ލަންޑަން (ޑިސެމްބަރު 29) - ޗެލްސީ ޑިފެންޑަރު ބެން ޗިލްވެލް އަށް ލިބުނު އަނިޔާއާ ގުޅިގެން އޮޕަރޭޝަން ކުރަންޖެހޭ ކަމަށް އެ ކްލަބުން ބުނެފި އެވެ.
އެހެންކަމުން، މި ސީޒަންގައި ދެން ޗިލްވެލް އަށް ކުޅެވޭނެކަމުގެ އުންމީދު ވަނީ ގާތްގަނޑަކަށް ގެއްލިފަ އެވެ. ނޮވެމްބަރު މަހު ޔުވެންޓަސްއާ ދެކޮޅަށް ޗެމްޕިއަންސް ލީގުގައި ޗެލްސީ 4-0 އިން މޮޅުވި މެޗުގައި ޔުވެންޓަސްގެ އޭޑްރިއަން ރަބިއޯ އަތުން ބޯޅަ ހޯދަން އުޅުމުގެ ތެރޭގައި ޗިލްވެލްގެ ކަކުލަށް އަނިޔާވެގެން އޭނާ އަށް ދަނޑުމަތީގައި ފަރުވާ ދީފައި އޭނާ ބަދަލުކުރިއިރު، ދަނޑުން ބޭލުވީ ޗެލްސީގެ މެޑިކަލް ސްޓާފުންގެ އެހީގަ އެވެ.
ލެސްޓާ ސިޓީ އަށް 50 މިލިއަން ޑޮލަރުގެ ޓްރާންސްފާ ފީއެއް ދެއްކުމަށް ފަހު ޗެލްސީން ޗިލްވެލް ސޮއިކުރީ މިދިޔަ އަހަރު އެވެ. އެއީ ފްރޭންކް ލަމްޕާޑްގެ ކޯޗުކަމުގަ އެވެ. ޓުޗެލް ހަވާލުވި ފަހުން ވެސް ޗިލްވެލް އަންނަނީ ރަނގަޅު ކުޅުމެއް ދައްކަމުންނެވެ. އޭނާ އަކީ މި ސީޒަނުގައި ތަފާތު ފޯމެއްގައި ކުޅެމުން އައި ކުޅުންތެރިއެކެވެ.
ޗެލްސީން މަސައްކަތްކުރީ ޗިލްވެލްގެ ރިހެބިލިޓޭޝަން ޕްރޮގްރާމް އިން އޮޕަރޭޝަނެއް ނުކޮށް އޭނާ ފިޓުކުރުމަށެވެ. ޗިލްވެލް އަށް ކޮވިޑް ޖެހުމުން، އޭނާގެ ރިހެބިލިޓޭޝަން ފެށުމުގައި ލަސްތަކެއް ކުރިމަތިވި އެވެ. ރިހެބިލިޓޭޝަން ޕްރޮގްރާމް އިން މާބޮޑު ކުރިއެރުންތަކެއް ނުފެނުމާ އެކު، ޗިލްވެލް އޮޕަރޭޝަން ކުރުމަށް ޗެލްސީން ވަނީ ނިންމައިފަ އެވެ.
"ކުރިއެރުމެއް ނުފެނުމުން، ކްލަބާއި ކުޅުންތެރިޔާ ވެސް ނިންމީ އޮޕަރޭޝަން ކުރިއަށް ގެންދިއުމަށް،" ޗެލްސީން ނެރުނު ބަޔާނެއްގައި ބުނެފައިވެ އެވެ.
ރިޕޯޓްތަކުން ބުނާގޮތުގައި، މި ސީޒަންގައި ޗިލްވެލް އަށް ދެން ކުޅެވޭނެކަމުގެ އުންމީދު ފަނޑުވުމުން، ޗެލްސީގެ ކޯޗު ތޯމަސް ޓުޗެލް ދަނީ ޖެނުއަރީގެ ޓްރާންސްފާގައި ލެފްޓް ބެކެއް ހޯދުމަށް ވިސްނަމުންނެވެ. ޗެލްސީން މި ވަގުތު ޗިލްވެލްގެ ތަނަށް ބޭނުންކުރަނީ ސްޕެއިންގެ ފުލްބެކް މާކޯސް އަލޮންސޯ އެވެ. -- ބީބީސީ
