މެޑްރިޑް (ނޮވެމްބަރު 28) - ސްޕެނިޝް ލީގުގައި ރޭ ފަހު ވަގުތު ޖެހި ގޯލުތަކާ އެކު ބާސެލޯނާ އިން 3-1 އިން ވިޔަރެއާލް އަތުން މޮޅުވެއްޖެ އެވެ.
މި މޮޅާ އެކު ބާސެލޯނާ އޮތީ 14 މެޗުން 23 ޕޮއިންޓާ އެކު ލީގުގެ ހަތް ވަނައިގަ އެވެ. އެއް ވަނައިގައި އޮތް ރެއާލް މެޑްރިޑަށް ވަނީ 13 މެޗުން 30 ޕޮއިންޓް ލިބިފަ އެވެ.
ވިޔަރެއާލް ދަނޑުގައި ރޭ ކުޅުނު ފުރަތަމަ ހާފުގައި ދެ ޓީމުން ކުރެ އެއް ވެސް ޓީމަކަށް ގޯލެއް ޖެހޭގޮތެއް ނުވި އެވެ. އެކަމަކު، ދެ ވަނަ ހާފްގެ ކުޅުން ފެށިގެން ފަސް މިނިޓް ތެރޭ ބާސެލޯނާ އިން ލީޑުނެގި އެވެ. އެ ޓީމުގެ ގޯލު ޖެހީ ފްރެންކީ ޑި ޔޯން އެވެ. އޭރިއާތެރެއިން ޑި ޔޯން މި ގޯލު ޖެހުމުން ލައިންސްމަން ވަނީ އޮފްސައިޑް ކަމަށް ދިދަ ނަގައިފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމުން ޑި ޔޯން ހުރީ އޮފްސައިޑްގައި ނޫންކަން ކަށަވަރުވުމުން ރެފްރީ ނިންމީ ގޯލު ބަލައިގަންނާށެވެ.
ނަތީޖާ ހަމަހަމަ ކުރަން ވިޔަރެއާލުން ކުރަމުންދިޔަ މަސައްކަތް ކާމިޔާބުވީ މެޗުގެ 76 ވަނަ މިނިޓްގަ އެވެ. މި ގޯލު ޖެހީ ސެމިއުލް ޗުކުވޭޒީ އެވެ. ވިޔަރެއާލްގެ ފޯވާޑް އާނައުޓް ޑަންޖޫމާ އޭރިއާތެރެއަށް ޖައްސާލި ބޯޅަ ޗުކުވޭޒީ ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
ބާސެލޯނާ އިން ދެ ވަނަ ފަހަރަށް ލީޑުނެގީ މެޗުގެ 88 ވަނަ މިނިޓްގަ އެވެ. ވިޔަރެއާލްގެ ޑިފެންޑަރުންނަށް ހެދުނު ގޯހެއްގެ ފައިދާނަގައި މެމްފިސް ޑިޕާއި މި ގޯލު ޖެހީ ވިޔަރެއާލްގެ ކީޕަރު ޖެރެލީމޯ ރޫލީ ކައިރިން ނައްޓާފަ އެވެ.
އިތުރު ވަގުތުގެ ހަތަރު ވަނަ މިނިޓްގައި ބާސެލޯނާގެ ތިން ވަނަ ގޯލު ޖެހީ ޕެނަލްޓީ އަކުން ފިލިއްޕޭ ކުޓީނިއޯ އެވެ. މިއީ ވިޔަރެއާލްގެ އާޖެންޓީނާގެ ޑިފެންޑަރު ހުއާން ފޮއިތު އޭރިއާތެރެއިން ކުޓީނިއޯ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
މެޗަށް ފަހު ބާސެލޯނާގެ ކޯޗު ޒަވީ ހެނާންޑޭޒް ބުނީ އޭނާ ހަވާލުވި ފަހުން ބާސެލޯނާ ކުޅުނު ތިން މެޗުގެ ތެރެއިން އެންމެ ދަށްކޮށް ކުޅެވުނު މެޗަކީ މިއީ ކަމަށެވެ. އަދި ހަގީގަތަށް ބުނާނަމަ މި މެޗުން ވިޔަރެއާލް ބަލިވުން ހައްގުނުވާ ކަމަށާއި މެޗުން ބާސެލޯނާ މޮޅުވީ ޑިޕާއިގެ މަސައްކަތުން އެ ގޯލު ޖެހުމުން ކަމަށެވެ.
