ބާސެލޯނާ (ޖެނުއަރީ 1) - ބާސެލޯނާ އިން ޔުވެންޓަސް އަށް ކުޅެމުން އަންނަ ސްޕެއިންގެ ފޯވާޑް އަލްވާރޯ މޮރާޓާ ގެންނަން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ދާދި ފަހުން ބާސެލޯނާ އިން ވަނީ މެންޗެސްޓާ ސިޓީ އަށް ކުޅެމުން އައި ސްޕެއިންގެ ފޯވާޑް ފެރާން ޓޮރޭޒްގެ ސޮއި ހޯދައިފަ އެވެ. ރިޕޯޓްތައް ބުނާގޮތުގައި ބާސެލޯނާ އިން މިހާރު ވަނީ މޮރާޓާ ގެންނަން އޭނާއާ އެކު އެއްބަސްވުމަކަށް އަތުވެފަ އެވެ.
އެކަމަކު، މޮރާޓާ ގެންނަން ބާސެލޯނާ އިން ކުރާ މަސައްކަތް ކާމިޔާބުވާން އޮތީ އެހެން ދެ ކްލަބަކުން ވެސް އެއްބަސްވުމަކަށް އައިސްގެންނެވެ.
މޮރާޓާ މި ވަގުތު ޔުވެންޓަަސްގައި ހުރީ އެތުލެޓިކޯ މެޑްރިޑްގެ ލޯން އެއްބަސްވުމެއްގެ ދަށުންނެވެ. އެ ކޮންޓްރެކްޓްގައިވާ ގޮތުން ޔުވެންޓަސް އިން ބޭނުން ނަމަ އެއްބަސްވުން ދާއިމީކުރުމުގެ ފުރުސަތު ވެސް އެބައޮތެވެ. އެއީ ލޯން އެއްބަސްވުން ހަމަވުމުން 35 މިލިއަން ޔޫރޯ ދައްކައިގެންނެވެ. އެއްބަސްވުން ދާއިމީ ނުކޮށް ލޯން އެއްބަސްވުން އާ ކުރާނަމަ ކޮންމެ ސީޒަނަކަށް 10 މިލިއަން ޔޫރޯގެ ލޯން ފީއެއް ދައްކަން ޖެހޭނެ އެވެ.
ޔުވެންޓަސް އިން މޮރާޓާގެ އެއްބަސްވުން ދާއިމީ ކުރަން ދައްކަން ޖެހޭ ފީ ބާސެލޯނާ އިން ހަމަޖައްސައިފިނަމަ މޮރާޓާ އަށް ބާސެލޯނާ އަށް ބަދަލުވެވޭނެ އެވެ. އެކަމަކު، ޔުވެންޓަސް އިން މޮރާޓާގެ ލޯން އެއްބަސްވުން ކެންސަލްކޮށްފިނަމަ، ބާސެލޯނާ އިން ދެން މޮރާޓާ ހޯދަން މަޝްވަރާކުރަން ޖެހޭނީ އެތުލެޓިކޯ މެޑްރިޑާ އެވެ.
މޮރާޓާ ދޫކޮށްލުމަށް ފަހު ޔުވެންޓަސް އިން ގެންނަން ބޭނުންވަނީ ޕީއެސްޖީގެ އާޖެންޓީނާ ފޯވާޑް މައުރޯ އިކާޑީ އެވެ. ބާސެލޯނާ އިން އޮތީ މޮރާޓާ ގެންނަން ކުރާ މަސައްކަތުގައި އެ ޓީމަށް ކުޅޭ ނެދަލެންޑްސްގެ ފޯވާޑް މެމްފިސް ޑިޕާއި ވިއްކާލަން ތައްޔާރަށެވެ.
ރެއާލް މެޑްރިޑަށް ކުރިން ކުޅުނު މޮރާޓާ ވަނީ އެތުލެޓިކޯ އާއި ޔުވެންޓަސްގެ އިތުރުން އިންގްލެންޑްގެ ޗެލްސީ އަށް ވެސް ކުޅެފަ އެވެ.
