ޕެރިސް (ނޮވެމްބަރު 7) - ޕެރިސް މާސްޓާސް ފައިނަލުން ފުރުސަތު ހޯދައި ސާބިއާގެ ޓެނިސް ތަރި ނޮވަކް ޖޮކޮވިޗް މި ސީޒަނުގެ ދުނިޔޭގެ ރޭންކިން އެއް ވަނަ ކަށަވަރުކޮށް ޓެނިހުގެ ތާރީހުގައި ރެކޯޑެއް ގާއިމްކޮށްފި އެވެ.
މީގެ ކުރިން ޓެނިސް ސީޒަނެއް ނިންމާލާއިރު, ދުނިޔޭގެ ރޭންކިން އެއް ވަނައިގެ ގޮތުގައި އޮތުމުގެ ރެކޯޑް އޮތީ ހަ ފަހަރު އެ މަގާމު ހާސިލްކުރި ޖޮކޮވިޗާއި ކުރީގެ ކުޅުންތެރިޔާ ޕީޓް ސަމްޕްރަސް އަތުގަ އެވެ.
އެކަމަކު، އިއްޔެ ޕެރިސް މާސްޓާސް ސެމީ ފައިނަލުގައި ޕޮލެންޑްގެ ހިއުބާޓް ހޫކާޒް އަތުން ހޯދި މޮޅަށް ފަހު އެ ރެކޯޑް މިހާރު އޮތީ ޖޮކޮވިޗް އަތުގަ އެވެ. އެއީ ހަތް ފަހަރު ސީޒަންގެ ރޭންކިން އެއް ވަނައިގެ ގޮތުގަ އެވެ. މިއީ މަޝްހޫރު ދެ ތަރިން ކަމަށްވާ ރަފައެލް ނަޑާލާއި ރޮޖާ ފެޑެރާ އަށް ވުރެ ދެ ފަަހަރު އިތުރު އަދަދެކެވެ.
ހިއުބާޓް އަތުން ފުރަތަމަ ސެޓުގައި ބަލިވި ނަމަވެސް ޖޮކޮވިޗް އިއްޔެ މޮޅުވީ ތަފާތު ހިތްވަރެއް ދައްކައިގެންނެވެ. މެޗުގެ ސެޓުތައް ދިޔައީ 3-6, 6-0, 7-6 އިންނެވެ. އުނދަގުލުން މި މެޗު ކާމިޔާބު ކުރެވުނު ނަމަވެސް ޖޮކޮވިޗް ހުރީ ހިތްހަމަ ޖެހިފަ އެވެ. އެއީ އޭނާ އައިޑަލްއެއްގެ ގޮތުގައި ދެކުނު ސަމްޕްރަސްގެ ރެކޯޑެއް މުގުރާލެވުމުންނެވެ.
"އަހަރެން ޓެނިސް ކުޅެން ފެށިއިރު އައިޑަލް އެއްގެ ގޮތުގައި ދެކުނީ ޕީޓް (ސަމްޕްރަސް). އޭނަގެ މި ފަދަ ރެކޯޑެއް ފަހަނައަޅައި ކުރިއަށް ދެވުމަކީ އަހަންނަށް ބޮޑު ފަހުރެއް. ބުނެދޭން ވެސް ނޭނގޭހާ ހިތްހަމަޖެހިފައި މި ހުރީ،" ޖޮކޮވިޗް ބުންޏެވެ.
"ދެމެހެއްޓެނިވި ގޮތެއްގައި ދުނިޔޭގެ ރޭންކިން އެއްގެ އެއް ވަނަ މަގާމު ދެމެހެއްޓުމަކީ ކުޑަ މަސައްކަތެއް ނޫން. އެ ފަދަ ކަމެއް ހާސިލްކުރެވޭނީ ވަރަށް ގިނަ ބައެއްގެ އެހީތެރިކަމާ އެކު. މި މަގާމުގައި ހުރުމަކީ ހިތްހަމަ ޖެހުމެއް،"
ޕެރިސް މާސްޓާސް ފައިނަލުގައި ޖޮކޮވިޗް ނުކުންނާނީ ޑަނީލް މެޑްވެޑޭވްއާ ދެކޮޅަށެވެ. މެޑްވެޑޭވް ވަނީ މި ފަހަރުގެ ޔޫއެސް އޯޕަން ފައިނަލުގައި ޖޮކޮވިޗް ބަލިކޮށްފަ އެވެ. އެ މެޗުން ބަލިވެ، ސީޒަނުގެ ހަތަރު ގްރޭންޑް ސްލޭމް ކާމިޔާބުކުރަން ޖޮކޮވިޗް ކުރި އުއްމީދުތައް ހާސިލެއްނުވި އެވެ.
ޔޫއެސް އޯޕަން ފައިނަލް ކުޅުނުތާ ހަތް ވަރަކަށް ހަފްތާ ފަހުން އަލުން މެޑްވެޑޭވްއާ ދެކޮޅަށް ނުކުންނަން ޖެހުމުން ޖޮކޮވިޗް ބުނީ މި ފަހަރުގެ ފައިނަލް ތަފާތުވާނެ ކަމަށެވެ. ކުރިން ބަލިވުމުން ބަދަލުހިފުމުގެ ރޫހެއް ނެތް ކަމުގައި ވިޔަސް ޖެހިޖެހިގެން ދެ ފައިނަލުގައި މެޑްވެޑޭވް އަތުން ބަލިވާން ބޭނުން ނުވާ ކަމަށް ޖޮކޮވިޗް ބުނެފައިވެ އެވެ.
މިއަދުގެ ފައިނަލުގެ ކުރިން މެޑްވެޑޭވް ބުނީ ޔޫއެސް އޯޕަން ފައިނަލު ދިޔަ ގޮތުން ޔަގީނުން ވެސް ޖޮކޮވިޗް ފިލާވަޅުތަކެއް ދަސްކުރާނެ ކަމަށެވެ.
