ލަންޑަން (ފެބްރުއަރީ 4) - އިނގިރޭސި އެފްއޭ ކަޕްގައި މިރޭ ޕްލައިމައުތު އާގައިލާ ދެކޮޅަށް ކުޅުނު މެޗުގައި ޗެލްސީގެ ކީޕަރު ކެޕާ އަރިއްޒަބަލާގާ މަތަކުރި ޕެނަލްޓީއާ އެކު 2-1 އިން އެ ޓީމު މޮޅުވިއިރު، މެންޗެސްޓާ ސިޓީން ފަހަތުން އަަރައި 4-1 އިން ފުލަމް ބަލިކޮށް، މުބާރާތުގެ ގަދަ 16 ޓީމުގެ ބުރުން ފުރުސަތު ހޯދައިފި އެވެ.
ޗެލްސީން މިރޭގެ މެޗަށް ނުކުތުމުގެ ކުރިން އެ ޓީމުގެ ކޯޗު ތޯމަސް ޓުޗެލް ކޮވިޑް-19 އަށް ޕޮޒިޓިވްވެގެން ވަނީ އެކަހެރިވާން ޖެހިފަ އެވެ. ޓުޗެލް ނެތުމުން ބެންޗުގައި ހުރެ ޗެލްސީ ޓީމަށް އިރުޝާދުދިނީ އާނޯ މިޗެލްސް އެވެ.
ވަރުގަދަ ޓީމަކާ އެކު ނުކުތް ޗެލްސީ ދަނޑުގައި ކުޅުނު މެޗުގައި ފުރަތަމަ ލީޑުނެގީ އިނގިރޭސި ތިން ވަނަ ޑިވިޝަނުގައި ކުޅެމުން އަންނަ ޓީމު ޕްލައިމަތުންނެވެ. މެޗުގެ އަށް ވަނަ މިނިޓްގައި މަކައުލީ ގިލެސްޕީ ވަނީ ބޮލުން ގޯލެއް ޖަހައި ޕްލައިމައުތަށް ލީޑުނަަގައިދީފަ އެވެ.
ޗެލްސީން ނަތީޖާ ހަމަހަމަކުރަން ކުރި މަސައްކަތް ކާމިޔާބުވީ މެޗުގެ 41 ވަނަ މިނިޓްގަ އެވެ. މޭސަން މައުންޓް އޭރިއާތެރެއަށް ނަގައިދިން ހުރަހަކުން މި ގޯލު ޖެހީ ސެޒާ އަޒްޕިލިކުއޭޓާ އެވެ. ދެ ވަނަ ހާފްގައި ޗެލްސީން ގޯލެއް ޖެހޭތޯ ކުރި މަސައްކަތް ކާމިޔާބެއްނުވި އެވެ.
މެޗުގެ ފުރިހަމަ ވަގުތު ހަމަވިއިރު، ދެ ޓީމު 1-1 އިން އެއްވަރުވެފައި އޮތުމުން ނަތީޖާ ނެރެން އިތުރު ވަގުތުގެ ދެ ހާފް ކުޅުނެވެ.
އިތުރު ވަގުތުގެ ފުރަތަމަ ހާފުގެ އިތުރު ވަގުތުގައި ޗެލްސީން މެޗުގައި ފުރަތަމަ ފަހަރަށް ލީޑުނެގީ ކައި ހަވާޓްޒް ދިން ބޯޅައަކުން މާކޯސް އަލޮންސޯ ޖެހި ގޯލުންނެވެ. އިތުރު ވަގުތުގެ ދެ ވަނަ ހާފްގެ ފަހު ކޮޅުގައި ޗެލްސީގެ ޑިފެންޑަރު މަލަންގް ސާ ކުރި ފައުލަކަށް ރެފްރީ ޕެނަލްޓީއެއް ދިނެވެ. ނަތީޖާ ހަމަހަމަކުރަން ޕްލައިމައުތުގެ ރިޔާން ހާޑީ ފޮނުވާލި ޕެނަލްޓީ ޗެލްސީ ކީޕަރު ކެޕާ ވަނީ ހުއްޓުވައިފަ އެވެ.
މި މެޗަށް ފަހު ޗެލްސީން އަބޫދާބީ އަށް ދަތުރުކުރާނީ ޔޫރަޕްގެ ޗެމްޕިއަންގެ ހައިސިއްޔަތުން ފީފާ ކްލަބް ވޯލްޑް ކަޕްގައި ކުޅޭށެވެ.
ފުލަމް ކުޅުންތެރިއަކު ކައިރިން ސިޓީގެ މާރޭޒް (ވ) ބޯޅަ ހިފައިގެންދެވޭތޯ މަސައްކަތްކުރަނީ.-- ފޮޓޯ: އޭއެފްޕީ
ސިޓީގެ އިއްތިހާދު ސްޓޭޑިއަމްގައި ކުޅުނު މިރޭގެ މެޗު ފަށައިގެން ހަތަރު ވަނަ މިނިޓްގައި ފުލަމް އަށް ލީޑުނަގައިދިނީ ނިމިދިޔަ ޓްރާންސްފާ މާކެޓްގައި ލިވަޕޫލުން ސޮއިކުރެވޭތޯ މަސައްކަތްކުރި ފަބިއޯ ކަވާލިއޯ އެވެ. ކަވާލިއޯގެ ގޯލުން ލީޑުނަގައި ސިޓީ އަށް ހަމަޖެހިނުލެވެނިސް މެޗުގެ ހަ ވަނަ މިނިޓްގައި އިލްކާއި ގުންޑޮގާން ވަނީ ރިޔާދު މާރޭޒް ދިން ބޯޅައަކުން ސިޓީ އަށް އެއްވަރުކޮށްދީފަ އެވެ. އަދި މެޗުގެ 13 ވަނަ މިނިޓްގައި ޖޯން ސްޓޯންސް ސިޓީ އަށް ލީޑުނަގައިދިނެވެ.
މެޗުގެ 53 ވަނަ މިނިޓްގައި ޖެކް ގްރީލިޝް އަށް ކުރި ފައުލަކަށް ދިން ޕެނަލްޓީއެއްގައި މާރޭޒް ޖެހި ގޯލުން ސިޓީން ލީޑުފުޅާކުރި އެވެ. އޭގެ ހަތަރު މިނިޓް ފަހުން މާރޭޒް ވަނީ އިތުރު ގޯލެއް ޖަހައިފަ އެވެ. މިއީ އެފްރިކަން ކަޕް އޮފް ނޭޝަންސް (އެފްކޮން)ގެ އެންމެ ފަހުގެ ޗެމްޕިއަންގެ ގޮތުގައި މި ފަހަރުގެ މުބާރާތުގައި ވާދަކޮށް ގްރޫޕް ސްޓޭޖުން ކެޓި ފަހުން އަލްޖީރިއާގެ ކެޕްޓަން މާރޭޒް، ސިޓީ އަށް އެނބުރި އައިސް ކުޅުނު ފުރަތަމަ މެޗެވެ. އޭނާ ވަނީ މި މެޗުގައި މޮޅު ކުޅުމެއް ދައްކައިފަ އެވެ.
ދާދި ފަހުން އެވަޓަންގެ ކޯޗުކަމާ ހަވާލުވި ފްރޭންކް ލަމްޕާޑްގެ އިރުޝާދުގެ ދަށުން އެވަޓަން އިން ކުޅުނު ފުރަތަމަ މެޗުގައި ވަނީ މިރޭ އެފްއޭ ކަޕްގައި ބްރެންޓްފޯޑް އަތުން 4-1 އިން މޮޅުވެފަ އެވެ. އެވަޓަންގެ ގޯލުތައް ޖެހީ ޔެރީ މިނާ، ރިޗާލިސަން، މޭސަން ހޯލްގޭޓް އަދި އަންޑްރޮސް ޓައުންސެންޑް އެވެ. ބްރެންޓްފޯޑްގެ ހަމައެކަނި ލަނޑު ޖެހީ އިވާން ޓޯނޭ އެވެ.
ވެސްޓް ހޭމް ޔުނައިޓެޑުން އިންގްލެންޑްގެ ދަށް ޑިވިޝަނުގެ ކިޑާމިންސްޓާ އަތުން މޮޅުވީ އުނދަގުލުންނެވެެ. އިތުރު ވަގުތުގެ ދެ ހާފް ކުޅުނު މި މެޗުގައި ވެސްޓް ހޭމް މޮޅުވީ 2-1 އިންނެވެ. ނޮރިޗް ސިޓީން ވަނީ ރަށުންބޭރުގައި 1-0 އިން ވުލްވްސް ބަލިކޮށް އެ ޓީމު ކަޓުވާލައިފަ އެވެ.
