ލަންޑަން (ޑިސެމްބަރު 31) - ޗެލްސީގެ އެންމެ އަގުބޮޑު ޓްރާންސްފާގެ ގޮތުގައި މި ސީޒަނުގައި އެ ޓީމަށް ގެނައި ފޯވާޑް ރޮމެލޫ ލުކާކޫ އެ ޓީމުގައި ހުރީ އުފަލުންނެއް ނޫން ކަމަށް. ބުނެފި އެވެ.
ސީޒަން ފެއްޓުމުގެ ކުރިން ލުކާކޫ ގަންނަން ޗެލްސީން އެންމެ ފުރަތަމަ ކުރި ދެ ބިޑް ވެސް އިންޓަ އިން ވަނީ އަނބުރާ ފޮނުވާލައިފަ އެވެ. އެކަމަކު، ޗެލްސީން ލުކާކޫ ގަންނަން ތިން ވަނަ ބިޑެއް ތައްޔާރުކުރަން ފެށުމާ އެކު ލުކާކޫ އިންޓަގައި އެދުނީ އޭނާ ޗެލްސީ އަށް ދޫކޮށްލުމަށެވެ. އެހެންވެ، އިންޓަ އިން ބޭއިހުތިޔާރުގައި ވިޔަސް ނިންމީ ލުކާކޫ ވިއްކާލާށެވެ.
ޗެލްސީން އެންމެ ފުރަތަމަ ލުކާކޫ ގަންނަން އިންޓަ އަށް ހުށަހެޅީ 94 މިލިއަން ޑޮލަރުގެ ބިޑެކެވެ. މާ ގިނައިރުތަކެއް ނުވެ އިންޓަ އިން އެ ބިޑް އަނބުރާ ފޮނުވާލި އެވެ. އޭގެ ފަހުން ޗެލްސީން ހުށަހެޅީ 118 މިލިއަން ޑޮލަރާއި ސްޕެއިންގެ ފުލްބެކް މާކޯސް އަލޮންސޯ އެވެ. އެ ޑީލަށް ވެސް އިންޓަ އިން ވަނީ ނޫނެކޭ ބުނެފަ އެވެ. ލުކާކޫގެ ވެސް އެދުމާ އެކު އިންޓަ އިން އޭނާ ޗެލްސީ އަށް ވިއްކާލީ 135 މިލިއަން ޑޮލަރަށެވެ. އެއީ އެއް ކުޅުންތެރިއަކު ހޯދަން ޗެލްސީން އެ ކްލަބްގެ ތާރީހުގައި ވެސް ދިން އެންމެ ބޮޑު ޓްރާންސްފާ ފީ އެވެ.
ސްކައި އިޓަލީން ކުރި އިންޓަވިއުއެއްގައި ވާހަކަ ދައްކަމުން ލުކާކޫ ބުނީ އަލުން ޗެލްސީ އަށް އައިސް މި ވަގުތު ދިމާވެފައިވާ ހާލަތާ ހުރެ އޭނާ ހިތްހަމަ ނުޖެހޭ ކަމަށެވެ.
"މި ވަގުތުގެ ހާލަތަށް ބަލާއިރު، ޗެލްސީގެ ކޯޗު (ޓުޗެލް) ކުޅެނީ ތަފާތު ސިސްޓަމަކަށް. އެ ސަބަބުތަކާ ހުރެ ވެސް އަހަރެމެން މި ހުރީ ހިތްހަމަޖެހިފައެއް ނޫން. އެކަމަކު، އަހަންނަކީ ޕްރޮފެޝަނަލެއް އަހަރެންގެ ފޯކަސް އަކީ ރަނގަޅަށް މަސައްކަތް ކުރުން،" ލުކާކޫ ބުންޏެވެ.
އަލުން ޗެލްސީ އަށް ބަދަލުވުމަށް ފަހު ލުކާކޫ ވަނީ 18 މެޗުން ހަތް ގޯލު ޖަހައިފަ އެވެ. އޭގެ ތެރޭގައި އެންމެ ފަހުން ޗެލްސީ ކުޅުނު ދެ މެޗު ކަމަށްވާ އެސްޓަން ވިލާ އާއި ބްރައިޓަން މެޗުގައި ޖެހި ގޯލުތައް ހިމެނެ އެވެ.
މިއީ ލުކާކޫ ޗެލްސީއާ ގުޅުނު ދެ ވަނަ ފަހަރެވެ. ލުކާކޫ އެންމެ ފުރަތަމަ ބެލްޖިއަމްގެ އެންޑަލެކްޓް ދޫކޮށް ޗެލްސީ އަށް 2011 ވަނަ އަހަރު ބަދަލުވީ 17 މިލިއަން ޕައުންޑް (23 މިލިއަން ޑޮލަރު) އަށެވެ. އެކަމަކު، ޒުވާން އުމުރުގައި ޗެލްސީ އަށް ބަދަލުވެ، ލުކާކޫ އަށް އެ ޓީމުގައި މާ ރަނގަޅު ފުރުސަތެއް ނުލިބެ އެވެ.
އަލުން އިންޓަ އަށް ދާން ލުކާކޫ ބޭނުން
އިންޓަ އިން 11 އަހަރު ތެރޭ ފުރަތަމަ ފަހަރަށް މިދިޔަ ސީޒަނުގައި އިޓާލިއަން ލީގު ޗެމްޕިއަންކަން ހޯދިއިރު، ޓީމުގެ ތަރިއަކީ ލުކާކޫ އެވެ. ލީގުގެ މޮޅު ކުޅުންތެރިއަކީ ވެސް ލުކާކޫ އެވެ.
ޗެމްޕިއަންކަން ހޯދާފައި އެއް ސީޒަން ވެސް މަޑުނުކޮށް، އުމުރުން 28 އަހަރުގެ ލުކާކޫ، އިންޓަ ދޫކޮށްލި ގޮތުން ގިނަ ބަޔެއްގެ ފާޑުކިޔުން އޭނާ އަށް އަމާޒުވި އެެވެ. އިންޓަ މިލާންގެ ޗީފް ބެޕޭ މޮރާޓާ ވިދާޅުވީ ލުކާކޫ ޗެލްސީއާ ގުޅުނީ ފައިސާ އަށް ކަމަށެެވެ.
ލުކާކޫ ބުނީ އޭނާ އިންޓަ ދޫކޮށްލިއިރު ކަންތައް ކުރީ އެންމެ ރަނގަޅު ގޮތަށް ނޫން ކަމަށެވެ. އަދި އޭރު ހާލަތު ދިޔަ ގޮތުން މީޑިއާގައި އެ ވާހަކަތައް ދައްކަން އެއީ ރަނގަޅު ވަގުތު ނޫން ކަމަށާއި އެކަމަކު، މި ވަގުތު އިންޓައާ މެދު އޭނާ ދެކޭ ގޮތް މީޑިއާގައި ހާމަކުރަން މިއީ އެންމެ ރަނގަޅު ހާލަތް ކަމަށް ލުކާކޫ ވަނީ ބުނެފަ އެވެ.
"އަހަރެން އިންޓަގެ ސަޕޯޓަރުން ކިބައިން މާފަށް އެދެން އެއީ އަހަރެން އިންޓަ ދޫކޮށްލާއިރު ކަންތައް ކުރަން ޖެހޭނީ ރަނގަޅަށް. އަހަރެން ހިިތުގެ އެންމެ ފުންމިނުން އެދޭ އެދުމަކީ ކައިރި މުސްތަގުބަލެއްގައި އަލުން އިންޓަ އަށް ދިއުން. އެއީ އަހަރެންގެ ކެރިއަރުގެ ފަހު ކޮޅުގައެއް ނޫން. ރަނގަޅު ލެވަލެއްގައި އަހަރެން ކުޅެމުން ދަނިކޮށް،" ލުކާކޫ ބުންޏެވެ.
ބެލްޖިއަމް ގައުމީ ޓީމަށް އެންމެ ގިނަ ގޯލު ޖަހައިދިން ލުކާކޫ ވަނީ މެންޗެސްޓާ ޔުނައިޓެޑް ދޫކޮށް އިންޓަ އަށް ބަދަލުވެ، އެ ޓީމަށް ކުޅުނު 95 މެޗުން 64 ގޯލު ޖަހައިފަ އެވެ.
