ލަންޑަން (ޑިސެމްބަރު 30) - ޗެލްސީގެ އެކެޑަމީގެ ކޮންސަލްޓަންޓެއްގެ ގޮތުގައި ޗެލްސީގެ ކުރީގެ ކެޕްޓަން ޖޯން ޓެރީ އެ ކްލަބާ އަލުން ގުޅިއްޖެ އެވެ.
ޗެލްސީއާ އެކު ކުޅުންތެރިއެއްގެ ގޮތުގައި ހޭދަކުރި 15 އަހަރުގެ ތެރޭގައި ޓެރީ ،41، ވަނީ 15 ތަށި ހޯދައިފަ އެވެ. ޗެލްސީ ދޫކޮށް ޓެރީ އޭނާގެ ކެރިއަރުގެ ފަހު އަހަރު ކުޅުނީ އެސްޓަން ވިލާއަށެވެ.
ކުޅުން ހުއްޓާލުމަށް ފަހު ޓެރީ ވަނީ ވިލާގެ އެސިސްޓަންޓް ކޯޗެއްގެ ގޮތުގައި 2018 އިން 2021 އަށް މަސައްކަތްކޮށްފަ އެވެ.
ޗެލްސީގެ އެކެޑަމީގައި އަންނަ މަހުން ފެށިގެން ޓެރީ ޕާޓް ޓައިމްކޮށް ކުޅުންތެރިންނާއި ކޯޗުންނާއެކު މަސައްކަތްކުރާނެ އެވެ.
"ފްލެކްސިބަލްކޮށް މަސައްކަތްކުރެވުމުގެ ފުރުސަތު ލިބުމަކީ އެންމެ މުހިންމުކަން،" ޓެރީ އޭނާގެ ސޯޝަލް މީޑިއާގައި ބުނެފައިވެ އެވެ. "އެކެޑަމީގައި މަސައްކަތްކުރަމުން، އަހަންނަށް އެހެން ކަންތައްްތަކަށް ވެސް ސަމާލުކަން ދޭން ވަގުތު އެބަލިބޭ."
ޗެލްސީގެ ހެޑް އޮފް ޔޫތު ޑިވެލޮޕްމަންޓް ނީލް ބާތު ބުނީ ކުޅުންތެރިއެއްގެ ގޮތުގައި އަދި ކޯޗެއްގެ ގޮތުގައި ޓެރީ ހޯދާފައިވާ ތަޖުރިބާގެ ސަބަބުން، އެކެޑަމީގެ ކުޅުންތެރިންނަށް ފައިދާކުރާނެ ކަމަށެވެ. -- ބީބީސީ
