ބާސެލޯނާ (ޑިސެމްބަރު 22) - ސްޕެނިޝް ލީގުގައި ރޭ ދިހަ މީހުންނާ އެކު ކުޅުނު ސެވިއްޔާ އަތުން ބާސެލޯނާ 1-1 އެއްވަރުވެއްޖެ އެވެ.
ސެވިއްޔާގެ ދަނޑުގައި ކުޅުނު މެޗުގެ 32 ވަނަ މިނިޓުގައި ސެވިއްޔާ އިން ލީޑު ނެގީ އަލެހަންދުރޯ ގޯމޭޒް (ޕާޕޫ ގޯމޭޒް) ޖެހި ލަނޑުންނެވެ. ކޯނަރަކުން އޭރިއާތެެރެއަށް ހުރަސްވި ބޯޅަ ޕާޕޫ ގޯމޭޒް ވަނީ ގޯލުގެެ ދުރުކަނަށް ބޯޅަ އަމާޒުކޮށްލައިފަ އެވެ.
ފުރަތަމަ ހާފު ނިމެނިކޮށް ބާސެލޯނާ އިން ވަނީ އެއްވަރުކޮށްފަ އެވެ. ބާސެލޯނާ އިން ނަތީޖާ ހަމަހަމަކުރީ ރޮނާލްޑް އަރައުހޯ ޖެހި ލަނޑުންނެވެ. އޮސްމާން ޑެމްބެލޭ ނެގި ކޯނަރަކުން އޭރިއާތެރެއަށް ހުރަސްވި ބޯޅަ އަރައުހޯ ވަނީ ފުއްމައިގެން އަރައި ބޮލުން ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ.
މެޗުގެ 64 ވަނަ މިނިޓުގައި ބާސާގެ ޖޫލްސް ކޫންޑޭ ބާސާގެ ޖޯޑީ އަލްބާގެ މޫނާ ދިމާލަށް ބޯޅަ އެއްލުމުން، ރެފްރީ ވަނީ ކޫންޑޭ އަށް ރަތްކާޑު ދައްކައިފަ އެވެ. އެހެންކަމުން، ދެވަނަ ހާފުގެ ބޮޑުގައި ސެވިއްޔާ އިން ކުޅުނީ 10 މީހުންނާ އެކު އެވެ. މި ސީޒަނުގައި ކޫންޑޭ އަށް އަނިޔާ އާއި ސަސްޕެންޝަނުގެ ސަބަބުން ގިނަ މެޗުތަކެއް ވަނީ ގެއްލިފަ އެވެ.
އެއް ކުޅުންތެރިއެއް މަދުކޮށް ސެވިއްޔާ އިން ކުޅެންޖެހުމުން، ބާސާ އިން އޭގެ އެޑްވާންޓޭޖް ނަގާނެ ކަމަށް ސަޕޯޓަރުން އުންމީދުކުރި ނަމަވެސް، ބާސާ އަށް ނަތީޖާ ބަދަލުކޮށްލެވޭ ގޮތެއްނުވި އެވެ. ބާސެލޯނާ މޮޅުކޮށްދޭން އެންމެ ރަނގަޅު ހަމަލާތަކެއް ފޮނުވާލީ ޒުވާން މިޑްފީލްޑަރު ގަވީ އާއި ޑެމްބެލޭ އެވެ. ގަވީ ބޮލުން ޖެހި ބޯޅަ އަރިމަތިން ބޭރަށް ދިޔައިރު، ޑެމްބެލޭ އޭރިއާތެރެއިން ޖެހި ޝޮޓް އަމާޒުވީ ގޯލުގެ ދަނޑިއަށެވެ.
ބާސެލޯނާ އިން 2021 ވަނަ އަހަރު މޮޅަކާ އެކު ނިންމާލަން އުންމީދުކުރި ނަމަވެސް، އެކަން ހާސިލެއްނުވި އެވެ. ސެވިއްޔާ މެޗުން މޮޅުވި ނަމަ ބާސެލޯނާ ތާވަލްގެ ހަތަރު ވަނަ އަށް ޖެހިލާނެ އެވެ.
މެޗަށް ފަހު ވާހަކަ ދައްކަމުން ބާސާގެ ކޯޗު ޒަވީ ހެނާންޑޭޒް ބުނީ މި މެޗުން މޮޅުނުވުމަކީ ގަބޫލްކުރަން ވެސް ދަތި ނަތީޖާއެއް ކަމަށެވެ.
"މިއަދުގެ މެޗުގައި ކުޅުން ރަނގަޅު. އެކަމަކު ގެޔަށް ދާން މިޖެހުނީ ހިތްހަމަނުޖެހިފައިހުރެ. މިއީ އަހަރަމެން މޮޅުވާންޖެހޭ މެޗެއް،" ޒަވީ ބުންޏެވެ. -- ބީބީސީ
