މިހާރު ކުރިއަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތުގެ ފައިނަލް މެޗު ރ. އަތޮޅު އަލިފުށީ ޓާފް ދަނޑުގައި ކުޅޭގޮތަށް ނިންމާފައިވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފި އެވެ.
މިދިޔަ މަހު 26 ވަނަ ދުވަހު އަލިފުށީ ކައުންސިލާއި ޔޫތު މިނިސްޓްރީ އަދި އެފްއޭއެމްގެ އޮފިޝަލުން ވަނީ އަލިފުށީގައި ޕްރެޒިޑެންޓްސް ކަޕް ފައިނަލް ހޯސްޓް ކުރުމުގައި ފުރިހަމަ ކުރަން ޖެހޭ ކަންކަމާ ބެހޭގޮތުން މަޝްވަރާކޮށްފަ އެވެ.
އެ ބައްދަލުވުމުގައި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) އާއި އެފްއޭއެމްގެ ކޮމްޕެޓިޝަން ޑިޕާޓްމަންޓްގެ ޝާހު އިސްމާއިލް (ސާޔާ) އާއި އިސްމާއިލް ރިޔާޒް ބައިވެރިވެވަޑައިގެންނެވި އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ރޭ "އަދަދު" އަށް ވިދާޅުވީ އަލިފުށީގައި ފައިނަލް ކުޅޭ ގޮތަށް މިހާރު ނިންމާފައިވާ ކަމަށެވެ.
މިއީ މާލެ ނޫން ސަރަހައްދެއްގައި ރާއްޖޭގެ އެންމެ ޝަރަފްވެރި ފުޓްބޯޅަ މުބާރާތުގެ ފައިނަލް މެޗު ކުޅޭނެ ތިން ވަނަ ފަހަރެވެ.
މީގެ ކުރިން 2015 ވަނަ އަހަރު ޕްރެޒިޑެންޓްސް ކަޕް ފައިނަލް މެޗު ކުޅުނީ ސ. ހިތަދޫ ޒޯން ސްޓޭޑިއަމްގަ އެވެ. އެ ފަހަރު މުޅި މުބާރާތް ހޯސްޓްކުރީ ހދ. ކުޅުދުއްފުއްޓާއި ހިތަދޫގަ އެވެ. އެއީ ގަލޮޅު ދަނޑު ވިނަގަނޑު ހަލާކުވެެގެން މުބާރާތް މާލެއިން ބޭރަށް ބަދަލުކުރީ އެވެ. ގަލޮޅު ދަނޑުގެ ވިނަގަނޑު ހަލާކުވީ މިނިވަން ދުވަހުގެ ހަރަކާތްތައް ކުރިއަށް ގެންދަންވެގެން ވިނަގަނޑު މަތީގައި އެޅި ރަބަރުގަނޑެއްގެ ސަބަބުންނެވެ.
މާލޭން ބޭރުގައި އެންމެ ފުރަތަމަ ކުޅުނު ފައިނަލަކީ 1970 ވަނަ އަހަރުގެ މުބާރާތެވެ. އައްޑޫގައި އޮތް އެ ފައިނަލުގައި ޑީއެންސީ އާއި މާލޭ ޒަމާނީ މިއުޒިކީ ކްލަބް 1-1 އިން އެއްވަރުވެ ޖެހުނީ ދެ ޓީމަށް ޖޮއިން ޗެމްޕިއަންކަން ދޭށެވެ.
ސަރުކާރުގެ ހަރަދުގައި އަލިފުށީގައި އެޅި ޓާފް ދަނޑު ނިމުނުކަން ރަސްމީކޮށް އިއުލާނުކުރީ މިދިޔަ އަހަރުގެ ސެޕްޓެމްބަރު މަހު 16 ވަނަ ދުވަހު ކުޅިވަރާ ބެހޭ ވަޒީރު އަހުމަދު މަހުލޫފް ކުރެއްވި ޓްވީޓެއްގަ އެވެ. އޭގެ ފަހުން އަލިފުށީ ޒުވާނުން އަންނަނީ އެ ދަނޑުގެ ބޭނުން ހިފަމުންނެވެ. ސަރުކާރުގެ ހަރަދުގައި އަޅާ ޓާފް ދަނޑުތަކުގައި ރާއްޖޭގެ ކްލަބް ފުޓްބޯޅައިގެ ބޮޑެތި މެޗުތައް ކުޅުމަކީ ކުރިމަގަށް ބަލާއިރު، މުހިއްމު ކަމެއްގެ ގޮތުގައި މިނިސްޓަރު މަހުލޫފް ދެކިލައްވަ އެވެ.
ހަތަރު އަހަރަށް ފަހު ޕްރެޒިޑެންޓްސް ކަޕް ބާއްވާއިރު، މި ފަހަރުގެ މުބާރާތް ކުރިއަށްދަނީ ފުރަތަމަ ޑިވިޝަނުގެ އަށް ޓީމުގެ މެދުގަ އެވެ. އެންމެ ފުރަތަމަ ލީގު ބުރެއް ކުޅުމަށް ފަހު މި މަހު 23 ވަނަ ދުވަހު ކުޅޭ ފައިނަލަށް ހޮވޭނީ ލީގު ބުރުގެ އެންމެ ރަނގަޅު ނަތީޖާ ނެރޭ ދެ ޓީމެވެ.
ޕްރެޒިޑެންޓްސް ކަޕްގެ ލީގު ބުރުގައި ކޮންމެ ޓީމެއް ހަތަރު މެޗު ކުޅެފައިވާއިރު، އެއް ވަނައިގައި އޮތް މާޒިޔާ އާއި ދެ ވަނައިގައި އޮތް ވެލެންސިއާ އަށް ވަނީ 12 ޕޮއިންޓް ލިބިފަ އެވެ. މާޒިޔާ އަށް ކުރި ލިބެނީ ފައިދާ ގޯލު އެއްވަރުވެ، ޖެހި ގޯލުގެ ތަފާތުންނެވެ. މިރޭގެ މޮޅާ އެކު ގްރީން ސްޓްރީޓްސް އިން ވަނީ ތިން ވަނައިގައި ލީޑެއް ނަގައިފަ އެވެ. ގްރީން ސްޓްރީޓްސް އަށް ނުވަ ޕޮއިންޓް ލިބިފައިވާއިރު، ހަތަރެއްގައި އޮތް ސަސްގެ އޮތީ ހަ ޕޮއިންޓެވެ.
ފަސް ވަނައިގައި އޮތް އީގަލްސް އާއި ހަ ވަނައިގައި އޮތް ޓީސީ ސްޕޯޓްސް ކްލަބަށް ވަނީ ތިން ޕޮއިންޓް ލިބިފަ އެވެ. ހަތް ވަނައިގައި އޮތް ޔުނައިޓެޑް ވިކްޓްރީ (ޔޫވީ) އާއި ފުލުގައި އޮތް ދަ ގްރާންޑޭ ސްޕޯޓްސް ކްލަބަށް ވަނީ ޕޮއިންޓެއް ލިބިފަ އެވެ.
ޕްރެޒިޑެންޓްސް ކަޕްގެ އެންމެ ފަހުން ބޭއްވީ 2017 ވަނަ އަހަރު އެވެ. އެ ފަަހަރުގެ ޗެމްޕިއަނަކީ ނިއު ރޭޑިއަންޓެވެ. ފައިނަލުގައި ވާދަކުރީ ޓީސީއާ ދެކޮޅަށެވެ.
