އަބޫ ދާބީ، ޔޫއޭއީ (ފެބްުރުއަރީ 22) - ދުބާއީ ޗެމްޕިއަންޝިޕްގައި މި ވަގުތު ކުޅެމުން އަންނަ ދުނިޔޭގެ އެއް ވަނަ ޓެނިސް ކުޅުންތެރިޔާ ނޮވަކް ޖޮކޮވިޗް، އެމެރިކާގައި ކުރިއަށް ހުރި ޓެނިސް މުބާރާތްތަކުން ނުފެނުމުގެ ފުރުސަތު އެބައޮތް ކަމަށް ރިޕޯޓްތައް ބުނެފި އެވެ.
މިދިޔަ މަހު އޮސްޓްރޭލިއަން އޯޕަންގައި ކުޅެން ޖޮކޮވިޗް އޮސްޓްރޭލިއާ އަށް ދިއުމުން ދެ ފަހަރެއްގެ މަތިން ކޯޓުގައި ކުރިއަށްދިޔަ ކޮވިޑް-19ގެ ވެކްސިން މައްސަލައެއްގައި ޖޮކޮވިޗް އޮސްޓްރޭލިއާ އިން ޑީޕޯޓްކޮށްލި އެ ގައުމުގެ އިމިގްރޭޝަނުންނެވެ.
އޭގެ ފަހުން ރަސްމީ މެޗެއްގައި ނުކުޅެ ހުރެފައި ޖޮކޮވިޗް ފުރަތަމަ ކުޅޭ މުބާރާތަކީ މިހާރު ދުބާއީގައި ކުރިއަށްދާ ޑިއުޓީ ފްރީ ޗެމްޕިއަންޝިޕްގަ އެވެ. އެ މުބާރާތުގައި ޖޮކޮވިޗްގެ ފުރަތަމަ މެޗުގައި އިއްޔެ ވަނީ އިޓަލީގެ ލޮރެންޒޯ މުސެއްޓީ 6-3، 6-3 އިން ބަލިކޮށްފަ އެވެ. އެއީ މި އަހަރު ޖޮކޮވިޗްގެ ރަސްމީ ފުރަތަމަ މެޗެވެ.
އެ މެޗަށް ފަހު ދިން އިންޓަވިއުއެއްގައި ޖޮކޮވިޗް ބުނީ އަލުން ކޯޓަށް އައި މެޗުގައި ސަޕޯޓަރުންގެ ފަރާތުން ފެނުނު ތަރުހީބުން ވަރަށް ބޮޑު ހިތްހަމަޖެހުމެއް ލިބިފައިވާ ކަމަށެވެ. އަދި އޭނާ އަށް ހުއްދަ އޮތް ކޮންމެ މުބާރާތެއްގައި ކުޅެން ބޭނުންވާ ކަމަށާއި އެންމެ ޓެނިސް ކުޅުމަކީ އެންމެ ޝައުގުވެރިކަމާ އެކު ކުރާ ކަންތަކަށްވާއިރު، އޭގެއިން ލިބޭ ކޮންމެ ފުރުސަތެއްގައި. ކުރިއަށްދާން ހުރި ކަމަށެވެ.
އެމެރިކާގައި ކުރިއަށް ހުރި މުބާރާތްތަކުގައި ޖޮކޮވިޗް ފެނިދާނެތޯ އެހުމުން އޭނާ ބުނީ މި ވަގުތަށް ފެންނަ މަންޒަރުތަކަށް ބަލާއިރު، އޭނާ ކޮވިޑް-19 ވެކްސިންގެ މައުލޫމާތު ކަށަވަރުނުކޮށްދީ ހުރުމުން އެމެރިކާ އަށް އެތެރެވާން ވިސާ ލިބޭނެ ކަމާ މެދު ސުވާލު އުފެދޭ ކަމަށެވެ.
"މި ވަގުތަށް ބަލާއިރު އަހަންނަށް ނެތް އެމެރިކާ އަށް އެތެރެވެވެން. އެކަމަކު، ހިނގާ ވާގޮތެއް ބަލަމާ. ފަހަރެއްގައި އަހަންނަށް ކުޅުމުގެ ފުރުސަތު ލިބިވެސް ދާނެ،" ޖޮކޮވިޗް ބުންޏެވެ.
ދާދި ފަހުން ބީބީސީ އަށް ދިން އިންޓަވިއުއެއްގައި ޖޮކޮވިޗް ވަނީ ކޮވިޑް-19 އަށް ވެކްސިން ނުޖަހައިގެން ޓެނިހުގެ ބޮޑެތި މުބާރާތްތައް (ގްރޭންޑް ސްލޭމް)ތަކުގައި ނުކުޅެވުނު ކަމުގައި ވިޔަސް އެކަމާ މާބޮޑު ފަރުވާލެއް ނެތް ކަމަށް ބުނެފަ އެވެ.
ދުބާއީ ޗެމްޕިއަންޝިޕްގައި ޖޮކޮވިޗް ދެ ވަނަ ބުރުގައި ކުޅެން ޖެހޭނީ ފުރަތަަމަ ބުރުގައި ރަޝީއާގެ ކެރަން ކަޗެނޭފާއި އޮސްޓްރޭލިއާގެ އަލެކްސް ޑި މެނޯ ކުޅެގެން މޮޅުވާ ކުޅުންތެރިއަކާ އެވެ. ދުބާއީ ޗެމްޕިއަންޝިޕްގެ ފައިނަލުގައި ޖޮކޮވިޗާއި އިނގިރޭސި ކުޅުންތެރިޔާ އެންޑީ މަރޭގެ މެޗެއް ފެނުމުގެ ފުރުސަތު އެބައޮތް ކަމަށެވެ.
