ލަންޑަން (ޑިސެމްބަރު 30) - އިނގިރޭސި ޕްރިމިއާ ލީގުގައި ރޭ ބްރެންޓްފޯޑް އަތުން 1-0 އިން މޮޅުވެ، މެންޗެސްޓާ ސިޓީން ލީގުގެ އެއް ވަނައިގައި އަށް ޕޮއިންޓުގެ ލީޑެއް ނެގިއިރު، އަމިއްލަ ދަނޑުގައި ކުޅުނު ޗެލްސީން ފަހު ވަގުތު ބްރައިޓަންއާ 1-1 އިން އެއްވަރުވެއްޖެ އެވެ.
ލީގުގެ އެއް ވަނައިގައި ސިޓީ އޮތީ 20 މެޗުން 50 ޕޮއިންޓް ހޯދައިގެންނެވެ. ރޭގެ ނަތީޖާއާ އެކު ޗެލްސީ ވަނީ ދެ ވަނަ އަށް ޖެހިލައިފަ އެވެ. އެއީ 20 މެޗުން 42 ޕޮއިންޓް ހޯދައިގެންނެވެ. ތިން ވަނައިގައި އޮތް ލިވަޕޫލަށް 19 މެޗުން 41 ޕޮއިންޓް ލިބިފައިވާއިރު، ދެން ލިވަޕޫލަށް ކުޅެން އޮތީ ޗެލްސީ މެޗެވެ.
ރޭގެ މޮޅަކީ ލީގުގައި ސިޓީން ޖެހިޖެހިގެން ހޯދި 10 ވަނަ މޮޅެވެ. ސިޓީގެ ކޯޗު ޕެޕް ގާޑިއޯލާ ބުނީ އެއް ވަނައިގައި ބޮޑު ލީޑެއް ލިބުނު ކަމުގައި ވިޔަސް މި ހިސާބުން ހުރިހާ ކަމެއް ނިމުނީ ކަމަށް ބަލައިގެން އަތްއުރާލައިގެން ނުތިބެވޭނެ ކަމަށެވެ.
"އަހަރެން ދެކޭ ގޮތުގައި އަދިވެސް އަހަރެމެން (ސިޓީން) 54 ޕޮއިންޓް ހޯދަން ކުޅެން ޖެހޭ. ތި އެންމެން އަހަރެމެންނަށް ތައުރީފުކޮށް ލީގު ލިބުނު ކަމަށް ދޭހަވާ ގޮތަށް ވާހަކަ ދައްކައި ހެދި ކަމުގައި ވިޔަސް އަހަރެން ތި ވާހަކަތަކަށް ސަމާލުކަމެއް ނުދޭނަން. އަހަރެމެންނަށް އަދި އެއްވެސް ކަމެއް ޔަގީނެއް ނުވޭ،" ގާޑިއޯލާ ބުންޏެވެ.
ބްރެންޓްފޯޑް ދަނޑުގައި ރޭ އެ ޓީމުން ސިޓީ ކައިރީގައި ރަނގަޅު ކުޅުމެއް ދައްކައި ލަނޑެއް ޖެހޭތޯ ގިނަ މަސައްކަތްތަކެއް ކުރި އެވެ. މެޗުގެ ކުރީކޮޅުގައި ބްރެންޓްފޯޑުން އުފެއްދި އެޓޭކެއްގައި ސިޓީގެ ޑިފެންޑަރު ރުބެން ޑިއާސް ބޮލުގައި ޖެހިގައި ބައިކޮޅަށް ވަންނަން ދިޔަ ބޯޅަ ސިޓީގެ ކީޕަރު އެޑަސަން މޮރާއޭސް ވަނީ މަތަކޮށްފަ އެވެ.
ސިޓީން މި މެޗުގައި ޖެހި ހަމައެކަނި ގޯލު ކާމިޔާބުކުރީ 16 ވަނަ މިނިޓްގައި ފިލް ފޯޑެން އެވެ. ކެވިން ޑިބްރޭނާ ހުރަސްކޮށްލި ބޯޅަ ފޯޑެން ވަނީ ތިރިތިރިން ގޯލުގެ ކަނަށް ފޮނުވާލައިފަ އެވެ. ފޯޑެން އޮފްސައިޑްވާނެ ކަމަށް ބެލި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ ގޯލެއް ކަމަށެވެ.
ޗެލްސީ ދަނޑުގައި ރޭ އެ ޓީމަށް ލީޑުނަގައިިދިނީ ބެލްޖިއަމްގެ ފޯވާޑް ރޮމެލޫ ލުކާކޫ އެވެ. މޭސަން މައުންޓް މެޗުގެ 28 ވަނަ މިނިޓްގައި ނަގައިދިން ކޯނަރަކުން ލުކާކޫ މި ގޯލު ޖެހީ ބޮލުންނެވެ. އޭގެ އިތުރުން ފުރަތަމަ ހާފުގައި ގޯލެއް ޖެހޭތޯ ޗެލްސީން ގިނަ މަސައްކަތްތަކެއް ވަނީ ކޮށްފަ އެވެ.
މި މެޗުގެ ދެ ވަނަ ހާފްގައި ބްރައިޓަން އިން ވަނީ ލަނޑު ޖަހާނެ ގިނަ ފުރުސަތުތަކެއް ތަނަވަސްކޮށްފަ އެވެ. އެ ގޮތުން ބްރައިޓަންގެ ޔަކޫބް މޯޑާ ޖެހި ބޯޅައެއް ގޯލުގެ ހުރަސްދަނޑީގައި ޖެހިފައި ބޭރުވިއިރު، އެ ޓީމުގެ އެޑަމް ލަލާނާ، ނީލް މޯޕޭ އަށް ހުސްކޮށް ލިބުނު ފުރުސަތުތަކުން ގޯލެއް ޖެހޭ ގޮތެއްނުވި އެވެ.
ބްރައިޓަން އިން ގޯލެއް ޖަހަން ކުރި މަސައްކަތް ކާމިޔާބުވީ މެޗުގެ އިތުރު ވަގުތުގެ ފުރަތަމަ މިނިޓްގަ އެވެ. މި ގޯލު ޖެހީ ބަދަލު ކުޅުންތެރިއެއްގެ ގޮތުގައި ކުޅެން އެރި ޑެެނީ ވެލްބެކް އެވެ. ބްރައިޓަންގެ ސްޕެނިޝް ފުލްބެކް މާކް ކުކުރޭލާ ނަގައިިދިން ހުރަހަކުން ވެލްބެކް ބޮލުން ޖެހި ބޯޅަ އަމާޒުވީ ގޯލުގެ ކަނަށެވެ.
ޗެލްސީގެ ކޯޗު ތޯމަސް ޓުޗެލް ބުނީ މި ގޮތަށް ޕޮއިންޓް ގެއްލުމަކީ ވަރަށް ބޮޑު މާޔޫސްކަމެއް ކަމަށާއި މިއީ އަމިއްލަ އަށް ހެދޭ ގޯސްތަކުގެ ނަތީޖާ ކަމަށެވެ.
