކު، މިރޭ ގްރީން ސްޓްރީޓްސް އިން ވަނީ ވެލެންސިއާގެ ބަލިނުވުމުގެ ސިލްސިލާ އަށް ނިމުން ގެނެސްފަ އެވެ.
އަމިއްލަ ސަބަބަކާ ހެދި ވެލެންސިއާ އިން އެންމެ ފަހުން ކުޅުނު މެޗުގައި ނުފެނުނު ގޯލްކީޕަރު މުހައްމަދު ފައިސަލް ވަނީ މިރޭގެ މެޗުގައި ވެލެންސިއާގެ ފުރަތަމަ އެގާރައިގައި ހިމެނިފަ އެވެ. ވެެލެންސިއާ ޓީމުގައި ކުރިން ގްރީން ސްޓްރީޓްސް އަށް ކުޅުނު އަބްދުﷲ ޔާމީން (ޔާނު) ހިމެނެ އެވެ. އެކަމަކު، ކަކުލަށް ލިބިފައިވާ އަނިޔާއިން ރަނގަޅުނުވާތީ ވެލެންސިއާގެ ކެޕްޓަން އަދި ޕްރެޒިޑެންޓްސް ކަޕްގެ މޮޅު ކުޅުންތެރިޔާ އަލީ ފާސިރު (ސެންޓޭ) ހުރީ ކުޅުމާ ދުރުގަ އެވެ.
މެޗު ފަށައިގެން ފުރަތަމަ ހަމަލާ އުފެއްދީ ވެލެންސިއާ އިންނެވެ. މެޗުގެ 13 ވަނަ މިނިޓްގައި ޓީމުގެ ވިންގް، ހުސެއިން ހަނާން (ޖޯ) ކައުންޓައެޓޭކުގައި ފޮނުވާލި ބޯޅަ އަމާޒުވީ ގްރީން ސްޓްރީޓްސްގެ ގޯލުގައި ހުރި ޕާކިސްތާންގެ ކީޕަރު ހަނީފް ސާގިބް އަތަށެވެ. އޭގެ ދެ މިނިޓް ފަހުން ގްރީން ސްޓްރީޓްސްގެ އަންސަރު އިބްރާހިމް (އަންކޮ) ޖެހި ބޯޅަ ދިޔައީ ހުރަސްދަނޑިމަތިންނެވެ.
ގްރީން ސްޓްރީޓްސްގެ ނާހިލް (ވ) އާއި ވެލެންސިއާގެ ޔާނު ބޯޅަ ލިބޭތޯ މަަސައްކަތްކުރަނީ.-- ފޮޓޯ: މުހައްމަދު ޝާބިން/ އަދަދު
ވެލެންސިއާ އިން ކުރިއަށް ޖެހިގެން ކުޅެމުން ދަނިކޮށް ފަހަތަށް ދިޔަ ބޯޅައެއްގައި ގްރީން ސްޓްރީޓްސް އިން ވަނީ ލީޑުނަގައިފަ އެވެ. މެޗުގެ 20 ވަނަ މިނިޓްގައި ގްރީން ސްޓްރީޓްސްގެ އަލީ ޝާމިސް (ތޮއްޕޭ) ހުސްކޮށްލާފައި އޭރިއާތެރެއިން ހަސަން ނަޒީމް ގާސިމް (ޗޯޓު) އަށް ދިނުމުން އޭނާ ކޮންޓްރޯލް ކޮށްލުމަށް ފަހު ވަނީ ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
ދެން ފެނުނީ ނަތީޖާ ހަމަހަމަކުރަން ވެލެންސިއާ އިން ފުލުފުލުގައި ގްރީން ސްޓްރީޓްސްގެ ގޯލަށް ހަމަލާތަކެއް ފޮނުވާލިތަނެވެ. އެ ގޮތުން މެޗުގެ 23 ވަނަ މިނިޓްގައި ޔާނު ފޮނުވާލި ބޯޅަ ގްރީން ސްޓްރީޓްސްގެ ކީޕަރު ސާގިބް އަތުގައި ޖެހިފައި ނުކުތުމުން ރީބައުންސް ބޯޅަ ވެލެންސިއާގެ ޖޯ ފޮނުވާލި ނަމަވެސް ވަނީ ބްލޮކްވެފަ އެވެ. އޭގެ މިނިޓެއް ފަހުން އޭރިއާތެރެއިން ޔާނު ކޮންޓްރޯލް ކޮށްލުމަށް ފަހު ފޮނުވާލި ބޯޅަ ކީޕަރު ސާގިބް ވަނީ މަތަކޮށްފަ އެެވެ.
ގްރީން ސްޓްރީޓްސް އިން ލީޑުފުޅާކުރަން ފުރަތަމަ ހާފުގައި އެންމެ ރަނގަޅު ހަމަލާ ފޮނުވާލީ އެ ޓީމުގެ މެދުތެރެއަށް ކުޅޭ ބެލްޖިއަމްގެ މިޑްފީލްޑަރު ޖޯޑީ ބާޓީ އެވެ. މެޗުގެ 34 ވަނަ މިނިޓްގައި ޖޯޑީ ފޮނުވާލި ބާރު ޝޮޓް ދިޔައީ ގޯލު ކައިރިން ބޭރުންނެވެ. އޭގެ ފަސް މިނިޓް ފަހުން ވެލެންސިއާގެ ޖޯ ޖެހި ބޯޅަ ވެސް ހުއްޓުވީ ކީޕަރު ސާގިބް އެވެ.
ބޯހަސް (ކ) އަށް ލިބުމުގެ ކުރިން ކީޕަރު ސާގިބް ބޯޅަ ހިފައިގެން.-- ފޮޓޯ: މުހައްމަދު ޝާބިން/ އަދަދު
ވެލެންސިއާގެ ކެޕްޓަން ސްޕެއިނުގެ ފޯވާޑް ބޯހަސް ވަނީ ގްރީން ސްޓްރީޓްސްގެ ކީޕަރު ސާގިބް މެޗު ލަސްކުރަން އުޅޭތީ އޭނާ ލައްވައި، އަވަހަށް ކުޅުން ފަށަން މަސައްކަތްކޮށްފަ އެވެ. އެ ގޮތުން ބޯހަސް އެއްލި ބޯޅައެއް ސާގިބް ގައިގައި ޖެހުމުން އޭނާ ވެއްޓުނުއިރު، ރެފްރީ ޝިފާން އަބްދުލް ރަހީމް ވަނީ ބޯހަސް އަށް ރީނދޫ ކާޑެއް ދައްކައިފަ އެވެ.
ދެ ވަނަ ހާފް ފަށައިގެން ވެލެންސިއާ އިން ގިނަ ވަގުތު ބޯޅަހިފަހައްޓައިގެން ކުޅުނު ނަަމަވެސް ކީޕަރު ސާގިބް ޓެސްޓްކޮށްލެވޭ ވަރުގެ ހަމަލާއެއް މި ހާފުގެ ކުރީކޮޅުގައި ފޮނުވައިނުލެވެ އެވެ. ކައުންޓަ އެޓޭކުގައި މެޗުގެ 67 ވަނަ މިނިޓްގައި ގްރީން ސްޓްރީޓްސްގެ އަންކޮ ޖެހި ބޯޅަ އަމާޒުވީ ކީޕަރު ފައިސަލް އަތަށެވެ. އޭގެ ތިން މިނިޓް ފަހުން ޗޯޓު އަށް ވެލެންސިއާ އޭރިއާތެެރެއިން ކުރި ފައުލަކަށް ޕެނަލްޓީ އަކަށް އެޕީލް ކުރި ނަމަވެސް ރެފްރީ ޝިފާން ނިންމީ ޕެނަލްޓީއެއް ދޭން ނުޖެހޭ ކަމަށެވެ.
އޭގެފަހުން ވެސް ވެލެންސިއާ އިން އެއްވަރުކުރެވޭތޯ ގިނަ އެޓޭކްތަކެއް ކުރި ނަމަވެސް ލަނޑެއް ޖެހޭގޮތެއްނުވި އެވެ.
ވެލެންސިއާ ބަލިވުމާ އެކު މާޒިޔާ އަށް ލީގުގެ އެއް ވަނައިގައި ތިން ޕޮއިންޓުގެ ލީޑެއް ވަނީ ލިބިފަ އެވެ.
