ރިޔާދު، ސައުދީ އަރަބިއްޔާ (ޖެނުއަރީ 13) - ސްޕެނިޝް ސުޕަ ކަޕްގެ ސެމީ ފައިނަލުގައި ރޭ ކުޅުނު އެލްކްލަސިކޯ މެޗުގައި ވާދަވެރި ރެއާލް މެޑްރިޑް އަތުން ބަލިވި ނަމަވެސް ބާސެލޯނާ އިން ދެން ހުރި މެޗުތަކަށް ނުކުންނާނީ އިސް އުފުލައިގެން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ފުރިހަމަ ވަގުތު ހަމަވިއިރު އެއްވަރުވެފައި އޮތުމުން، އިތުރު ވަގުތުގެ ދެ ހާފް ކުޅެގެން ބާސެލޯނާ ރޭ ރެއާލް އަތުން ބަލިވީ 3-2 އިންނެވެ. މިއީ ރެއާލް އަތުން ބާސެލޯނާ ޖެހިޖެހިގެން ބަލިވި ފަސް ވަނަ މެޗެވެ.
ރޭގެ މެޗަކީ ޒަވީ ބާސެލޯނާގެ ކޯޗުކަމާ ހަވާލުވި ފަހުން ރެއާލާ ދެކޮޅަށް ނުކުތް ފުރަތަމަ ފަހަރެވެ. ފުރަތަމަ ކްލަސިކޯގައި ޒަވީ އަށް ކުރިމަތިލާން ޖެހިފައިވަނީ ނާކާމިޔާބީއާ އެވެ. އެ މެޗަށް ފަހު ދިން އިންޓަވިއުގައި ޒަވީ ބުނީ ކްލަސިކޯ އިން ބާސެލޯނާ ބަލިވި ނަމަވެސް ފެނުނު ކުޅުމަށް ބަލާއިރު، ޓީމާ މެދު އޮތް އުއްމީދު ބޮޑު ކަމަށެވެ.
"މުޅި މެޗަށް ބަލާއިރު ގިނަ ވަގުތު ތަކުގައި ކޮންޓްރޯލް އޮތީ އަހަރެމެން އަތުގައި. ރެއާލަށް ވުރެ ރަނގަޅަށް ކުޅުނީ އަހަރެމެން. އެކަމަކު، ފުޓްބޯޅަ މެޗެއްގެ ނަތީޖާ ނެރެނީ ގޯލު ޖަހައިގެންކަން ހަނދާނުގައި ބަހައްޓަން ޖެހޭ. މި މެޗުން ބަލިވިޔަސް ފެނުނު ކުޅުމާ އެކީ އަހަރެމެން ކުރިއަށްދާނީ އިސް އުފުލައިގެން،" ޒަވީ ބުންޏެވެ.
"ދެ އިހުސާސެއް މި ކުރެެވެނީ. ބަލިވީމަ ވާ ދެރަ. ދެން، ޒުވާން ކުޅުންތެރިންތަކެއް މި ކުރާ މަސައްކަތުން ލިބޭ ހިތްހަަމަޖެހުން. އަހަރެމެން މި ދަނީ ރަނގަޅު ޓްރެކުގައި، ކެތްތެރިވާންޖެހޭ،"
ރޭގެ މެޗުގައި ބާސެލޯނާ އަށް ލީޑެއް ނުލިބެ އެވެ. ރެއާލްގެ ވިނީޝިއުސް ޖޫނިއާ ފުރަތަމަ ހާފުގައި އެ ޓީމަށް ލީޑުނަގައިދީފައި ވަނިކޮށް ހާފު ނިމުމުގެ ކުރިން ބާސެލޯނާ އަށް އެއްވަރުކޮށްދިނީ ލޫކް ޑި ޔޯން އެވެ. ދެ ވަނަ ހާފުގައި ކަރިމް ބެންޒެމާ ރެއާލަށް ލީޑުނަގައިދިނުމުން އަންސޫ ފާޓީ ވަނީ ބާސެލޯނާ އަށް އެއްވަރުކޮށްދީފަ އެވެ. ރެއާލް މޮޅުވީ އިތުރު ވަގުތުގެ ފުރަތަމަ ހާފުގައި ފެޑެރީކޯ ވަލްވޭޑޭ ޖެހި ގޯލުންނެވެ.
ބާސެލޯނާ ބަލިކޮށް، ރެއާލުން ވަނީ އާދިއްތަ ދުވަހު ކުޅޭ ސުޕަ ކަޕް ފައިނަލުން ފުރުސަތު ހޯދައިފަ އެވެ. ރޭގެ މެޗަށް ފަހު ރެއާލްގެ ކޯޗު ކާލޯ އަންޗެލޮޓީ ބުނީ މެޗު ދިޔައީ ވަރަށް އެއްވަރުކޮށް ކަމަށާއި ރެއާލް މޮޅުވީ ކައުންޓަ އެޓޭކުގައި ދެއްްކި ތަފާތުގެ ސަބަބުން ކަމަށެވެ.
އާދިއްތަ ދުވަހު ކުޅޭ ސުޕަ ކަޕް ފައިނަލުގައި ރެއާލް ކުޅޭނީ މިރޭ ދެ ވަނަ ސެމީގައި އެތުލެޓިކޯ މެޑްރިޑާއި އެތުލެޓިކް ބިލްބާއޯ ކުޅެގެން މޮޅުވާ ޓީމަކާ އެވެ.
