ލަންޑަން (ޖެނުއަރީ 5) - ސްކައި އިޓަލީ އަށް ދިން އިންޓަވިއު މައްސަލައިގައި ރޮމެލޫ ލުކާކޫ، ޗެލްސީގެ ސަޕޯޓަރުންނާއި ކުޅުންތެރިން ކިބައިން މާފަށް އެދުނު ކަމުގައި ވިޔަސް އޭނާ އަށް އެ ކްލަބުން އަދަބު ދޭނެ ކަމަށް ރިޕޯޓްތައް ބުނެފި އެވެ.
މީގެ ތިން ހަފްތާ ކުރިން ސްކައި އިޓަލީ އަށް ލުކާކޫ ދިން އިންޓަވިއު އާންމުކުރީ މިދިޔަ ހަފްތާގަ އެވެ. އެ އިންޓަވިއުގައި ލުކާކޫ ވަނީ ޗެލްސީގައި މި ވަގުތު ހުރީ އުފަލުން ނޫން ކަމަށާއި އަލުން ކުރީގެ ޓީމު އިންޓަ މިލާނަށް ދާން ބޭނުންވާ ކަމަށް ބުނެފަ އެވެ. އަދި ޗެލްސީގެ ކޯޗު ތޯމަސް ޓުޗެލް ކުޅުވާ ސްޓައިލާ މެދު ހިތްހަަމަނުޖެހޭ މޭރުމަކުން ވާހަކަ ދައްކައި، އިންޓަ ދޫކޮށްލަން ޖެހުނީ އެންމެ ބޭނުންވި ގޮތަށް ނޫން ކަމަށް ބުނެ، ޗެލްސީ އަށް އިހުތިރާމް ކުޑަވާ ގޮތަށް ލުކުާކޫ ވާހަކަ ދައްކާފައިވެ އެވެ.
އެ މައްސަލައިގައި ޓުޗެލް ނިންމީ މިދިޔަ އާދިއްތަ ދުވަހު އިނގިރޭސި ޕްރިމިއާ ލީގުގައި ޗެލްސީން ލިވަޕޫލާ ދެކޮޅަށް ކުޅޭ މެޗު ސްކޮޑުން ލުކާކޫ އުނިކުރާށެވެ. މިދިޔަ ހޯމަ ދުވަހު ލުކާކޫ އާއި ޓުޗެލް ވަނީ ބައްދަލުކޮށް، ހުރި މައްސަލަތައް ނިމުމަކަށް ގެނެސްފަ އެވެ. މިރޭ އިނގިރޭސި ލީގު ކަޕް ސެމީ ފައިނަލުގައި ޓޮޓެންހަމާ ދެކޮޅަށް ޗެލްސީ ކުޅޭ މެޗުގެ ސްކޮޑުގައި ލުކާކޫ ވަނީ ހިމަނައިފަ އެވެ.
ލުކާކޫ ރޭ ޗެލްސީގެ ރަސްމީ ވެބްސައިޓް މެދުވެރިކޮށް ނެރުނު ބަޔާނެއްގައި ބުނެފައިވަނީ އޭނާ ދެއްކި ވާހަކަތަކުގެ ސަބަބުން ދިމާވި ކަންތައްތަކާ މެދު ދެރަވާ ކަމަށާއި ކްލަބާ ގުޅޭ އެންމެންގެ ކިބައިން މާފަށް އެދޭ ކަމަށެވެ. އަދި އޭނާ ދެއްކި ވާހަކަތަކުގެ މާނަ އޮޅޭ ގޮތަށާއި ޗެލްސީ އަށް ކުޑައިމީސްކޮށް ދެކެވިފައި ހުރި ހުރިހާ ވާހަކަތަކަށް މާފަށް އެދޭ ކަމަށް ލުކާކޫ ބުންޏެވެ.
ޓުޗެލް ބުނީ ޗެލްސީގެ ކުޅުންތެރިން ވެސް އެދެނީ ލުކާކޫ މާފަށް އެދިފައިވާތީ އޭނާ އަށް މާފުކޮށްދީ އެކުގައި ކުރިއަށް ދިއުމަށް ކަމަށެވެ.
އެކަމަކު، އިނގިރޭސި މީޑިއާ ރިޕޯޓްތައް ބުނާގޮތުން ޗެލްސީގެ މެނޭޖްމަންޓުން ވަނީ ލުކާކޫ ދިން އިންޓަވިއު މައްސަލައިގައި އޭނާ އަށް އަދަބު ދޭން ނިންމައިފަ އެވެ. އެ ގޮތުން ލުކާކޫ 500،000 ޕައުންޑުން ޖޫރިމަނާކުރާނެ ކަމަށް ރިޕޯޓްތައް ބުނެ އެވެ. އަދި ކުރިއަށް އޮތްތަނުގައި އެކްސްކްލޫސިވް އިންޓަވިއު ދޭއިރު ކްލަބްގެ މީޑިއާ އަށް ރިޕޯޓްކުރަން ލުކާކޫ އަށް އަންގާނެ އެވެ.
ލުކާކޫ، މި ސީޒަނުގައި ޗެލްސީ އަށް ބަދަލުވީ އެ ކްލަބްގެ އެންމެ އަގުބޮޑު ޓްރާންސްފާގެ ގޮތުގަ އެވެ. އުމުރުން 28 އަހަރުގެ ލުކާކޫ ގަންނަން ޗެލްސީން ވަނީ 135 މިލިއަން ޑޮލަރު ދީފަ އެވެ. މިއީ ލުކާކޫ ޗެލްސީއާ ގުޅުނު ދެ ވަނަ ފަހަރެވެ. ލުކާކޫ އެންމެ ފުރަތަމަ ޗެލްސީ އަށް ބަދަލުވީ 2011 ވަނަ އަހަރު އެވެ. ބެލްޖިއަމްގެ އެންޑަލެކްޓް ދޫކޮށް އެ ފަހަރު ޗެލްސީ އަށް ބަދަލުވީ 17 މިލިއަން ޕައުންޑް (23 މިލިއަން ޑޮލަރު) އަށެވެ.
