މޮސްކޯ (ޑިސެމްބަރު 9) - ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގައި ޗެލްސީ އާއި މެންޗެސްޓާ ޔުނައިޓެޑް ކުޅުނު ފަހު މެޗުތަކުން މޮޅެއް ނުލިބި ނިންމާލަން ޖެހިއްޖެ އެވެ.
ޗެލްސީން ރަޝިއާގެ ޒެނިޓް ޕީޓާސްބާގާ ކުޅުނު މެޗު ނިމުނީ 3-3 އިން އެއްވަރުވެގެންނެވެ. ޔުނައިޓެޑް ޒުވާން ޓީމެއް ގޮވައިގެން ސްވިޒަލެންޑްގެ ޔަންގް ބޯއީސްއާ ބައްދަލުކުރި މެޗު ނިމުނީ 1-1 އިންނެވެ.
ޒެނިޓްގެ ދަނޑުގައި ރޭ ކުޅުނު މެޗު ފަށައިގެން ދެ ވަނަ މިނިޓްގައި ޗެލްސީ އަށް ލީޑުނަގައިދިނީ ޓިމޯ ވާނާ އެވެ. އެކަމަކު، ފުރަތަމަ ހާފުގެ ފަހު ކޮޅުގައި ކްލައުޑީނިއޯ އާއި ސަރްދާރް އަޒްމޫން ދެ ގޯލު ޖަހައި ޒެނިޓް ކޮޅަށް ނަތީޖާ އަނބުރާލި އެވެ.
އެންމެ ފަހުގެ ޗެމްޕިއަން ދެ ވަނަ ހާފްގައި ކުޅެން ނުކުމެ، ރޮމެލޫ ލުކާކޫ އާއި ވާނާ ޖެހި ގޯލުތަކުން އަނެއްކާ ވެސް ލީޑުނެގި އެވެ. މި މެޗުގައި ލުކާކޫ ޖެހި ގޯލަކީ އެންމެ ފަހުން 10 މެޗުގައި އޭނާ ޖެހި ފުރަތަމަ ލަނޑެެވެ. ޗެލްސީ މޮޅުވާނެ ކަމަށް ބަލައިގެން ހުއްޓައި، ޒެނިޓުން ވަނީ އިތުރު ވަގުތުގައި ގޯލެއް ޖަހައި ނަތީޖާ އެއްވަރުކޮށްފަ އެެވެ. އޭރިއާ ރޮނގުކައިރިން މި ގޯލު ޖެހީ މަގޯމެޑް އޮޒްޑޯއޭވް އެވެ.
ގްރޫޕް އެޗްގެ އެއް ވަނަ ލިބުނީ ރޭ ސްވިޑެންގެ މަލްމޯ އަތުން 1-0 އިން މޮޅުވި ޔުވެންޓަސް އަށެވެ. މޮއިސޭ ކީންގެ ގޯލުން ރޭ މޮޅުވި ޔުވެންޓަސް ގްރޫޕް ސްޓޭޖު ނިންމާލީ 15 ޕޮއިންޓާ އެކު އެވެ. ދެ ވަނަ އަށް ދިޔަ ޗެލްސީ އަށް ލިބުނީ 13 ޕޮއިންޓެވެ. ރޭގެ މެޗުން މޮޅުވިނަމަ ޗެލްސީ އަށް ގްރޫޕްގެ އެއް ވަަނަ ލިބޭނެ އެވެ. މި ގްރޫޕްގެ ތިން ވަނަ ދިޔަ ޒެނިޓަށް ވަނީ ފަސް ޕޮއިންޓް ލިބިފަ އެވެ. މަލްމޯ މުބާރާތް ނިންމާލީ ޕޮއިންޓަކާ އެކު އެވެ.
ރޭގެ މެޗަށް ނުކުތްއިރު ވެސް ޔުނައިޓެޑަށް އޮތީ ގްރޫޕްގެ އެއް ވަނަގެ ގޮތުގައި އަނެއް ބުރުން ފުރުސަތު ލިބިފަ އެވެ. އެހެންވެ، ޔުނައިޓެޑުން ނެރުނީ ނިސްބަތުން ވަރަށް ޒުވާން ޓީމެކެވެ. ސީނިއާ ގިނަ ކުޅުންތެރިންނަށް ވަނީ ރެސްޓް ދީފަ އެވެ.
މެޗުގެ ނުވަ ވަނަ މިނިޓްގައި ޔުނައިޓެޑަށް ލީޑުނަގައިދިނީ މޭސަން ގްރީންވުޑް އެވެ. ފުރަތަމަ ހާފު ނިމުމުގެ ކުރިން ފަބިއަން ރެއިޑާ ވަނީ ޔަންގް ބޯއީސް އަށް އެއްވަރުކޮށްދީފަ އެވެ. މި ނަތީޖާއާ އެކު ޔުނައިޓެޑްގެ އާ ކޯޗު ރަލްފް ރަންގްނިކްގެ ކޯޗުކަމުގައި އެ ޓީމުން ޗެމްޕިއަންސް ލީގުގައި ކުޅުނު ފުރަތަމަ މެޗު ނިމިފައިވަނީ އެއްވަރުވެގެންނެެވެ.
ޔުނައިޓެޑުން ގްރޫޕް އެފްގެ އެއް ވަނަ ހޯދީ 11 ޕޮއިންޓާ އެކު އެވެ. މި ގްރޫޕުން ދެ ވަނަ އަށް ދާ ޓީމެއް އެނގޭނީ މިރޭ ވިޔަރެެއާލާއި އެޓަލަންޓާ ކުޅޭ މެޗަށް ފަހު އެވެ. ހަތް ޕޮއިންޓާ އެކު ވިޔަރެއާލް މި ވަގުތު ދެ ވަނައިގައި އޮތްއިރު ތިނެއްގައި އެޓަލަންޓާ އޮތީ ހަ ޕޮއިންޓް ހޯދައިގެންނެވެ. ޔަންގް ބޯއީސް ހުރިހާ މެޗެއް ހަމަވިއިރު ލިބުނީ ފަސް ޕޮއިންޓެވެ.
